en     km
en     km

កុមា​រា​អាយុ​១២​ឆ្នាំ ​លក់​កម្លាំង​ពលកម្ម​ធ្វើ​អ្នកនេសាទ​តាម​ទូក​ដើម្បី​គ្រួសារ​

Share

កុមារ​គ្រប់​រូប​តែងតែ​ត្រូវការ​ការ​អប់រំ​ ការ​កម្សាន្ត​ ការ​ស្លៀកពាក់​សមរម្យ​ និង​ចំណីអាហារ​គ្រប់គ្រាន់​ ដើម្បី​បំពេញ​ដល់​ការ​លូតលាស់​របស់​ពួក​គេ​ ។​ ផ្ទុយ​ពី​កុមារ​ដទៃ​ កុមារ​ ខា​ ខាវ​ បាន​ប្រើ​វ័យ​កុមារភាព​របស់​ខ្លួន​តាំងពី​អាយុ​៨​ឆ្នាំ​ ទៅ​ធ្វើ​កម្មករ​នេសាទ​លើ​ទូក​កណ្ដាល​ទន្លេសាប​ ដើម្បី​រក​ប្រាក់​ផ្គត់ផ្គង់​ជីវភាព​ក្រុម​គ្រួសារ​ ។​ តើ​ជីវិត​កុមា​រា​ខា​ ខាវ​ ជួប​ភាព​លំបាក​អ្វីខ្លះ​នៅ​ពេល​ចេញ​ទូក​នេសាទ​?​ តើ​បញ្ហា​ជីវភាព​ក្នុង​ក្រុម​គ្រួសារ​យ៉ាងណា​ដែរ​?​

សំឡេង៖
​កុមារ​រាង​ស្គម​តូច​ សម្បុរស្បែក​ខ្មៅ​ក្រៀម​ កែវភ្នែក​ល្អក់​ នោះ​គឺ​កុមា​រា​ ខា​ ខាវ​ ។​ កុមា​រា​ ខា​ ខាវ​ មានជីវិត​ជា​កូន​អ្នកនេសាទ​នៅ​ក្នុង​ ឃុំ​ កំពង់​ឃ្លាំង​ ស្រុក​សូទ្រនិគម​  ខេត្តសៀមរាប​ ដែល​យក​ទឹកទន្លេ​សាប​ជា​ឆ្នាំងបាយ​ និង​ រក​មួយ​ថ្ងៃ​សឹងតែ​មិន​គ្រប់​សម្រាប់​មួយ​ថ្ងៃ​ផង​ ។​​ខា​ ខាវ​ ជា​កូន​ទី​២​ក្នុង​ចំណោម​បងប្អូន​ ៧​នាក់​ ។​ គាត់​ថា​ ដោយសារ​អាណិត​ ឪពុក​ម្តាយ​ ដែល​មាន​ជីវភាព​ក្រីក្រ​និង​ជំពាក់​បំណុល​គេ​ ហើយ​ជា​ពិសេស​ ប្អូនៗ​យំទារ​បាយ​ញ៉ាំ​ តែ​គ្មាន​អង្ករ​សម្រាប់​ដាំបាយ​ហូប​ គាត់​បាន​សម្រេចចិត្ត​ចុះទូក​នេសាទ​ស៊ីឈ្នួល​ជា​កម្មករ​គេ​តាំងពី​អាយុ​៨​ឆ្នាំ​ ។
150903-sreyoun-feature-01-dara-ed
រូបរាង​កាយ​ដែល​មើលទៅ​ដូច​ជា​ខ្វះ​ជីវជាតិ​ ទោះជា​បច្ចុប្បន្ន​ ខា​ ខាវ​ មាន​អាយុ​១២​ឆ្នាំ​ ក្តី​ តែ​រូបរាង​តូច​ ប្រៀប​ដូច​ក្មេង​ទើប​មាន​អាយុ​៧​ឬ​ ៨​ឆ្នាំ​។​ គាត់​និយាយ​ថា​ ឪពុក​ម្តាយ​គាត់​មិន​ដែល​ចង់​ឲ្យ​គាត់​ទៅ​ធ្វើ​ការងារ​នេសាទ​នោះ​ទេ​ តែ​ដោយសារ​កត្តា​ជីវភាព​ គាត់​ក៏​ដើរ​ចេញពីផ្ទះ​ទៅ​រក​ការងារ​ធ្វើ​ ដែល​មាន​ប្រាក់​ឈ្នួល​ ៣០​ម៉ឺន​រៀល​ក្នុង​មួយ​ខែ​ ។​ គាត់​ថា​ ពេល​គាត់​ចាក​ចេញពីផ្ទះ​នោះ​ គាត់​រៀន​បាន​ត្រឹម​ថ្នាក់​ទី​១​ប៉ុណ្ណោះ​ ។​

