ភ្នំពេញ ៖ ប្រមុខរាជរដ្ឋាភិបាលកម្ពុជាសម្តេច ហ៊ុន សែន បានថ្លែងព្រមានធ្ងន់ៗ ដោយហាមគណបក្សសង្គ្រោះជាតិ កុំការពារលោក កឹម សុខា ប្រធានគណបក្សនេះ ដែលត្រូវបានចោទ ជាបុគ្គលក្បត់ជាតិនោះ ពុំនោះទេអាចធ្វើឲ្យបក្សប្រឈមនឹងការរំលាយចោល។
ការព្រមានរបស់សម្តេច ហ៊ុន សែន ធ្វើឡើងក្នុងពិធីជួបសំណេះសំណាលជាមួយតំណាងកម្មករ កម្មការិនី និយោជិតប្រមាណជា ៤ពាន់នាក់ នៅមជ្ឈមណ្ឌលសន្និបាត និងពិព័រណ៍កោះពេជ្រនៅព្រឹកថ្ងៃ អាទិត្យ ទី ៣ កញ្ញានេះ។ សម្តេច ហ៊ុន សែន បានថ្លែងថា ទោសក្បត់ជាតិ គឺជាទោសធ្ងន់ធ្ងរ ជាងទោសអ្វីៗទាំងអស់។
ជាមួយគ្នានេះដែរសម្តេច ហ៊ុន សែន ក៏បានអំពាវនាវ ដល់ប្រជាពលរដ្ឋឲ្យរក្សាភាពស្ងប់ស្ងាត់ទុកឲ្យតុលាការចាត់ការ ទៅតាមផ្លូវច្បាប់ចំពោះទង្វើក្បត់ជាតិរបស់លោក កឹម សុខា ព្រមទាំងអំពាវនាវប្រទេសអាមេរិក និងបណ្តាប្រទេសដទៃទៀតកុំឲ្យលូកដៃ ចូលអន្តរាគមន៍ក្នុងករណីរបស់លោក កឹម សុខា នេះ។
ប្រមុខរាជរដ្ឋាភិបាលកម្ពុជា ហ៊ុន សែន បានប្រកាសស្វែងរកជនបរទេសផ្សេងទៀត ដែលជាប់ពាក់ព័ន្ធនឹងផែនការក្បត់ជាតិជាមួយលោក កឹម សុខា ប្រធានគណបក្សសង្គ្រោះជាតិ ហើយសម្តេចក៏បានប្រកាសផងដែរថា អាមេរិកធ្លាប់ធ្វើ រឿងនេះជាមួយ លន់ ណុល ហើយលើកនេះអាមេរិក ក៏ធ្វើរឿងនេះជាមួយលោក កឹម សុខា។
លោក កឹម សុខា ត្រូវបានកម្លាំងសមត្ថកិច្ចចាប់ខ្លួននៅវេលាម៉ោងប្រមាណ ១២ ៖ ៣៥នាទីរំលងអាធ្រាត្រឈានចូលថ្ងៃទី០៣ ខែកញ្ញា ឆ្នាំ២០១៧ នៅគេហដ្ឋានរបស់លោកស្ថិតនៅក្នុងសង្កាត់បឹងកក់២ ខណ្ឌទួលគោក រាជធានីភ្នំពេញក្រោយពីមានការបែកធ្លាយវីដេអូក្លីបដែលរដ្ឋអំណាចចោទថា ក្បត់ជាតិបែបនេះ។ គេមិនដឹងថា លោក កឹម សុខា នឹងត្រូវឃុំខ្លួននៅ ឯណាទេ តែព័ត៌មានខ្លះបង្ហើបថា ត្រូវបានបញ្ជូនខ្លួនទៅឃុំនៅ គុកត្រពាំងថ្លុង ខេត្តត្បូងឃុំ៕
