រយៈពេល៨ខែ ឆ្នាំ២០១៧ គឺចាប់ពីខែមករា ដល់ខែសីហា កម្ពុជាបាននាំចេញផលនេសាទជិត ១ម៉ឺនតោន ទទួលបានចំណូល ប្រមាណ ៣៣ម៉ឺនដុល្លារអាមេរិក។ នេះបើយោងតាមរបាយការណ៍របស់ក្រសួងកសិកម្ម រុក្ខាប្រមាញ់ និងនេសាទ ប្រចាំខែសីហា ឆ្នាំ២០១៧។
របាយការណ៍ដដែលនេះបានបញ្ជាក់ទៀតថា ក្នុងរយៈពេល ៨ខែនេះ ផលនេសាទនាំចេញបានចំនួន ៦ ៣៥០ តោន ស្មើនឹង ៤២,៣៣% កើនឡើងចំនួន ៥០តោន បើធៀបនឹងឆ្នាំ២០១៦ ខណៈផលនេសាទកែច្នៃបានចំនួន ៣៥៥០តោន ស្មើនឹង៧១ ភាគរយ កើនឡើងចំនួន ៥០តោន។
ក្រសួងបានឱ្យដឹងផងដែរថា សំណុំរឿងបទល្មើសជលផលមានចំនួន ៤៨៩ករណី ក្នុងនោះបទល្មើសទឹកសាប មានចំនួន៤៦៥ ករណី និងសមុទ្រមានចំនួន ២៤ករណី។
ចំពោះការងារបង្កបង្កើនផលស្រូវ ក្រសួងបានបញ្ជាក់ដែរថា គិតមកដល់ខែសីហា ឆ្នាំ២០១៧ ការបង្កបង្កើនផលស្រូវនៅរដូវវស្សា បានលើសពី ១០០ភាគរយ ។
របាយការណ៍ស្តីពីសភាពការណ៍កសិកម្ម រុក្ខាប្រម៉ាញ់ និងនេសាទ ប្រចាំខែសីហា ឆ្នាំ២០១៧ បានឱ្យដឹងបន្ដថា ដោយសារស្ថានភាពទឹកភ្លៀងបានធ្លាក់រាយប៉ាយតាមបណ្តាខេត្តនៅទូទាំងប្រទេស ការងារបង្កបង្កើនផលរដូវវស្សាសម្រេចបាន១០០,៨៨ ភាគរយលើផ្ទៃដីជាង ២លានហិចតា (២៥១៨ ៦៨៥ហិចតា) នៃផែនការ ២លាន ៤សែន ៩មឺុន ៦ពាន់ ៧៩០ហិចតា ។ ប៉ុន្តែស្ថាន ភាពទឹកជំនន់ទឹកភ្លៀង និងកម្ពស់ទន្លេមេគង្គបានធ្វើឱ្យបានប៉ះពាល់ និងខូចខាតលើដំណាំស្រូវតាមបណ្តាខេត្តមួយចំនួនផងដែរ។
ក្រសួងបានឱ្យដឹងទៀតថា ការប្រើប្រាស់គ្រឿងយន្តសម្រាប់ផលិតកម្មកសិកម្ម បានកើនឡើង ៩៣.៧៤ភាគរយ ខណៈការប្រើប្រាស់គោក្របីមានតែចំនួន ៦,២៦ភាគរយប៉ុណ្ណោះ។
ចំណែកឯការប្រមូលស្រូវស្រាលវិញ រហូតមកដល់ពេលនេះសម្រេចបាន២៥៣០៨៦ហិចតា លើផ្ទៃដីស្រូវស្រាលសរុប ៦សែន ៤ម៉ឺន ៩ពាន់ ២៥០ហិចតា ដោយទទួលបានទិន្នផលលើសឆ្នាំមុន។
ដោយឡែកដំណាំរួមផ្សំ និងដំណាំឧស្សាហកម្មការអនុវត្តបង្កបង្កើនផលបានធ្លាក់ចុះ បើធៀបនឹងកាលពីឆ្នាំមុន។រីឯការនាំវិញអង្ករវិញ ក្នុងខែសីហាឆ្នាំ២០១៦នេះ មានចំនួន ៥ម៉ឺន ៦ពាន់ ២៧៤តោន កើនឡើង ២ម៉ឺន ៨ពាន់ ៤៧៥តោន បើធៀបនឹងខែ សីហាកាលពីឆ្នាំ ២០១៦៕
