ដើមឈើធំៗ សត្វព្រៃ ប្រាសាទបុរាណ ភូមិបុរាណ គឺជាសក្តានុពលដ៏សំខាន់របស់ព្រៃសង្ឃវ័ន្ត ដែលអាចទាក់ទាញភ្ញៀវទេសចរមកកម្សាន្ត ជាពិសេសគឺភ្ញៀវអន្តរជាតិ។ ព្រះមេគណខេត្តឧត្តរមានជ័យ ព្រះតេជគុណ ប៊ុន សាលួត ដែលជាអ្នកគ្រប់គ្រងព្រៃសង្ឃវ័ន្ត នេះ មានសង្ឃដីកាថា ផែនការបង្កើតតំបន់អេកូទេសចរណ៍នេះ មិនត្រឹមតែជួយការពារព្រៃនេះមិនឱ្យជនឆ្លៀតឱកាសយាយីកាប់បំផ្លាញប៉ុណ្ណោះទេ វាក៏អាចបង្កើតការងារ បន្ថយការចំណាកស្រុករបស់ប្រជាពលរដ្ឋនៅទីនោះ ទៅធ្វើការនៅក្រៅប្រទេសផងដែរ។
គ្រងស្បង់ចីវរលឿងទុំ គង់លើរនាបក្តារ ក្នុងសាលាឆទាន ដែលសង់ក្បែរដើមឈើធំៗ ខ្ពស់ញឹកក្រាស់ល្អ ស្ថិតនៅភូមិឈូកមាស សង្កាត់កូនក្រៀល ក្រុងសំរោង ខេត្តឧត្តរមានជ័យ ព្រះមេគុណខេត្តឧត្តរមានជ័យអង្គនេះ មានសង្ឃដីកាឱ្យដឹងថា ដើម្បីប្រែក្លាយព្រៃដ៏ធំល្វឹងល្វើយនេះ ទៅជាតំបន់ទេសចរណ៍ ព្រះអង្គមានផែនការធ្វើសួនសត្វធម្មជាតិ ធ្វើអាងទឹកជុំវិញ និងផ្ទះសម្រាប់ភ្ញៀវទេសចរណ៍ស្នាក់អាស្រ័យ ឬហៅថាHome stay។ ព្រះតេជគុណបន្ថែមថា លោកនឹងចាប់ផ្តើមស្វែងរកជំនួយពីម្ចាស់ជំនួយផ្សេងៗ ក៏ដូចជាប្រជាពលរដ្ឋនៅសហរដ្ឋអាមេរិក នៅប្រទេសបារាំង ដើម្បីបានថវិកាអភិវឌ្ឍន៍ផ្លូវចូលទៅក្នុងព្រៃនោះ ។
ព្រះអង្គជឿជាក់ថា គម្រោងប្រែក្លាយព្រៃសហគមន៍ ដែលពោរពេញទៅដោយដើមឈើធំៗ និងសម្បូរទៅដោយសត្វព្រៃច្រើនប្រភេទនេះ បើក្លាយទៅជាតំបន់ទេសចរណ៍ នឹងទទួលបានជោគជ័យ ដែលអាចទាក់ទាញភ្ញៀវទេសចរមកកម្សាន្តបានច្រើន ព្រោះថា នាពេលបច្ចុប្បន្ននេះ មិនទាន់ទាំងបង្កើតតំបន់ទេសចរណ៍ផង មានភ្ញៀវទេសចរអន្តរជាតិ មិនតិចជាង៣០ប្រទេសនោះទេ ដែលបានទស្សនាព្រៃនេះ។
ព្រះអង្គមានថេរៈដីកាឱ្យដឹងបន្ថែមទៀតថា គម្រោងបង្កើតតំបន់អេកូរទេសចរណ៍នេះ នឹងអាចកាត់បន្ថយការចំណាកស្រុក និងលើកស្ទួយជីវភាពរបស់ប្រជាជនដែលរស់នៅទីនោះ ដោយពួកគាត់អាចប្រមូលអនុផលព្រៃឈើមកកែច្នៃ ធ្វើជាវត្ថុអនុស្សារីយ៍ ដើម្បីដាក់លក់ឱ្យភ្ញៀវដែលមកកម្សាន្ត។ ព្រះអង្គបន្ថែមថា លើសពីនេះទៅទៀត អ្នកមានម៉ូតូ រទេះគោ អាចបង្កើតជាមុខរបរ ដឹកភ្ញៀវទេសចរណ៍ផងដែរ។
