ភ្នំពេញ៖ ក្លឹបអ្នកកាសែតកម្ពុជាបានសម្តែងការសោកស្តាយ ដែលកាសែត Cambodia Daily បានប្រកាសបិទទ្វារឈប់ដំណើរការផ្សាយចាប់ពីថ្ងៃនេះតទៅ ដោយអំពាវនាវដល់ម្ចាស់កាសែត រកវិធីសម្របសម្រួលជាមួយអគ្គនាយកដ្ឋានពន្ធដាដើម្បីរកដំណោះស្រាយសមស្របមួយដែលអាចអនុញ្ញាតឱ្យកាសែតនេះដំណើរការឡើងវិញ។
សេចក្តីប្រកាសព័ត៌មានរបស់ក្លឹមអ្នកកាសែតកម្ពុជានៅថ្ងៃទី០៤ កញ្ញានេះ បានកត់សម្គាល់ថា ការប្រកាសបិទទ្វារដោយខ្លួនឯងរបស់កាសែត Cambodia Dailyជាការបាត់បង់ប្រភពព័ត៌មានសម្រាប់អ្នកអានរបស់ខ្លួន។
ជាមួយគ្នានេះដែរ ក្លឹបអ្នកកាសែតកម្ពុជា សង្ឃឹមថា ស្ថាប័នសារព័ត៌មាននៅកម្ពុជាផ្សេងទៀត នៅតែបន្តការងាររបស់ខ្លួនស្របតាមវិជ្ជាជីវៈ និងការទទួលខុសត្រូវ ដើម្បីផ្តល់ព័ត៌មានដល់មហាជនទូទៅឱ្យបានទូលំទូលាយ ព្រមទាំងគោរពច្បាប់យកចិត្តទុកដាក់បំពេញកាតព្វកិច្ចផ្លូវច្បាប់ឱ្យបានត្រឹមត្រូវ ដើម្បីជៀសវាងការកើតមានបញ្ហាជាយហេតុណាមួយដោយការខ្វះចន្លោះ។
សូមបញ្ជាក់ថា កាសែតខេមបូឌាដេលី ដែលបានប្រតិបត្តិការផ្សាយព័ត៌មានរយៈពេល២៤ឆ្នាំនៅកម្ពុជា បានប្រកាសឈប់ដំណើរពីថ្ងៃទី ០៤ កញ្ញានេះ តទៅបន្ទាប់ពីអគ្គនាយកពន្ធដារប្រកាសថា បានជំពាក់ថ្លៃបង់ពន្ធចំនួនជាង៦លានដុល្លារ និងតម្រូវឱ្យបង់ពន្ធជូនរដ្ឋត្រឹមថ្ងៃទី០៤ កញ្ញានេះ៕