ខា​ ខាវ​ បាន​រៀបរាប់​ថា​ ក្នុង​ពេល​នេសាទ​ថា​ ថៅកែ​ជេរ​ស្តី​ពេលធ្វើការ​មិន​បាន​ដូច​ចិត្ត​ថៅកែ​។​ ឃ្លាតឆ្ងាយ​ពី​គ្រួសារ​ឪពុក​ ម្តាយ​ បង​ ប្អូន​ ជួប​ព្យុះ​ភ្លៀង​កណ្តាលទន្លេ​ និង​មេឃងងឹត​សូន្យសុង​គ្រប់​ទិស​មើល​អ្វី​ក៏​មិនឃើញ​  កុមា​រា​ ខា​ ខាវ​ ថា​គេ​មិន​ដែល​គិត​ថា​ នឹង​អាច​ជួប​ជាមួយ​ឪពុក​ម្តាយ​នោះ​ទេ​ ដោយ​បាន​ត្រឹមតែ​ឈរ​យំ​នឹក​ផ្ទះ​ក្រោម​តំណក់ទឹកភ្លៀង​តែ​ម្នាក់ឯង​ ។​  គាត់​ថា​ គាត់​ចាំ​មិន​ភ្លេច​ គឺ​ពេល​មួយ​នោះ​មាន​ព្យុះ​ ហើយ​ក្រឡាប់​ទូ​នៅ​កណ្តាលទន្លេ​ គាត់​ភ័យ​ខ្លាំង​ណាស់​ ។​​រយៈពេល​៣​ខែ​ទើប​ត្រលប់​មក​ជួប​ក្រុម​គ្រួសារ​ ខា​ ខាវ​ថា​ ពេល​នោះ​ជា​សុភមង្គល​សម្រាប់​គាត់​ ដែល​បានឃើញ​ប្អូន​មាន​បាយ​ញ៉ាំ​គ្រប់គ្រាន់​ ។​ គាត់​ថា​ ប្អូន​របស់​គាត់​ឃាត់​មិន​ចង់​ឲ្យ​គាត់​ទៅ​ធ្វើការ​ទេ​ ។​ គាត់​បន្ត​ថា​ ពេល​ជួប​បងប្អូន​តែង​តែង​យំ​ឱប​គ្នា​ដើម្បី​បំបាត់​ភាព​នឹករឭក​គ្នា​។​
​ចំពោះ​ការ​សិក្សា​វិញ​ ខា​ ខាវ​ថា​ គាត់​ពិតជា​ចង់​រៀន​បន្ត​ទៀត​ណាស់​ ។​ ពេល​នេះ​គាត់​បាន​ត្រឡប់​ទៅ​ចូល​រៀន​ថ្នាក់​ទី​១​វិញ​ហើយ​ ក្រោម​ជំនួយ​ឧបត្ថម្ភ​របស់​កម្មវិធី​អេ​ច​សែ​ល​ របស់​អង្គការ​ទស្សនៈ​ពិភពលោក​ ។​​ខា​ ខាវ​ បាន​និយាយ​ទាំង​ភ្នែក​រលីងរលោង​ថា​ គាត់​ខ្មាស់​គេ​ណាស់​ ព្រោះ​ក្មេងៗ​រៀន​ជាមួយ​ គេ​អាច​អាន​អក្សរ​បាន​យ៉ាង​ងាយ​ តែ​សម្រាប់​គាត់​ គ្រាន់តែ​សរសេរ​ឈ្មោះ​ខ្លួនឯង​សឹងតែ​មិន​ត្រូវ​។​

