en     km
en     km

តើ​ការ​និយាយ​ពី​បញ្ហា​ព្រំដែន​ ជា​ការ​ប៉ែង​ជើង​គ្នា​ដើម្បី​ផលប្រយោជន៍​នយោបាយ​ឬ​?

Share

ភ្នំពេញ៖ ក្រោយ​ការ​ផ្ទៀងផ្ទាត់​ផែនទី​របស់​រដ្ឋាភិបាល​ ជាមួយ​ផែនទី​ខ្ចី​មក​ពី​អង្គការសហប្រជាជាតិ​ និង​ជាមួយ​ផែនទី​ខ្ចី​មក​ពី​ប្រទេស​បារាំង​ មន្ត្រី​ជំនាញ​ព្រំដែន​ និង​មន្ត្រី​រដ្ឋាភិបាល​សុទ្ធតែ​បាន​ប្រកាស​ថា​ ផែនទី​ទាំងនោះ​ដូច​គ្នា​ ។​ ផ្អែក​លើ​ការ​ប្រកាស​នោះ​ លោកនាយក​រដ្ឋមន្ត្រី​បាន​ហាមប្រាម​មិន​ឲ្យ​មានការ​ចោទប្រកាន់​ថា​ រដ្ឋាភិបាល​ប្រើប្រាស់​ផែនទី​ក្លែងក្លាយ​ ឬ​ផែនទី​ចោរ​ ក្នុង​ការ​បោះបង្គោល​ព្រំដែន​ជាមួយ​វៀតណាម​ ។​ ជាមួយ​គ្នា​ មន្ត្រី​រដ្ឋាភិបាល​បាន​ចោទប្រកាន់​លើ​បក្ស​ប្រឆាំង​ថា​ លើកយក​បញ្ហា​ផែនទី​ និង​បញ្ហា​ព្រំដែន​មក​និយាយ​ គឺជា​ការ​កេង​ចំណេញ​នយោបាយ​ ។​ តើ​អ្នកវិភាគ​យល់​យ៉ាងណា​ជុំវិញ​បញ្ហា​នេះ​?

