មហាសន្និបាតអង្គការសហប្រជាជាតិលើកទី ៧២ ដែលប្រព្រឹត្ដទៅនឹងទីក្រុងញ៉ូវយ៉កសហរដ្ឋអាមេរិកចាប់ផ្ដើមហើយនៅថ្ងៃនេះ ដោយមានប្រមុខរដ្ឋ ប្រមុខរដ្ឋាភិបាល និងរដ្ឋមន្រ្ដីការបរទេសមកពី ១៩៣ ប្រទេសចូលរួម។

ប្រធានបើកកិច្ច​ប្រជុំមហាសន្និបាតឆ្នាំ ២០១៧នេះ ដឹកនាំដោយលោកមេដឹកនាំ Miroslav Lajcak ហើយរបៀបវារៈ ផ្ដោតសំខាន់ការកាត់បន្ថយភាពអត់ឃ្លាននៅតំបន់ និងអំពើហិង្សានៅបណ្ដាប្រទេសមួយចំនួន។

យោងតាមគេហទំព័ររបស់អង្គការសហប្រជាជាតិ ក្រៅពីរបៀបវារៈខាងលើនេះ នៅមានរបៀបវារៈផ្សេងទៀតដែលលើកឡើងទាក់ទងនឹងការសាយភាពអាវុធនុយក្លេអ៊ែរប្រទេសកូរ៉េខាងជើង អំពើភេរវកម្មពិភពលោក និងការប្រែប្រួលអាកាសធាតុ។

អគ្គលេខាធិការអង្គការសហប្រជាជាតិ Antonio Guterres ក៏ត្រូវថ្លែងសុរន្ទកថា ដើម្បីកត់សម្គាល់នៃស្ថានការណ៍ផ្សេងៗរបស់ពិភពលោកផងដែរ។ចំណែកឯប្រធានាធិបតីសហរដ្ឋអាមេរិក ដូណាល់ត្រាំ ត្រូវគេរំពឹងថា ជាមេដឹកនាំពិភពលោកដែលថ្លែងសុរន្ទកថា គួរឱ្យចាប់អារម្មណ៍ជាងគេ ។

មហាសន្និបាតលើកទី ៧២នេះ មានតំណាងប្រទេស ១៩៣ ប្រទេស ចូលរួម ហើយប្រព្រឹត្តទៅពីថ្ងៃទី ១២ ទៅដល់ថ្ងៃទី ២៥ កញ្ញា ៕