បន្ទាប់ពីបញ្ចប់ការសួរដេញដោលជាអសាធារណៈ នៅព្រឹកថ្ងៃទី២៦ ខែកញ្ញា នេះ ប្រធានក្រុមប្រឹក្សាជំនុំជម្រះនៃសភាស៊ើបសួរ លោក ឃុន លាងម៉េង សម្រេចបដិសេធចំពោះបណ្តឹងប្រឆាំងទៅនឹងដីកាឃុំខ្លួនរបស់ក្រុមមេធាវី លោក កឹម សុខា។ ការសម្រេចរបស់សាលាឧទ្ធរណ៍ ធ្វើឡើង ខណៈ អវត្តមាន មេធាវីទាំង៨រូបលោករបស់ លោកកឹមសុខា។
ប្រធានសភាស៊ើបសួរ លោក ឃុន លាងម៉េង បានដឹកនាំកិច្ចសវនាការអស់មួយព្រឹកហើយក្រោយមកបានសម្រេចបដិសេធបណ្ដឹងទាស់របស់ មេធាវី លោកកឹមសុខាដែលបានប្ដឹងករណីចាប់ខ្លួននិងឃុំខ្លួន ប្រធានគណបក្សប្រឆាំងនេះដោយក្រុមមេធាវីថាជាអំពើខុសច្បាប់។
ក្រុមមេធាវីការពារក្តីឱ្យលោក កឹម សុខា យល់ឃើញថា ការសម្រេចរបស់សាលាឧទ្ធរណ៍នៅព្រឹកមិញនេះថា មិនបានផ្តល់យុត្តិធម៌ចំពោះកូនក្តីរបស់ខ្លួននោះទេ ដោយពួកគាត់យល់ថាកន្លងមកចំណាត់ការរបស់តុលាការបំពាននីតិវិធីច្បាប់។
លោក សំ សុគង់ មេធាវីម្នាក់ ក្នុងចំណោមមេធាវីទាំង៨របស់ លោក កឹម សុខា មានប្រសាសន៍ថា ការសម្រេចដោយគ្មានវត្តមានលោក កឹម សុខា ក្នុងការសួរដេញដោលនេះគឺជារំលោភសិទ្ធិរបស់ជនត្រូវចោទ។
លោក សំ សុគង់ ៖«ការដែលមិនមានវត្តមានឯកឧត្តម កឹម សុខា នៅក្នុងបន្ទប់សវនាការ គឺជាការរំលោភមួយទៀត គឺជាការរំលោភឆន្ទៈរបស់ជនត្រូវចោទ ក៏ដូចជាសិទ្ធិដែលទទួលបានសវនាការមួយយុត្តិធម៌ និងត្រឹមត្រូវដែលមានចែងនៅក្នុងកាតិកាសញ្ញាស្តីពីសិទ្ធិពលរដ្ឋ និងនយោបាយ»។
មេធាវីរូបនេះបន្ថែមថាក្រុមមេធាវីនឹងពិភាក្សាជាមួយលោក កឹម សុខា ដើម្បីប្តឹងសាទុក្ខទៅតុលាការកំពូល ដើម្បីឱ្យពិនិត្យសេចក្តីសម្រេចនេះឡើងវិញ ដោយសាវនាការដេញដោលនៅព្រឹកមិញនេះ មិនមានវត្តមានលោក កឹម សុខាដែលជាជនត្រូវចោទ និងគ្មានវត្តមានក្រុមមេធាវី។
លោក កឹម សុខា ប្រធានគណបក្សសង្រ្គោះជាតិត្រូវបានសមត្ថកិច្ចចូលចាប់ខ្លួននៅលំនៅដ្ឋានរបស់លោកកាលពីពាក់កណ្ដាលអធ្រាត្រ ថ្ងៃទី២ កញ្ញា ២០១៧ ឈានចូលថ្ងៃទី០៣ ខែកញ្ញា ឆ្នាំ២០១៧ ក្រោយពីវីដេអូមួយដែលលោកនិយាយជាមួយអ្នកគាំទ្រនៅប្រទេសអូស្រ្តាលីកាលពីឆ្នាំ២០១៣ បានផ្សព្វផ្សាយជាសាធារណៈនៅលើបណ្តាញសង្គមហ្វេសប៊ុក។
