ភ្នំពេញ៖ នៅថ្ងៃទី០១ កញ្ញានេះ នៅតាមការិយាល័យនីមួយៗ បានចាប់ផ្តើមដំណើរការចុះឈ្មោះបោះឆ្នោត ដើម្បី ធ្វើបច្ចុប្បន្នភាពបញ្ជីឈ្មោះបោះឆ្នោត បម្រើឱ្យការបោះឆ្នោតជ្រើរើសតំណាងរាស្រ្តឆ្នាំ២០១៨ តែមិនសូវមានពលរដ្ឋទៅចុះឈ្មោះផុសផុលនោះទេ។ តំណាងគណបក្សប្រឆាំង បានស្នើឱ្យសម្រួលដល់ការធ្វើលិខិតបញ្ជាក់លំនៅដើម្បី បង្កភាពងាយស្រួលដល់អ្នកឈ្មោះបោះឆ្នោត។
ខណៈដែលការចុះបោះឆ្នោត ឆ្នាំ២០១៧ កំពុងដំណើរការពីថ្ងៃទី០១ កញ្ញានេះ គណបក្សសង្រ្គោះជាតិបានស្នើឱ្យក្រសួងមហាផ្ទៃ និងគណៈកម្មាធិការជាតិរៀបចំការបោះឆ្នោត កែសម្រួលប្រកាសមួយ របស់ក្រសួងមហាផ្ទៃដែលកំណត់រយៈពេលនៃការចេញលិខិតបញ្ជាក់ទីលំនៅ ដើម្បីសម្រួលដល់ការចុះឈ្មោះបោះឆ្នោតរបស់ពលរដ្ឋ។
លោកស្រី ម៉េង សុភារី ប្រធាននាយកដ្ឋានកិច្ចការបោះឆ្នោត និងនីតិកម្ម នៃគណបក្សសង្រ្គោះជាតិ បានថ្លែងដូចនេះនៅក្នុងកិច្ចប្រជុំជាមួយភាគីពាក់ព័ន្ធអំពីការធ្វើបច្ចុប្បន្នភាពបញ្ជីឈ្មោះបោះឆ្នោត និងការចុះឈ្មោះបោះឆ្នោតឆ្នាំ២០១៧ នៅថ្ងៃនេះ ។
ក្នុងកម្មវិធីនេះលោកស្រីបានបញ្ជាក់ថា ប្រកាស របស់ក្រសួងមហាផ្ទៃ ចេញកាលពីថ្ងៃទី១៤ សីហា បានប្រកាសកែប្រែបែបបទ និងនីតិវិធីក្នុងចេញលិខិតបញ្ជាក់ទីលំនៅ ដោយកំណត់រយៈពេល៣០ថ្ងៃទើបប្រជាពលរដ្ឋទទួលបានលិខិតបញ្ជាក់ទីលំនៅ ពីប៉ុស្តិ៍នគរបាល ខណៈដែលប្រកាសចាស់ ការបញ្ជាក់ទីលំនៅមិនបានកំណត់ពេលវេលារយៈឡើយ។
លោកស្រីសង្កត់ធ្ងន់ថា ការកែប្រែចុងក្រោយនេះ មិនបានជួយសម្រួលដល់ពលរដ្ឋនោះទេ មិនតែប៉ុណ្ណោះបានប៉ះពាល់ដល់សិទ្ធិរបស់ពលរដ្ឋក្នុងការចុះឈ្មោះបោះឆ្នោតថែមទៀតផង។
ការចុះឈ្មោះបោះឆ្នោត មានរយៈ ៧០ ថ្ងៃ គឺចាប់ពីថ្ងៃ០១ ខែកញ្ញា ដល់ថ្ងៃទី០៩ ខែវិច្ឆិកា ឆ្នាំ២០១៧ នៅតាមសាលាឃុំ សង្កាត់ និងនៅតាមភូមិមួយចំនួនក្នុងឃុំសង្កាត់ទូទាំងប្រទេស ដែលបើកធ្វើរៀងរាល់ថ្ងៃ គិតទាំងថ្ងៃសៅរិ៍ អាទិត្យ។
ទាក់ទិននឹងសំណើរបស់តំណាងគណបក្សសង្រ្គោះជាតិនេះ លោក គួយ ប៊ុនរឿន អនុប្រធានគ.ជ.ប មានប្រសាសន៍ ការកំណត់របស់ក្រសួងមហាផ្ទៃពិតជាប៉ះពាល់ដល់ការចុះឈ្មោះរបស់ប្រជាពលរដ្ឋ។ តែបែបក្តីនេះ លោកបញ្ជាក់ថាបន្ទាប់ពី គ.ជ.បបានបញ្ជូនតំណាងម្នាក់ទៅពិភាក្សាជាមួយក្រសួងមហាផ្ទៃ គឺក្រសួងមហាផ្ទៃមានហេតុផល និងមូលដ្ឋានច្បាប់គតិយុទ្ធមួយចំនួនដែលកំពុងនៅជាធរមានក្នុងការគ្រប់គ្រងប្រជាពលរដ្ឋ។
គ.ជ.បបានអំពាវនាវឱ្យពលរដ្ឋ ដែលគ្រប់អាយុបោះឆ្នោត ហើយមិនទាន់បានចុះឈ្មោះបោះ ជាពិសេស ពលរដ្ឋកំពុងបំពេញបេសកកម្ម ធ្វើការ ឬសិក្សានៅក្រៅប្រទេសប្រញ៉ប់រួសរាន់ ត្រឡប់មកប្រទេសកម្ពុជា ដើម្បីចុះឈ្មោះបោះឆ្នោត ឆ្នាំ២០១៧ ឱ្យបានទាន់ពេលវេលាតាមកាលបរិច្ឆេទដែលបានកំណត់ ដើម្បីទទួលបានសិទ្ធិពេញលេញ ក្នុងការចូលរួមបោះឆ្នោតជ្រើសតាំងតំណាងរាស្រ្ត នីតិកាលទី៦ នៃរដ្ឋសភា នាពេលខាងមុខនេះ។
សូមជម្រាប គ.ជ.ប បានប៉ាន់ស្មាននូវចំនួនប្រជាពលរដ្ឋកម្ពុជាសរុបទាំងអស់ មានចំនួនជិត១៦លាននាក់ (១៥,៨៨៣,២៥០នាក់)។ក្នុងនោះមានប្រជាពលរដ្ឋដែលមានអាយុ១៨ឆ្នាំឡើង មានចំនួនជិត១០លាននាក់( ៩,៧៨៨,២៣៩នាក់) ប៉ុន្តែប្រជាពលរដ្ឋដែលបានចុះឈ្មោះបោះឆ្នោត កាលពីឆ្នាំ២០១៦ មានចំនួនជិត៨លាននាក់ ( ៧,៨៦៥,០៣៣នាក់) និងប្រជាពលរដ្ឋដែលត្រូវចុះឈ្មោះបោះឆ្នោតថ្មី ឆ្នាំ២០១៧នេះ មានចំនួនជាងមួយលាន ៤សែននាក់ ( ១,៤១២,១៤៩នាក់)។
ដោយឡែក ពលករ កម្មសិក្សាការីកម្ពុជា រួមនឹងពលរដ្ឋផ្សេងទៀត ដែលចេញទៅបម្រើការងារនៅក្រៅប្រទេសមានចំនួន ជាងមួយលាននាក់(១,០៥០,០០០នាក់) ក្នុងនោះនៅប្រទេសថៃមានចំនួនច្រើនជាងគេ៕
អត្ថបទ៖ កញ្ញា ឆេង ណាតា
