ប្រទេសឥណ្ឌូនេស៊ីបានបញ្ជូនទាហានជាង 1.000 នាក់ទៅកាន់កោះស៊ូម៉ាត្រាភាគខាងត្បូងកាលពីថ្ងៃព្រហស្បតិ៍ ទី10 ខែកញ្ញា នេះ ដើម្បីពន្លត់ភ្លើងដែលកំពុងតែបន្តឆេះព្រៃយ៉ាងសន្ធរសន្ធៅ ។ ទាហានបានចាកចេញពីមូលដ្ឋានអាកាសនៅទីក្រុងហ្សាការតាកាលពីព្រឹកថ្ងៃព្រហស្បតិ៍នេះ។ នេះបើយោងតាម សារព័ត៌មាន Channel News Asia។
ប៉ូលីសឥណ្ឌូនេស៊ីបានអះអាងថា ចំណុចភ្លើងឆេះព្រៃនៅកោះស៊ូម៉ាត្រាភាគខាងត្បូងមានចំនួន 14កន្លែង ហើយអាជ្ញាធរបាននិយាយថា ភាគច្រើនកន្លែងដែលមានភ្លើងឆេះទាងនោះ ជាកម្មសិទ្ធិរបស់ក្រុមហ៊ុនចម្ការកៅស៊ូ ហើយមួយចំនួនទៀតគឺឆេះនៅក្នុងឧទ្យានជាតិរបស់ខេត្តស៊ូម៉ាត្រា។
រដ្ឋមន្ត្រីក្រសួងបរិស្ថាននិងព្រៃឈើរបស់ប្រទេសនេះ គឺអ្នកស្រី Siti Nurbaya Bakar បានថ្លែងកាលពីថ្ងៃអង្គារថា អាជ្ញាធរបានកំណត់ទីតាំងមានភ្លើងឆេះនោះហើយ ហើយគេនឹងអាចពន្លត់វាបាន ។
លោកប្រធានាធិបតី Joko Widodo ចង់ឱ្យក្រុមហ៊ុនចម្ការកៅស៊ូមានការទទួលខុសត្រូវ ចំពោះហេតុការណ៍ភ្លើងឆេះនៅក្នុងដីសម្បទាន ។ ប៉ុន្តែវាមានការលំបាកក្នុងការកាត់ទោសជនល្មើស ទោះបីជាគេបានដឹងថា នរណាជាអ្នកបង្កអគ្គិភ័យនោះក៏ដោយ អ្នកទាំងនោះភាគច្រើន ជាសែស្រឡាយរដ្ឋាភិបាលប្រទេសនេះ។
កងកម្លាំងភ្នាក់ងារចម្រុះ ដែលរួមមានទាំងប៉ូលីស ទាំងយោធាកំពុងព្យាយាមប្រយុទ្ធប្រឆាំងនឹងភ្លើងឆេះព្រៃ ។ ខណៈនេះនៅកោះស៊ូម៉ាត្រានិង ខេត្តកាលីម៉ាន់តាន់មាន អ័ព្ទដ៏ក្រាស់។ អ័ព្ទនេះបានប៉ះពាល់ដល់បណ្តាខេត្តនៅភាគខាងត្បូងកោះស៊ូម៉ាត្រា Jambi និងតំបន់ Riau ពិសេសបានបង្ខំឱ្យសាលារៀន និងព្រលានយន្តហោះឥណ្ឌូនេស៊ី មួយចំនួនត្រូវបិទទ្វារមួយរយៈផងដែរ។
អ្វីដែលកាន់តែធ្ងន់ធ្ងរនោះ ការឆាបឆេះបានបណ្តាលឲ្យមានផ្សែង ហើយផ្សែងទាំងនោះបានរសាត់ទៅដល់ប្រទេសជិតខាងឥណ្ឌូនេស៊ី បង្កជាអព្ទ័ពេញលំហមេឃនៅប្រទេសសិង្ហបុរី និងម៉ាឡេស៊ី ធ្វើឲ្យគុណភាពខ្យល់នៅទីនោះកាន់តែយ៉ាប់យ៉ឺន ។
អ្វីដែលគួរកត់សម្គាល់នោះ អាស៊ាន បានបង្កើតឲ្យមានកិច្ចព្រមព្រៀង ស្តីការបំពុលអ័ព្ទដើម្បីទប់ស្កាត់ការកើតមានបញ្ហានេះ ដែលទើបតែចូលជាធរមាន។ ពាក់ព័ន្ធភ្លើងឆេះព្រៃ និងផ្សែងអ័ព្ទនេះដែរ ប្រទេសឥណ្ឌូនេស៊ីបានផ្តល់សច្ចាប័នលើកិច្ចព្រមព្រៀងអាស៊ានលើការបំពុលអ័ព្ទឆ្លងព្រំដែនកាលពីខែធ្នូចុងឆ្នាំមុន៕