លោក​ អៀង​ ខា​ ជា​ឪពុក​កុមា​រា​ ខា​ ខាវ​ បាន​រៀបរាប់​ពី​ទុក្ខ​លំបាក​នៃ​ជីវភាព​ក្នុង​គ្រួសារ​ ថា​គ្រួសារ​គាត់​ក្រីក្រ​ខ្លាំង​ណាស់​ រាល់ថ្ងៃ​កូន​មាន​ចំនួន​៧​នាក់​ក្នុង​បន្ទុក​ ។​ លោក​ថា​ ក្នុង​មួយ​ថ្ងៃ​ លោក​ត្រូវ​ចំណាយ​អង្ករ​៤​គីឡូក្រាម​ ។​ លោក​បាន​រម្លឹក​ទាំង​មុខស្រងូត​ស្រងាត់​ថា​ មាន​ពេល​ខ្លះ​គាត់​សុំ​ទិញជឿ​អង្ករ​គេ​ត្រឹមតែ​មួយ​គីឡូក្រាម​ ក៏​គេ​មិន​ឲ្យ​ជឿ​ដែរ​ ព្រោះ​គេ​ថា​គាត់​មិន​អាច​រក​លុយ​សង​បាន​ ។​

បុរស​វ័យ​៤៤​ឆ្នាំ​រូប​នេះ​បាន​លើក​ឡើង​ទាំង​កែវភ្នែក​ដក់​ពេញ​ដោយ​ទឹកភ្នែក​ថា​ កូនៗ​គាត់​មិន​ដែល​មានបាន​ញ៉ាំ​អ្វី​ក្រៅពី​បាយ​ទេ​  ចំនែកឯ​សម្ល​ស្ល​ឲ្យ​តែ​បាន​ហូប​ គ្មាន​សាច់​អ្វី​ទេ​។

​ព្រោះតែ​កត្តា​ជីវភាព​នេះ​ហើយ​ទើប​ធ្វើ​ឲ្យ​ គាត់​អនុញ្ញាតិ​ឲ្យ​កូន​ទៅ​នេសាទ​ត្រី​នៅ​កណ្តាល​ទឹកទន្លេ​សាប​ ។​ លោក​ថា​ គាត់​ក៏​ទៅ​ចុះទូក​នេសាទ​ជាមួយ​គេ​ដែរ​ ដើម្បី​បាន​ប្រាក់​មួយ​ខែ​ ៣០​ម៉ឺន​រៀល​ ។​ លោក​ថា​ បើ​មិន​ចុះទូក​ទេ​ លោក​ថា​គ្មាន​បាយ​ជាក់​ជា​មិន​ខាន​ ។​
​លោក​អៀង​ ខា​ បន្ត​ថា​ ខ្លួន​លោក​ចង់​ឲ្យ​កូន​បាន​រៀន​ណាស់​ តែ​ដោយសារ​ក្រ​ពេក​ កូនស្រី​ទី​១​ អាយុ​១៣​ឆ្នាំ​ហើយ​ទើបបាន​ចូល​រៀ​ថ្នាក់​ទី​២​ ហើយ​ត្រូវ​ជួយ​រក​ប្រាក់​ដែរ​ ពេល​សម្រាក​ពី​ការងារ​។​

