ភ្នំពេញ៖ លោក កឹម សុខា ប្រធានគណបក្សសង្គ្រោះជាតិត្រូវបានកងកម្លាំងសមត្ថកិច្ចចាប់ខ្លួនក្រោមបទចោទ ឃុបឃិតជាមួយបរទេសរៀបផែនការផ្ដួលរំលំរាជរដ្ឋាភិបាលដែលដឹកនាំដោយគណបក្សប្រជាជនកម្ពុជា។ លោក កឹម សុខា ត្រូវបានចាប់ខ្លួននៅផ្ទះរបស់លោក នាវេលាម៉ោង ១២៖៣០នាទី ឈានចូលថ្ងៃទី០៣ ខែកញ្ញា នៅសង្កាត់បឹងកក់ ២ ខណ្ឌទួលគោករាជធានីភ្នំពេញ។
ការចាប់ខ្លួនប្រធានគណបក្សប្រឆាំងធំជាងគេនៅកម្ពុជា នេះ គឺបន្ទាប់ពីលោកបាននិយាយក្នុងវីដេអូក្លីបមួយរបស់បណ្ដាញផ្សាយព័ត៌មាន CBN ពីសកម្មភាពការងាររបស់លោក តាំងពីឆ្នាំ១៩៩៣មក ដែលបានទៅសិក្សាពីលទ្ធិប្រជាធិបតេយ្យជាច្រើនលើកច្រើនសារនៅសហរដ្ឋអាមេរិក និងទទួលបានការផ្ដល់យោបល់នានាពីប្រទេសមហាអំណាចមួយនេះ ដើម្បីយកមកអនុវត្ដន៍នៅកម្ពុជា។ ការនេះ ត្រូវបានរាជរដ្ឋាភិបាលអះអាងថា គឺជាអំពើក្បត់ជាតិ ដែលមានបំណង និងបានរៀបចំផែនការ ផ្ដួលរំលំរាជរដ្ឋាភិបាល រវាងលោក កឹម សុខា និងបក្សពួក ជាមួយបរទេស។
ការចាប់ខ្លួនមេដឹកនាំបក្សប្រឆាំងធំជាងគេនៅកម្ពុជានេះ គឺស្របពេលដែលរាជរដ្ឋាភិបាលបណ្ដេញអង្គការអន្ដរជាតិ NDI ចេញពីប្រទេសក្រោយមហេតុផល អង្គការនេះអនុវត្ដការងារដោយគ្មានការអនុញ្ញាតិ ហើយរំលងតែថ្ងៃទី០៣ កញ្ញា នេះមួយថ្ងៃទៀតប៉ុណ្ណោះ កាសែតអន្ដរជាតិ ខេមបូឌា ដេលី ដែលមានវ័យចំណាស់ជាងគេឈរជើងនៅលើទឹកដីកម្ពុជា តាំងពីឆ្នាំ១៩៩៣ មកនោះ ក៏នឹងត្រូវបិទ ហើយរឹបអូសទ្រព្យសម្បត្ដិផងដែរ ក្នុងករណីស្ថាប័នកាសែតមួយនេះ មិនអាចបង់ពន្ធសងរដ្ឋនូវទំហំទឹកប្រាក់ ៦លាន ៣សែនដុល្លារ។
ការចាប់ខ្លួនលោក កឹម សុខា គណបក្សនេះសង្គ្រោះជាតិបានចេញសេចក្ដីថ្លែងការណ៍ថ្កោលទោស ហើយចាត់ទុកថា ការចាប់ខ្លួនមេដឹកនាំបក្ស គឺស្ថិតក្រោមផលនយោបាយខណៈការបោះឆ្នោតសភានីតិកាលទី០៦ នាខែកក្កដា ឆ្នាំ២០១៨ នឹងឈានចូលមកដល់ក្នុងពេលដ៏ខ្លីខាងមុខនេះ។ គណបក្សនេះក៏បានទាមទារឲ្យមានការដោះលែងលោក កឹម សុខា ជាបន្ទាន់ដោយគ្មានលក្ខខណ្ឌអ្វីទាំងអស់៕