កិច្ចប្រជុំក្រុមប្រឹក្សាប្រតិបត្តិលើកទី១ នៃមហាសន្និបាតលើកទី១០ របស់សភាតំបន់អាស៊ី បានបើកជាផ្លូវការនៅព្រឹកថ្ងៃទី២ ខែតុលា ឆ្នាំ២០១៧នេះ ដោយមានការចូលរួមពីគណៈប្រតិភូសមាជិកសភាតំបន់អាស៊ីចំនួន២៦ប្រទេស មានចំនួនជាង១៤០នាក់ បានចូលរួម ។ កិច្ចប្រជុំនេះធ្វើឡើងនៅឯសណ្ឋាគារសុខាភ្នំពេញ និងរ៉េស៊ីដង់។ កិច្ចប្រជុំអន្តរសភាដែលមានរយៈពេល១ថ្ងៃកន្លះនេះ រំពឹងថា នឹងធ្វើឱ្យតំបន់អាស៊ី ជាតំបន់មួយគ្មានហឹង្សា គ្មានសង្រ្គាម គ្មានការជិះជាន់គាបសង្កត់។
មានប្រសាសន៍បើកជាផ្លូវការ នូវកិច្ចប្រជុំក្រុមប្រឹក្សាប្រតិបត្តិលើកទី១ នៃមហាសន្និបាតលើកទី១០ របស់សភាតំបន់អាស៊ី នៅព្រឹកនេះ សម្តេចហេង សំរិន ប្រធានរដ្ឋសភាកម្ពុជា បានលើកឡើងថា ព្រឹត្តិការណ៍ជួបជុំ នៃអ្នកតំណាងប្រជាជាតិអាស៊ីនៅពេលនេះ បានជះឥទ្ធិពលជាវិជ្ជមានដល់ការរួមចំណែកប្រកបដោយន័យស្ថាបនាដល់ការពន្លត់អំពើហិង្សា ជម្លោះ និងភ័យន្តរាយនានា ដែលបាននឹងកំពុងយារយីនៅក្នុងតំបន់ និងសកលលោកឲ្យវិលមករកប្រក្រតីភាព និងបានបន្សាបរាល់ការប៉ុនប៉ងបង្កអរិយភាពណាមួយដល់តំបន់និងពិភពលោក។
សម្តេច ហេង សំរិន ដែលបានធ្វើជាប្រធានសភាតំបន់អាស៊ី តំាងពីឆ្នាំ២០១៥មក សម្តេចបានលើកឡើងបន្តថា ចំពោះជោគជ័យជាបន្តបន្ទាប់ដែល អេ-ភី-អេ សម្រេចបាននាពេលកន្លងមក បានបង្ហាញពិភពលោកឱ្យដឹង និងទទួលស្គាល់ពីសារៈសំខាន់នៃចក្ខុវិស័យ និងបេសកកម្មរបស់ អេ ភី-អេ ក្នុងការរួមចំណែកកសាងសុខដុមនីយកម្មតំបន់អាស៊ី ឱ្យមានសន្តិភាព ស្ថេរភាព និងការអភិវឌ្ឍ។
សមាជិកសភាតំបន់អាស៊ី ដែលចូលរួមកិច្ចប្រជុំក្រុមប្រឹក្សាប្រតិបត្តិ ដែលសភាកម្ពុជាធ្វើជាម្ចាស់ផ្ទះនៅព្រឹកនេះ មានប្រទេសអាហ្គានីស្ថាន ប៉ារ៉ែន បង់ក្លាដេស ប៊ូតាន ចិន ស៊ីព្រូស ឥណ្ឌា ឥណ្ឌូនេស៊ី អ៊ីរ៉ង់ អ៊ីរ៉ាក់ ហ្សកដង់ គុយវ៉ែត ឡាវ ម៉ាឡេស៊ី នេប៉ាល់ កូរ៉េខាងជើង ប៉ាគីស្ថាន ប៉ាឡេស្ទីន រុស្ស៊ី សោឌីអារ៉ាប់បី ស៊ីរ៉ី ថៃ តួកគី អារ៉ាប់រួម វៀតណាម និងកម្ពុជា។
ជាមួយគ្នាដែរ សម្តេច ហេង សំរិន មានប្រសាសន៍ថាកិច្ចប្រជុំ អេភីអេនេះ គឺជាមាគ៌ាត្រួសត្រាយផ្លូវក្នុងការធ្វើកិច្ចសហប្រតិបត្តិការឱ្យកាន់តែស៊ីជម្រៅថែមទៀតរវាងសភានៃប្រទេសជាសមាជិក។
សូមជម្រាបថា កិច្ចប្រជុំក្រុមប្រឹក្សាប្រតិបត្តិលើកទី១ នៃមហាសន្និបាតលើកទី១០ របស់សភាតំបន់អាស៊ីនារយៈពេលពីរថ្ងៃនេះ មានរបៀបវារៈមួយចំនួន ក្នុងនោះ សេចក្តីព្រាងសេចក្តី សម្រេចចំនួន២៤ នៃគណៈកម្មាធិការអចិន្រ្តៃយ៍ចំនួន៤របស់អេភីអេ។
កិច្ចប្រជុំក្រុមប្រឹក្សាប្រតិបត្តិលើកទី១នេះ នឹងបញ្ជូនទៅប្រជុំបន្តនៅក្នុងកិច្ចប្រជុំក្រុមប្រឹក្សាប្រតិបត្តិលើកទី២ និងមហាសន្និបាតលើកទី១០ របស់សភាតំបន់អាស៊ី នៅប្រទេសតួកគី នៅខែវិច្ឆិកា ឆ្នាំ២០១៧នេះ។ ប្រទេសតួកគីទទួលធ្វើជាប្រធានសភាតំបន់អាស៊ីបន្តពីកម្ពុជា។
សភាតំបន់អាស៊ី ហៅកាត់ថា អេភីអេ បានបង្កើតឡើងនៅឆ្នាំ១៩៩៩ ក្នុងចក្ខុវិស័យកសាងសន្តិភាពនិងអភិវឌ្ឍន៍ដោយចីរភាពនៅក្នុងតំបន់និងភិពភលោក។ ស្ថាប័ននេះ មានឈ្មោះដើម សមាគមសភាអាស៊ីដើម្បីសន្តិភាព ហៅកាត់ថា (AAPP)។ AAPP ប្តូរមក APA នៅឆ្នាំ២០០៦។ បច្ចុប្បន្ន APA មានសមាជិក៤២ ប្រទេស៕