សម្តេចនាយករដ្ឋមន្រ្តី ហ៊ុន សែន បានអំពាវនាវដល់ថៅកែរោងចក្រឱ្យមានការសម្របសម្រួលដើម្បីបង្កើនរយៈពេលកិច្ចសន្យាការងារ ឱ្យលើសពីបីខែ ។
សម្តេចនាយករដ្ឋមន្រ្តីថ្លែងដូចនេះ ខណៈសម្តេចជួបសំណេះសំណាលជាមួយកម្មករកម្មការិនីជាង១ម៉ឺននាក់ នៅតំបន់កំបូលនៅព្រឹកថ្ងៃទី១៨ ខែតុលា ឆ្នាំ២០១៧នេះ។
សម្តេចនាយករដ្ឋមន្រ្តី មានប្រសាសន៍ថា នៅរោងចក្រមួយចំនួន កិច្ចសន្យាការងារមានរយៈពេលតែបីខែប៉ុណ្ណោះ ដែលធ្វើឱ្យកម្មករកម្មការិនីមានអារម្មណ៍មិនជាក់លាក់ក្នុងការងារ បន្ទាប់ពីធ្វើការបានបីខែ ថៅកែបន្តកិច្ចសន្យាឱ្យធ្វើការទៀត។
ស្របពេលសម្តេចថ្លែងពីបញ្ហានេះ មានកម្មការិនីមួយរូបបានបញ្ចេញយោបល់(ខមមិន) ក្នុងទំព័រហ្វេសប៊ុក សុំឱ្យសម្តេចជួយអន្តរាគមន៍ នៅរោងចក្ររបស់ខ្លួនដែលថៅកែបានបន្ថយកិច្ចសន្យាការងារពីមួយឆ្នាំមកបីខែ។
កម្មការិនីរូបនេះ បានសរសេរថា«សម្តេចសូមជួយកម្មករផង ៣០០០នាក់ត្រូវគាបសង្កត់ពីខាងរោងចក្រពុយៀនដោយទំលាក់កុងត្រាពីមួយឆ្នាំមកបីខែ។ កូនចៅសូមអោយសម្តេចជួយផងកូនដាច់លុយអស់ហើយ»។
យ៉ាងណាមិញ សម្តេចហ៊ុន សែន បានទទូចកម្មករ កម្មការិនីឱ្យមានការអនុគ្រោះចំពោះកិច្ចសន្យាការងារខ្លីនេះ ព្រោះនៅរោងចក្រខ្លះការងារមានរយៈពេលខ្លី ដែលថៅកែរោងចក្រទាំងនោះមិនអាចបន្តកិច្ចសន្យាឱ្យវែងបាន៕
