រ៉ង់ហ្គូន ៖ អង្គការសហប្រជាជាតិ ទទួលបន្ទុក ជនភៀសខ្លួន បាននិយាយថា សហគមន៍ម៉ូស្លីមរ៉ូហ៊ីងយ៉ាភូមា បានរត់ភៀសខ្លួន ទៅកាន់ប្រទេសបង់ក្លាដេសរយៈពេល ៨ថ្ងៃនេះ បានកើនឡើងជិត ៦ម៉ឺននាក់។
អ្នកនាំពាក្យអង្គការសហប្រជាជាតិ ទទួលបន្ទុកជនភៀសខ្លួន លោកស្រី Vivian Tan បាននិយាយប្រាប់ទីភ្នាក់ងារសារព័ត៌មាន AFP ថា ករណីដែល សហគមន៍រ៉ូហ៊ីងយ៉ា រត់ភៀសខ្លួនដោយសារអំពើហិង្សានៅក្នុងសហគមន៍នៃរដ្ឋរ៉ាឃិន ប្រទេសភូមា បានផ្ទុះឡើងកាន់តែធ្ងន់ធ្ងរ។ សហគមន៍រ៉ូហ៊ីងយ៉ា បានអះអាងថា ផ្ទះសម្បែងរបស់ពួកគេជាង ៧០០ខ្នងត្រូវបានកងកម្លាំងយោធាភូមាចូលទៅដុតបំផ្លាញ ជាងនេះពួកយោធាបានចាប់រំលោភស្ដ្រីក្នុងសហគមន៍ យ៉ាងយោឃៅបំផុត។
រដ្ឋរ៉ាក់ឃីន ជាតំបន់ដ៏ក្រីក្របំផុតនៃប្រទេសភូមា ដែលពួករ៉ូហ៊ីងយ៉ា បានរត់ទៅជ្រកកោនរហូតដល់ជាង ១លាននាក់។ សហគមន៍នេះទទួលរងការធ្វើទុក្ខបុកម្នេញគ្រប់រូបភាពជាច្រើនទសវត្សរ៍ ព្រោះតែទំនាស់សាសនា និងការរើសអើងពីពលរដ្ឋម្ចាស់ប្រទេស។
សហគមន៍រ៉ូហីងយ៉ាង បានធ្លាក់ក្នុង ស្ថានភាពហិង្សា តាំងពីឆ្នាំ២០១២ ដោយជម្លោះ ដំបូង កើតចេញពីជម្លោះសាសនា និង ការរើសអើងជាតិសាសន៍។ សហគមន៍រ៉ូហីងយ៉ាង មានដើមកំណើតមកពីប្រទេសបង់ក្លាដេស និង ឥណ្ឌា ។ សហគមន៍ ហូរចូលភូមាតាមរយៈ អាណានិគមអង់គ្លេស ៕
