រយៈពេលចុងក្រោយនេះ គឺក្រោយពីការបោះឆ្នោតឃុំសង្កាត់បានបញ្ចប់ ដោយគណបក្សប្រឆាំងទទួលបានសំឡេងឆ្នោតមួយផ្នែកធំ គេសង្កេតឃើញបក្សកាន់អំណាច មានការកែទម្រង់កាន់តែច្រើនថែមទៀត ជាពិសេសការបង្កើនប្រាក់ខែនិងប្រាក់សង្គមកិច្ចដល់ស្ថាប័នរដ្ឋ និងវិស័យឯកជន។ នៅថ្ងៃនេះ ប្រមុខរដ្ឋាភិបាល សម្រេចបន្ថែមប្រាក់ឧបត្ថម្ភមួយផ្នែកទៀតដល់កីឡាការិនីនៅពេលសម្រាលកូន ដោយ កូនមួយទទួលបាន៤០ម៉ឺនរៀល។ ករណីនេះ មន្ត្រីសង្គមស៊ីវិល ធ្វើកិច្ចការស្ត្រីសាទរ។
ក្រៅពីកម្មការិនីរោងចក្រ ស្រ្តីដែលបម្រើការងាររាជការស៊ីវិល ប៉ូលីស ទាហាន គឺក្រុមកីឡាការិនី ក៏នឹងទទួលបានប្រាក់ឧបត្ថម្ភពីរដ្ឋាភិបាល នៅពេលសម្រាលកូនដែរ។ នេះបើតាមប្រសាសន៍របស់សម្តេចនាយករដ្ឋមន្រ្តី ហ៊ុន សែន នៅក្នុងពិធីជួបសំណេះសំណាលជាមួយកម្មករ កម្មការិនីរោងចក្រនៅព្រឹកថ្ងៃទី១៨ តុលានេះ។
សម្តេចបានបញ្ជាក់ កីឡាការិនីនឹងទទួលការឧបត្ថម្ភ ដូចកម្មកររោងចក្រ គឺសម្រាលបានកូនមួយទទួលបាន៤០ម៉ឺនរៀន កូនពីរទទួលបាន៨០ម៉ឺនរៀល និងកូនបីទទួលបាន១លាន២សែនរៀល ដោយគោលនយោបាយនេះ នឹងចាប់ផ្តើមអនុវត្តចាប់ពីខែមករា ឆ្នាំ២០១៨ទៅ។
ចំណែកស្រ្តីបម្រើការងារជាមន្រ្តីរាជការទាំងស៊ីវិល និងប៉ូលីស ទាហាននៅពេលសម្រាលកូនក៏ ទទួលបានប្រាក់ឧបត្ថម្ភ៨០ម៉ឺនរៀលដែរ។
គោលនយោបាយរបស់រដ្ឋាភិបាល ទៅលើការចំណាយនៅពេលកម្មការិនីរោងចក្រ ក្រុមកីឡាការិនីនិងស្ត្រីបំម្រើការងាររដ្ឋសម្រាលកូន ត្រូវបានអង្គការមួយធ្វើការងារលើកស្ទួយស្រី្តបានប្រាប់វិទ្យុស្ត្រីថា គោលនយោបាយនេះនឹងមានការសាទរ។
លោកស្រីធីតាឃឹះ នាយិកាអង្គការសីលកា មានប្រសាសន៍ថា ជាការរួមចំណែកលើកស្ទួយជីវភាពគ្រូសារនិង ស្ត្រី តែលោកស្រី ចង់ឱ្យក្លាយជាគោលនយោបាយមួយទូលំទូលាយដោយ ត្រូវបានអនុវត្តយូរអង្វែង។
បន្ថែមពីនេះ ប្រមុខរដ្ឋាភិបាលបានប្រកាសថា គ្រប់មន្ទីរពេទ្យរដ្ឋត្រូវយកចិត្តទុកដាក់ព្យាបាលស្រ្តីមានផ្ទៃពោះ ហើយ សម្រាប់ កម្មការិនី នៅពេលទៅពិនិត្យសុខភាពក៏មិនត្រូវបង់ថ្លៃសេវាដែរ៕
