ម៉ិកស៊ិក៖ ក្រុមអ្នកជួយសង្គ្រោះកំពុងព្យាយាមគាស់កកាយគំនរអាគារសាលារៀន បាក់បែកដើម្បីស្វែងរក សិស្សសាលា ដែលពួកគេជឿជាក់ថា នៅរស់រានមានជីវិត ក្រោយព្រឹត្ដិការណ៍ដ៏រន្ធត់នៃការរញ្ជួយដី កាលពីថ្ងៃអង្គារ ដោយប្រើនាឡិកាស្វែងរកស្វ័យប្រវត្ដិ។ នេះបើយោងតាមបណ្ដាញ BBC ដែលផ្សព្វផ្សាយនៅថ្ងៃទី២១ ខែកញ្ញា ឆ្នាំ២០១៧។
មន្ដ្រីមួយរូបដែលបានចូលរួមប្រតិបត្ដិការរុករកសិស្ស ដែលនៅរានមានជីវិតបានប្រាប់បណ្ដាញផ្សាយព័ត៌មាន BBC ថា មានក្មេងស្រីម្នាក់ទំនងនៅរស់មានជីវិត ដែលនាងស្ថិតក្រោមគំនរបាក់បែក នៃអាគារសាលាបឋមសិក្សា Enrique Rebsamen ខណៈមានកុមារ ២១នាក់ផ្សេងទៀត និងមនុស្សពេញវ័យចំនួន ៥នាក់ បានស្លាប់នៅពេលដែលសាលារៀននេះ បានដួលរលំក្រោមឥទ្ធិពលរញ្ជួយដីកម្លាំង ៧.១ រិចទ័រ។
មកដល់ថ្ងៃទី២១ កញ្ញានេះ រដ្ឋាភិបាលម៉ិកស៊ិកបាននិយាយថា អ្នកស្លាប់នៅទូទាំងប្រទេសបានកើនឡើងរហូតដល់ ២៥៥នាក់ និងបង្កឲ្យខូចខាតអាគាររាប់ពាន់ខ្នង។ លោក ប្រធានាធិបតី Enrique Peña Nieto បានប្រកាសកាន់ទុក្ខរយៈពេលបីថ្ងៃសម្រាប់ជនរងគ្រោះដែលស្លាប់ដោយសារគ្រោះរញ្ជួយដីនេះ។
ហេតុការណ៍ដ៏អាក្រក់នេះ ធ្លាប់បានកើតឡើងម្ដងកាលពីឆ្នាំ១៩៨៥ ដែលកាលនោះ គឺបានឆក់យកជីវិតមនុស្សជាង ១ម៉ឺននាក់ អាគារជាង ៣ម៉ឺនខ្នងបានរងការខូចខាតទាំងស្រុង និងអាគារជាង ៦៨០០០ខ្នងផ្សេងទៀត រងការខូចយ៉ាងដំណំ៕ ប្រភព BBC
ម៉ិកស៊ិក ៖ ក្រុមជួយសង្គ្រោះកំពុងកកាយរកសិស្សដែលនៅរស់ ក្រោយសាលារៀនបាក់រលំ
Share
Share
ព័ត៌មានទាក់ទង