សម្លេង៖
​មួយ​រយៈ​ចុង​ក្រោយ​នេះ​ មន្ត្រី​រដ្ឋាភិបាល​បាន​និយាយ​ដោយ​ចំៗ​ថា​ បក្ស​ប្រឆាំង​បាន​លើកយក​បញ្ហា​ផែនទី​ និង​ព្រំដែន​មក​និយាយ​ ដើម្បី​ជា​ការ​កេង​ចំណេញ​នយោបាយ​ ។​
150907-dara-annalist-01
រដ្ឋមន្ត្រី​ក្រសួងការបរទេស​កម្ពុជា​ លោក​ហោ​ ណាំ​ហុង​ និង​ប្រធាន​គណៈកម្មាធិការ​ព្រំដែន​កម្ពុជា​ លោក​វ៉ា​ គឹ​ម​ហុង​ សុទ្ធតែ​បាន​និយាយ​បែប​នេះ​ នៅ​ក្រោយ​ពេល​ទទួល​ និង​ពិនិត្យ​ផ្ទៀងផ្ទាត់​ផែនទី​ខ្ចី​មក​ពី​អង្គការសហប្រជាជាតិ​ ក៏​ដូច​ជា​នៅ​ថ្ងៃ​ប្រគល់​ផែនទី​នោះ​ទៅ​ឲ្យ​មន្ត្រី​អង្គការសហប្រជាជាតិ​វិញ​ជាដើម​ ។​
ក្រោយ​ការ​ផ្ទៀងផ្ទាត់​ផែនទី​នោះ​ លោកនាយក​រដ្ឋមន្ត្រី​បាន​ប្រកាស​ឈប់​ឲ្យ​មានការ​ចោទប្រកាន់​ថា​ រដ្ឋាភិបាល​បាន​ប្រើប្រាស់​ផែនទី​ក្លែងក្លាយ​ ឬ​ផែនទី​ចោរ​បន្ត​ទៀត​ មិន​ដូច្នោះ​នឹង​មិន​មានការ​លើកលែងទោស​ឡើយ​ ។​
​យ៉ាងនេះ​ក្ដី​ មន្ត្រី​បក្ស​ប្រឆាំង​នៅ​តែ​អះអាង​ថា​ ការ​លើកយក​បញ្ហា​ព្រំដែន​មក​និយាយ​ គឺ​ដើម្បី​ការពារ​ផលប្រយោជន៍​ជាតិ​ ។​
​តើ​ការ​លើកយក​បញ្ហា​ព្រំដែន​មក​និយាយ​ ជា​ការ​ប៉ែង​ជើង​គ្នា​ដើម្បី​ផលប្រយោជន៍​នយោបាយ​មែនឬ​?
អ្នក​ស្រាវជ្រាវ​ពី​ការ​អភិវឌ្ឍ​សង្គម​ លោក​មាស​ នី​ មាន​ប្រសាសន៍​ថា​ តាម​ការ​សង្កេត​នា​ពេល​កន្លង​មក​ គណបក្សកាន់អំណាច​ តែងតែ​ព្យាយាម​បិទ​បាំង​ការ​ដោះស្រាយ​បញ្ហា​ព្រំដែន​ជាមួយ​ប្រទេស​ជិតខាង​ មិន​ចង់​ឲ្យ​ពលរដ្ឋ​បានដឹង​អំពី​ព័ត៌មាន​ផ្សេងៗ​ទាក់ទង​នឹង​ព្រំដែន​ ។​ លោក​បន្ត​ថា​ ដោយសារ​ការ​បិទ​បាំង​នោះ​ហើយ​ ទើប​ធ្វើ​ឲ្យ​បញ្ហា​ព្រំដែន​ក្លាយជា​ចំណុចរសើប​ ព្រោះ​វា​ជា​អ្វី​ដែល​ពលរដ្ឋ​ចង់​ដឹង​ ។​
លោក​មាស​ នី​ បន្ថែម​ថា​ ទោះបីជា​ពេល​ខ្លះ​ មានការ​បំភ្លឺ​រឿង​ព្រំដែន​ម្ដងម្កាល​ក្ដី​ ក៏​មិន​បាន​បើក​ឲ្យ​មានការ​សួរ​ដេញដោល​អ្វី​នោះ​ដែរ​ ម្យ៉ាងទៀត​ ឱកាស​នៃ​ការ​បំភ្លឺ​នោះ​ មាន​មក​តែ​ពី​ភាគី​ម្ខាង​ ឯ​ភាគី​ម្ខាង​ទៀត​មិន​បាន​បញ្ចេញ​មតិយោបល់​អ្វី​ ក្រៅពី​អង្គុយ​ស្ដាប់​នោះ​ឡើយ​ ។​ លោក​បន្ត​ថា​ ក្រៅពី​ការ​បិទ​មិន​ឲ្យ​ភាគី​ម្ខាង​ទៀត​និយាយ​ពី​រឿង​ព្រំដែន​នោះ​ ក៏​មានការ​គំរាម​ចាប់ចង​ផង​ដែរ​ «​មិនដឹង​ថា​ តើ​រឿង​ព្រំដែន​ហ្នឹង​វា​មាន​ស៊ីជម្រៅ​ប៉ុនណា​ បានជា​នៅ​ពេល​មានការ​ជជែក​គ្នា​ពី​រឿង​ព្រំដែន​ តែងតែ​មានការ​ចាប់ចង​ មាន​អ្នក​ដែល​ត្រូវ​បាន​ជាប់គុក​ដោយសារ​រឿង​ព្រំដែន​ ។​ ជា​ធម្មតា​ ស្ថានភាព​រឿង​ព្រំដែន​ បើសិនជា​រដ្ឋាភិបាល​មាន​សុទ្ធចិត្ត​គ្រប់គ្រាន់​ក្នុង​ការ​ដោះស្រាយ​ វា​មិន​គួរ​មានអី​ដល់​ទៅ​រឿង​វិវាទ​រវាង​វៀតណាម​ ហើយ​និង​ខ្មែរ​នៅ​ព្រំដែន​សោះ​ ហេតុ​អី​ខ្មែរ​ត្រូវ​ទៅ​ជាប់គុក​ដោយសារ​រឿង​អស់ហ្នឹង​ដែរ​ ដោយសារ​តែ​ការ​ទាមទារ​ ការ​និយាយ​ទាំងអស់​ហ្នឹង​»​។​
​ចំណែកឯ​សាស្ត្រាចារ្យ​វិទ្យាសាស្ត្រ​នយោបាយ​ លោក​សូ​ ច​ន្ថា​ មាន​ប្រសាសន៍​ថា​ បញ្ហា​ព្រំដែន​ជា​បញ្ហា​រួម​របស់​ជាតិ​ទាំងមូល​ មិនមែន​ជា​របស់​បុគ្គល​ណា​ម្នាក់​ ឬ​របស់​គណបក្ស​នយោបាយ​ណាមួយ​នោះ​ឡើយ​ ។​
លោក​សូ​ ច​ន្ថា​ បន្ថែម​ថា​ ការ​ចោទប្រកាន់​អ្នក​លើកយក​បញ្ហា​ព្រំដែន​មក​និយាយ​ ថា​ជា​ការ​កេង​ចំណេញ​នយោបាយ​នោះ​ គឺជា​ការ​ដាក់បន្ទុក​ទៅ​លើ​គណបក្ស​ផ្សេង​ ហើយ​ទុក​ឱកាស​ឲ្យ​ខ្លួនឯង​ឆ្លៀត​កេង​ចំណេញ​លើ​រឿង​នេះ​ «​ការ​ពិត​បញ្ហា​ព្រំដែន​ជា​បញ្ហា​រួម​ បញ្ហា​របស់​ជាតិ​ទាំងអស់​គ្នា​ មិនមែន​ជា​របស់​គណបក្ស​ណាមួយ​ផ្ដាច់មុខ​ទេ​ ។​ ក៏​ប៉ុន្តែ​ការ​លើក​ឡើង​បែប​នេះ​ ជា​ការ​ឆ្លុះ​បញ្ចាំង​ថា​ អ្វី​ដែល​ជា​ការ​លើក​ឡើង​របស់​គណបក្សកាន់អំណាច​ មន្ត្រី​ធំៗ​ហ្នឹង​ គឺជា​ការ​ឆ្លៀត​កេង​ចំណេញ​នយោបាយ​ ហើយ​ជា​ការ​ដាក់បន្ទុក​ទៅ​លើ​គណបក្ស​ផ្សេង​ ក្រៅពី​គណបក្ស​ដឹកនាំ​ប្រទេស​ហ្នឹង​ ។​ ឥរិយាបថ​បែប​ហ្នឹង​ យើង​តែងតែ​សង្កេត​ឃើញ​នៅ​ប្រទេស​កម្ពុជា​ហ្នឹង​ មាន​ន័យ​ថា​ អ្នកនយោបាយ​នៅ​ប្រទេស​កម្ពុជា​ មិន​ទាន់​មាន​វប្បធម៌​នយោបាយ​ប្រជាធិបតេយ្យ​ ដោយ​ហ៊ាន​ទទួលយក​ការ​ពិត​ទេ​បាទ​»​។​
យោង​តាម​អ្នកវិភាគ​ទាំង​ពីរ​ឃើញ​ថា​ បញ្ហា​ព្រំដែន​ជា​បញ្ហា​របស់​ជាតិ​ មិន​គួរ​មានការ​លាក់បាំង​ក្នុង​ការ​ដោះស្រាយ​រឿង​ព្រំដែន​នោះ​ទេ​ ។​ បើ​តាម​លោក​មាស​ នី​ ពលរដ្ឋ​មាន​សិទ្ធិ​ទទួល​បាន​ព័ត៌មាន​ក្នុង​រឿង​ព្រំដែន​នេះ​ ។​ បើ​តាម​លោក​សូ​ ច​ន្ថា​វិញ​ឃើញ​ថា​ ការ​លាក់បាំង​ព័ត៌មាន​ពី​រឿង​ព្រំដែន​ ជា​កញ្ចក់​ឆ្លុះ​ឲ្យ​ឃើញ​ថា​ អ្នកនយោបាយ​ខ្មែរ​គ្មាន​វប្បធម៌​នយោបាយ​ប្រជាធិបតេយ្យ​ឡើយ​ ៕

Share

Image
Image
Image