ខណៈនេះ គម្រោងប្រែក្លាយព្រៃសហគមន៍សង្ឃវ័ន្តទៅជាតំបន់អេកូទេសចរណ៍ បានទទួលការគាំទ្រយ៉ាងច្រើនពីប្រជាពលរដ្ឋនៅតំបន់នោះ។ មានសំនៀងរដឺន អង្គុយលើអង្រឹងចងក្រោមដើមឈើធំៗ ក្នុងព្រៃសង្ឃវ័ន្តនេះ អ្នកស្រី សុភាព បានបង្ហាញអារម្មណ៍រីករាយនៅពេលដឹងថា មានគម្រោងប្រែក្លាយព្រៃនេះទៅជាតំបន់ទេសចរណ៍។ អ្នកស្រីរៀបរាប់ថា នៅពេលព្រៃសហគមន៍នេះ ក្លាយជាតំបន់អេកូរទេសចរណ៍ វានឹងអាចការពារព្រៃនេះឱ្យជៀសផុតពីការប៉ុនប៉ងកាប់បំផ្លាញពីជនខិលខូច ឬអ្នកមានអំណាចមួយចំនួន ដើម្បីបន្សល់ទុកឱ្យកូនចៅជំនាន់បានឃើញ។ អ្នកស្រីបន្តថា លើសពីនេះទៀត វាក៏នឹងធ្វើឱ្យជីវភាពរបស់អ្នកស្រី ក៏ដូចជាប្រជាជនផ្សេងៗ កាន់តែប្រសើរជាងមុនផងដែរ។
អ្នកស្រីប្រាប់បន្តថា ប្រសិនចូលទៅដល់ព្រៃជ្រៅ ទេសភាពកាន់តែស្រស់ស្អាត ដូច្នេះវានឹងអាចទាក់ទាញភ្ញៀវទេសចរណ៍ឱ្យទស្សនាបានច្រើនជាក់ជាមិនខាន។
ប្រជាសហគមន៍នេះម្នាក់ទៀត គឺលោក ពឿន មានវ័យ២៥ឆ្នាំ ក៏បានបង្ហាញការគាំទ្រចំពោះគម្រោងបង្កើតតំបន់ទេសចរណ៍នេះផងដែរ។ លោកនិយាយថា សព្វថ្ងៃនេះប្រជាពលរដ្ឋស្ទើរពាក់កណ្តាលភូមិពឹងអាស្រ័យទៅលើព្រៃ តាមរយៈការជៀរជ័រចុង បេះផ្សិត និងរកអនុផលផ្សេងៗ ហើយបើបង្កើតទៅជាតំបន់អេកូទេសចរណ៍ទៅទៀតនោះ វានឹងបង្កើតការងារបានជាច្រើនទៀតសម្រាប់ពួកគេ។
ទោះបីជាព្រៃនេះ មានទេសភាពស្រស់ស្អាត មានសត្វព្រៃគ្រប់ប្រភេទ មានប្រាសាទបុរាណ ស្រែបុរាណ ជាធានធានសំខាន់ក្នុងការអន្ទងចិត្តភ្ញៀវទេសចរឱ្យមកទស្សនាក៏ដោយ ក៏ប៉ុន្តែព្រៃដ៏ធំនេះក៏សម្បូរទៅដោយគ្រាប់មីន និងគ្រាប់មិនទាន់ផ្ទុះ ដោយសារតំបន់នេះ ជាតំបន់ខ័ណ្ឌចែករវាងទ័ពខ្មែរក្រហម និងកងទ័ពសាធារណៈរដ្ឋកម្ពុជា។
ព្រះគុណប៊ុន សាលួត មានសង្ឃដីកាថា ប៉ុន្មានឆ្នាំចុងក្រោយនេះ គ្រាប់មីនមិនតិចជាង១០០គ្រាប់ទេ ដែលបានដោះ។ ព្រះអង្គបន្តថា លោកក៏នឹងមានគម្រោងសហការជាមួយអង្គការហេឡូត្រាក់ ដើម្បីដោះមីនឱ្យអស់ពីព្រៃនេះផងដែរ។
សូមបញ្ជាក់ថា ព្រៃសហគមន៍សង្ឃវ័ន្តមានចម្ងាយប្រមាណ៤២គីឡូម៉ែត្រ ពីទីរួមខេត្តឧត្តរមានជ័យ ស្ថិតក្នុងតំបន់អូផាល ភូមិឈូកមាស សង្កាត់កូលក្រៀល ក្រុងសំរោង ខេត្តឧត្តរមានជ័យ។ ព្រៃនេះមានទំហំមួយម៉ឺនប្រាំបីពាន់ពីរយហុកសិបមួយហិកតា(១៨២៦១)។
