គិតមកត្រឹមថ្ងៃទី ២២ ខែកញ្ញា នេះ អ្នកទៅចុះឈ្មោះបោះឆ្នោត មានចំនួន ១សែន ៥ម៉ឺន ៥ពាន់ ៨៣៦នាក់ ខណៈអ្នកដែលត្រូវលុបឈ្មោះចេញពីបញ្ជីចាស់មានចំនួន ៥៤៣នាក់ ។
នេះបើតាម លោក ហង ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោតបានប្រាប់វិទ្យុស្រ្ដី Fm102 នៅថ្ងៃទី២៣ កញ្ញានេះ។
តាមលោក ហង្ស ពុទ្ធា បញ្ជាក់ថា ចំនួនអ្នកដែលបានទៅចុះឈ្មោះបោះឆ្នោតថ្មីនេះ គឺ នូវមានចំនួនតិចនៅឡើយ ។
លោក ហង្ស ពុទ្ធា ៖« ចំនួននេះ មានចំនួនតិចនៅឡើយ ពីព្រោះបើគិតជាភាគរយ គឺ ៩.៥៨ ភាគរយ អ្នកដែលបានចុះឈ្មោះបោះឆ្នោតថ្មី »។
អ្នកនាំពាក្យគណៈកម្មាធិការជាតិរៀបចំការបោះឆ្នោតរូបនេះ បានអំពាវនាវឱ្យប្រជាពលរដ្ឋ រូតរាន់ទៅចុះឈ្មោះបោះឆ្នោត និងពិនិត្យបញ្ជីឈ្មោះបោះឆ្នោតថ្មីនេះ។
លោក ហង្ស ពុទ្ធា ៖« យើងក៏នៅសល់ពេលវេលាទៀតដែរ ហើយសង្ឃឹមថា បងប្អូនប្រជាពលរដ្ឋលោកនឹងអញ្ជើញមកចូលរួមនៅក្នុងការចុះឈ្មោះ ពិនិត្យបញ្ជីឈ្មោះហើយនិងធ្វើបច្ចុប្បន្នភាពបញ្ជីបោះឆ្នោតថ្មីនេះ »។
តាមការប៉ាន់ស្មានរបស់ គ.ជ.ប ប្រជាពលរដ្ឋខ្មែរដែលត្រូវមកចុះបោះឆ្នោតក្នុងបញ្ជីចុះឈ្មោះបោះឆ្នោតថ្មី ឆ្នាំ២០១៧ មានជាង ១ លាន ៦សែននាក់ ខណៈប្រជាពលរដ្ឋខ្មែរ ដែលមានអាយុ១៨ឆ្នាំឡើងទៅ ត្រូវបានប៉ាន់ស្មានថា មានប្រមាណ៩ លាន ៨សែន នាក់៕
