ប៉េកាំង៖ រដ្ឋាភិបាលចិនជឿថា រដ្ឋាភិបាលវេណេហ្សូអេឡា និងប្រជាជនរបស់ប្រទេសនេះ អាចដោះស្រាយបញ្ហារបស់ខ្លួន ដោយផ្អែកលើច្បាប់ក្នុងប្រទេស តែអាមេរិកព្រមានថា ទណ្ឌកម្មសេដ្ឋកិច្ចលក្ខណៈធ្ងន់ធ្ងរអាចនឹងចាប់ផ្តើមឆាប់ៗនេះហើយ។
លោករដ្ឋមន្រ្តីការបរទេសចិនបានបញ្ជាក់ថា ចិនប្តេជ្ញាគាំទ្រលោក ម៉ាឌូរ៉ូ បន្តដឹកនាំប្រទេសវេណេហ្សូអេឡាទៅមុខទៀត បើទោះជាប្រទេសនេះ រងការផ្តន្ទាទោសពីសហគមន៍អន្តរជាតិ។
លោករដ្ឋមន្រ្តីការបរទេសចិន លោក វ៉ាង យី បានប្រាប់សមភាគីវេណេហ្សូអេឡា នៅឯអង្គការសហប្រជាជាតិ កាលពីថ្ងៃសៅរិ៍ ទី ២៣ កញ្ញាម្សិលមិញនេះ។
តែនៅពេលដំណាលគ្នានេះ ឯកអគ្គរដ្ឋទូតសហរដ្ឋអាមេរិក ប្រចាំអង្គការសហប្រជាជាតិ លោកស្រី នីគី ហាឡេយ បានព្រមានថា បើការដាក់ទណ្ឌកម្មហិរញ្ញវត្ថុមិនបានជោគជ័យ គឺអាមេរិក នឹងដាក់ទណ្ឌកម្មសេដ្ឋកិច្ចលើការនាំប្រេងចូលអាមេរិកតែម្តង នោះប្រសិនបើប្រទេសវេណេហ្សូអេឡា មិនមានលទ្ធិប្រជាធិបតេយ្យ ត្រឹមត្រូវឡើងវិញនោះ។
កាលពីថ្ងៃម្សិលមិញ លោក ដូណាល់ត្រាំ បានប្រាប់ក្រុមប្រឹក្សាសន្តិសុខអង្គការសហប្រជាជាតិថា លោកនឹងមិនបណ្តោយឲ្យរបបផ្តាច់ការកើតមាននៅវេណហ្សូអេឡានោះទេ។
ប្រទេសវេណេហ្សូអេឡាបានធ្លាក់ក្នុងវិបត្តិនយោបាយតាំងពីខែមេសា ដោយបណ្ដាលឲ្យមនុស្សស្លាប់ជាង១២៥នាក់ និង សកម្មជនមេដឹកនាំបក្សប្រឆាំងជាច្រើនរយនាក់ត្រូវបានចាប់ខ្លួន៕ AFP