កាលពីថ្ងៃទី០៦ ខែកញ្ញា ឆ្នាំ២០១៧ ចៅក្រមស៊ើបសួរសាលាដំបូងរាជធានីភ្នំពេញ បានសម្រេចឃុំខ្លួន លោក កឹម សុខា ដាក់ពន្ធនាគារជាបណ្តោះអាសន្ន ក្រោមការចោទបទប្រកាន់ «សន្ទិដ្ឋិភាពជាមួយបរទេស» ក្នុងមាត្រា៤៤៣ នៃក្រមព្រហ្មទណ្ឌ ដែលបទល្មើសនេះប្រឈមនឹងការដាក់ពន្ធនាគារពី១៥ ទៅ៣០ឆ្នាំ។
ក្នុងសវនាដេញដោលនៅសាលាឧទ្ធរណ៍ នៅព្រឹកនេះ លោក កឹម សុខា មិនត្រូវបាននាំខ្លួនពីពន្ធនាគារត្រពាំងផ្លុង ខេត្តត្បូងឃ្មុំ មកកាន់សវនាការឡើ ដោយអាជ្ញាធព្រួយបារម្ភពីសុវត្ថិភាពជនជាប់ចោទ។
ដោយអវត្តមានលោក កឹម សុខា ក្នុងការសួរដេញដោលនេះ ក្រុមមេធាវីរបស់លោកទាំងប្រាំបីនាក់បានពហិការដើរចេញពីសវនា។ ការធ្វើពហិការនេះ ដោយសារក្រុមមេធាវីយល់ឃើញថាសវនាការដែសលគ្មានវត្តមានជនត្រូវចោទ គឺជាសវនាការមួយដែលគ្មានលក្ខណៈយុត្តិធម៌ និងត្រឹមត្រូវ ព្រមទាំងរំលោភសិទ្ធិធ្ងន់ធ្ងរដល់ជនត្រូវចោទផងដែរ។
ចំពោះការដើរចេញពីសវនាការរបស់ក្រុមមេធាវី លោក កឹម សុខានេះដែរ អ្នកនាំពាក្យសាលាឧទ្ធរណ៍ បានចេញសេចក្តីប្រកាសព័ត៌មានសម្តែងការសោកស្តាយ ព្រោះក្រុមមេធាវីមិនបានបង្ហាញពីមូលហេតុនៃបណ្តឹងឧទ្ធរណ៍របស់ខ្លួននៅក្នុងបន្ទប់សវនាការ។
ខណៈសភាស៊ើបសួរសាលាឧទ្ធរណ៍កំពុងដេញដោលទៅបណ្តឹងប្រឆាំងនឹងការឃុំខ្លួនរបស់ក្រុមមេធាវីក្រុមតំណាងគណបក្សសង្គ្រោះជាតិនិងអ្នកគាំទ្រប្រមាណជាង១០០នាក់បានប្រមូលផ្ដុំគ្នានៅក្បែរសាលាសាលាទ្ធរណ៍ ស្របពេលកងកម្លាំងសមត្ថកិច្ចរិតបណ្តឹងសន្តិសុខនិងបិទការធ្វើការចរាណ៍លើកំណាត់ផ្លូវស៊ីសុវត្តិចាប់ពីវត្តឧណ្ណាលោមដល់សាលាទ្ធរណ៍។
លោក សុន ឆ័យ មន្រ្តីជាន់ខ្ពស់គណបក្សសង្រ្គោះជាតិ បានថ្លែងប្រាប់អ្នកសារព័ត៌មាននៅក្បែរបរិវេណសាលាឧទ្ធរណ៍ថា គណបក្សសង្រ្គោះជាតិនៅតែបន្តទាមទារឱ្យមានការដោះលែងលោក កឹម សុខា។
លោក សុន ឆ័យ៖«ប៉ុន្តែជានយោបាយយើងនៅតែទុកច្រកមួយ ដែលអាចនឹងឃើញភាពមួយដែលរីកចំរើន អញ្ចឹងបានថាយើងមិនត្រូវនិយាយល្អិតសូន្យសុងទាំងអស់ទេ វាគួរតែមានពន្លឺអីតិចតួចដែរ។ដែលខំមកនេះ មកអញ្ចឹង មកដាស់តឿនផងមករំលឹកផង»។
ជុំវិញការចាប់ខ្លួនប្រធានគណបក្សប្រឆាំងនេះដែរ សហគមន៍អន្តរជាតិ បានទាមទារដោះលែងកឹមសុខាជាបន្ទាន់ តែ ប្រមុខរដ្ឋាភិបាល ចាត់ទុកការទាមទារនេះ គឺជាការជ្រៀតជ្រែងចូលកិច្ចការផ្ទៃក្នុងកម្ពុជា៕