​លោក​ អៀង​ ខា​ បង្ហាញ​ ទឹកមុខ​បែប​សប្បាយ​បន្តិច​ពេល​ដែល​រម្លឹក​ដល់​គម្រោង​Excel​របស់​អង្គការ​ទស្សនៈ​ភព​លោក​ ដែល​បាន​ផ្តល់​ជា​សម្ភារៈ​សិក្សា​ ដូច​ជា​កា​តាប​ ស្បែកជើង​ ដល់​កូនៗ​គាត់​ ហើយ​ក៏​បាន​ ផ្តល់​ជា​ពូជ​ត្រី​ ដើម្បី​ឲ្យ​លោក​ចិញ្ចឹម​បង្កើន​ជី​ភាព​។

​លោក​សឿង​  សា​ម៉​ន​ ជា​អ្នកសម្របសម្រួល​តាម​សហគមន៍​ របស់​អង្គការ​ទស្សនៈ​ពិភពលោក​ បាន​និយាយ​ថា​ ខា​ ខាវ​ គឺជា​កុមារ​ម្នាក់​ ក្នុង​ចំណោម​កុមារ​ដទៃ​ទៀត​ ដែល​មាន​លក្ខណៈ​ស្រប​នឹង​គោលដៅ​របស់​គម្រោង​Excel​ នៃ​អង្គការ​ទស្សនៈ​ពិភពលោក​ ដែល​ចង់​ជួយ​ដល់​កុមារ​លក់​កម្លាំង​ពលកម្ម​ ក្នុង​វិស័យ​កសិកម្ម​ នេសាទ​ និង​ បម្រើ​តាម​ផ្ទះ​ ចំនែកឯ​កុមា​រា​ខា​ ខាវ​ ជា​អ្នកលក់​កម្លាំង​ពលកម្ម​ក្នុង​ការ​នេសាទ​ត្រី​។​

លោក​សឿង​ សា​ម៉​ន​ បន្ថែម​ថា​ មុន​នឹង​បាន​ជួប​គ្រួសារ​ខា​ ខាវ​ ក្រុមការងារ​លោក​បាន​ទាក់ទង​ជាមួយ​ ភូមិ​ ឃុំ​ចុះ​ស្រង់​ឈ្មោះ​គ្រួសារ​ណា​មានកូន​លក់​កម្លាំង​ពលកម្ម​ក្នុង​វិស័យ​ទាំង​៣​ ដូច​ជា​ស័​យ​ កសិកម្ម​ នេសាទ​ និង​ បម្រើ​តាម​ផ្ទះ​ កុមារ​បោះបង់​ចោលការ​សិក្សា​ និង​កុមារ​មិន​បោះបង់​ចោលការ​សិក្សា​ ដោយ​ជំរុញ​ឲ្យ​ពួក​គាត់​កាន់តែ​ខិតខំ​ខ្លាំង​ឡើង​ តាម​រយៈ​ការ​ឧបត្ថម្ភ​ជា​សម្ភារៈ​សិក្សា​ ជាមួយ​គ្នា​ក្រុម​គ្រូ​សារ​កុមារ​ដែល​ទទួល​បាន​ជំនួយ​ អង្គការ​ក៏​ជួយ​បង្រៀន​បច្ចេកទេស​ផ្សេងៗ​ ដើម្បី​មាន​មុខរបរ​សម្រាប់​បង្កើន​ជីវភាព​ក្រុម​គ្រួសារ​កុមារ​ទាំងនោះ​។

​ក្រោយ​ទទួល​ជំនួយ​គម្រោង​Excel​នៃ​អង្គការ​ទស្សនៈ​ពិភពលោក​ កុមា​រា​ខា​ ខាវ​ សង្ឃឹមថា​ គាត់​នឹង​បាន​រៀន​ដល់​ថ្នាក់ខ្ពស់​ មានការ​ងារ​ល្អ​ធ្វើ​ ដើម្បី​ជួយ​គ្រួសារ​ និង​ ខ្លួនឯង​ផង​ដែរ​៕

Share

ព័ត៌មានទាក់ទង

Image