ភ្នំពេញ ៖ ខណៈភ្លៀងនៅតែបន្ដធ្លាក់ក្នុងក្របខ័ណ្ឌទូទាំងប្រទេសនឹងកើនឡើងជាបន្ដបន្ទាប់នោះ ចាប់ពីសប្ដាហ៍ក្រោយនេះទៅ តំបន់មាត់សមុទ្រនឹងមានស្ថានភាពកាន់តែអាប់អួខ្លាំង ពិសេសគឺលើផ្ទៃសមុទ្រ ដែលអ្នកធ្វើដំណើរតាមសមុទ្រទាំងអស់ត្រូវតែបង្កើនការប្រុងប្រយ័ត្នឲ្យខ្ពស់ដើម្បីបញ្ចៀសហេតុការណ៍គ្រោះថ្នាក់ណាមួយ អាចកើតឡើងជាយថាហេតុ។
ភ្លៀងបានធ្លាក់រាយប៉ាយស្ទើរទូទាំងប្រទេស ដែលមានរាជធានី និងខេត្ដមួយចំនួនមានទឹកលិច ក៏ប៉ុន្ដែមិនបង្កជាផលប៉ះពាល់ធ្ងន់ធ្ងរនោះទេ នេះបើយោងតាមការឲ្យដឹងពីអ្នកនាំពាក្យក្រសួងធនធានទឹក។ តែយ៉ាងណាស្ថានភាពអាកាសធាតុនេះ ហាក់អាក្រក់សម្រាប់តំបន់មាត់សមុទ្រ។
លោក ចាន់ យុត្ថា អ្នកនាំពាក្យក្រសួងធនធានទឹកមានប្រសាសន៍ថា ទឹកភ្លៀងបានធ្លាក់គ្របដណ្ដប់ស្ទើរគ្រប់ខេត្ដ និងរាជធានី នៃព្រះរាជាណាចក្រកម្ពុជា ក៏ប៉ុន្ដែស្ថានភាពនេះមិនបង្កជាជំនន់ទឹកភ្លៀងធ្ងន់ធ្ងរដល់បណ្ដាខេត្ដនានានោះទេ លើកលែងតែរាជធានីភ្នំពេញ មានផ្នែកខ្លះត្រូវបានជន់លិចដោយទឹកភ្លៀង។
តែយ៉ាងណាអ្នកនាំពាក្យក្រសួងធនធានទឹក សង្កត់ធ្ងន់ដល់ខេត្ដជាប់មាត់សមុទ្រ ដែលនឹងមានស្ថានភាពអាកាសធាតុអាប់អួខ្លាំង ក្នុងរង្វង់ចាប់ពីសប្ដាហ៍ក្រោយតទៅ ដែលប្រជាពលរដ្ឋធ្វើដំណើរតាមសមុទ្រ និងប្រជានេសាទ ត្រូវបង្កើនការប្រុងប្រយ័ត្នឲ្យខ្ពស់ដើម្បីបញ្ចៀសគ្រោះថ្នាក់កើតឡើង។ លោក ចាន់ យុត្ថា ៖« តំបន់មាត់សមុទ្រគឺស្ថានភាពភ្លៀងនៅតែបន្ដធ្លាក់រាយប៉ាយហើយរលកសមុទ្រអាចមានកម្ពស់ខ្ពស់ៗ ហើយចាប់ពីសប្ដាហ៍ក្រោយទៅគឺស្ថានភាពកាន់តែអាប់អួ ជាពិសេសលើផ្ទៃសមុទ្រ សម្រាប់អ្នកធ្វើដំណើរតាមសមុទ្រនៅតែបង្កើនការយកចិត្ដទុកដាក់ដើម្បីចៀសវាងនៅគ្រោះថ្នាក់ផ្សេងៗ ហើយដោយឡែកបងប្អូនដែលរស់នៅតំបន់ទំនាប ឬក៏នៅតាមផ្លូវទឹកនានា ក៏សុំបង្កើនការយកចិត្ដទុកដាក់ប្រុងប្រយ័ត្ន ព្រោះរបាយកទឹកភ្លៀងនឹងនៅតែបន្ដធ្លាក់ជាបន្ដបន្ទាប់ទៀតនៅក្នុងក្របខ័ណ្ឌទូទាំងប្រទេស»។
ទន្ទឹមនឹងនេះអ្នកនាំពាក្យក្រសួងធនធានទឹក៏អំពាវនាវដល់ប្រជាពលរដ្ឋគ្រប់រូបត្រូវតែធ្វើយ៉ាងណាតាមដានឲ្យបានខ្ជាប់ខ្ជួនពីការព្យាករណ៍អាកាសធាតុរបស់ក្រសួងធនធានទឹក ដើម្បីត្រៀមខ្លួនជាមុនបង្ការបញ្ហាដែលអាចកើតមានក្នុងរដូវវស្សានេះ៕
