ភ្នំពេញ៖ យោងតាមសេចក្ដីជួនដំណឹងរបស់សាលារាជធានីភ្នំពេញ ចាប់ពីថ្ងៃអាទិត្យ ទី០១ ខែតុលា ឆ្នាំ២០១៧ នេះ តទៅស្ពានមិត្ដភាពកម្ពុជា-ជប៉ុន ឬហៅថា ស្ពានជ្រោយចង្វារទី១ គឺត្រូវបិទចរាចរណ៍ទាំងស្រុង ដើម្បីធ្វើការជួសជុលកែលំអឡើងវិញ។ ការបិទចរាចរណ៍ឆ្លងកាត់ស្ពានមិត្ដភាពកម្ពុជា-ជប៉ុន ឬស្ពានជ្រោយចង្វារទី១ នេះ នឹងត្រូវជំនួសមកវិញ នូវការធ្វើចរាចរណ៍លើ ស្ពានមិត្ដភាពកម្ពុជា-ចិន ឬស្ពានជ្រោយចង្វារទី២ ដែលស្ថិតនៅទន្ទឹមគ្នានោះ ទាំងទិសចេញ និងទិសចូល រាជធានីភ្នំពេញ។
តាមសេចក្ដីជួនដំណឹងដដែល ដើម្បីបញ្ចៀសការកកស្ទះចរាចរណ៍ នៅលើស្ពានមិត្ដភាពកម្ពុជា-ចិន ឬស្ពានជ្រោយចង្វារទី២ ខណៈស្ពានជ្រោយចង្វារទី១ ត្រូវបិទ។ រដ្ឋបាលរាជធានីភ្នំពេញបានកំណត់ឲ្យ រថយន្ដធុនធំ ដែលធ្វើដំណើរចូលរាជធានីភ្នំពេញ តាមផ្លូវជាតិលេខ ៦ ត្រូវពង្វាងបត់ចូលតាមផ្លូវ លី យ៉ុងផាត់ ហើយចំពោះយានយន្ដគ្រប់ប្រភេទ ដែលធ្វើដំណើរទិសដៅចូលរាជធានីភ្នំពេញ តាមផ្លូវជាតិលេខ ៦ ពេលធ្វើដំណើរមកដល់ចំណុចថ្នល់កែង ត្រូវបត់ស្ដាំធ្វើដំណើរទៅតាមកំណាត់ផ្លូវជាតិលេខ៦ ឆ្ពោះទៅស្ពានព្រែកក្ដាម និងបន្ដដំណើរចូលរាជធានីភ្នំពេញ តាមផ្លូវជាតិលេខ ៥វិញ។ ក្នុងករណីមានការកកស្ទះចរាចររក្នុងតំបន់ការដ្ឋានធ្ងន់ធ្ងរ សាលារាជធានីភ្នំពេញ ស្នើដល់អ្នកបញ្ជាយានយន្ដគ្រប់ប្រភេទ ត្រូវអនុវត្ដតាមការបង្វែរទិសចរាចរណ៍របស់សមត្ថកិច្ចជំនាញ។
តាមសេចក្ដីជួនដំណឹង ស្នងការដ្ឋាននគរបាលរាជធានីភ្នំពេញ បញ្ជាការដ្ឋានកងរាជអាវុធហត្ថរាជធានីភ្នំពេញ ព្រមទាំងអាជ្ញាធរមានសមត្ថកិច្ចពាក់ព័ន្ធត្រូវចូលរួមសហការអនុវត្តាមដសេចក្ដីជួនដំណឹងនេះឲ្យមានប្រសិទ្ធភាពប្រកបដោយការទទួលខុសត្រូវខ្ពស់៕
