ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបឆ្នាំ ២០១៥ មានការរៀបអក្ខរក្រមនាមត្រកូលបេក្ខជនតាមបណ្តាមណ្ឌលប្រឡងឆ្ងាយៗ ធ្វើឱ្យប៉ះពាល់ខ្លាំងដល់អារម្មណ៍បេក្ខជនក្នុងពេលប្រឡង។ ទាក់ទងនឹងការរៀបអក្ខរក្រមនាមត្រកូលបេក្ខជន តម្រូវឱ្យទៅប្រឡងនៅមណ្ឌលប្រឡងឆ្ងាយពីផ្ទះក្នុងពេលកន្លងទៅនេះ ឱពុកម្តាយ និងអាណាព្យាបាល សិស្សានុសិស្សមួយចំនួនបានលើកឡើងថា ក្រសួងអប់រំយុវជននិងកីឡា ពុំគួររៀបចំអក្ខរក្រមនាមត្រកូលបេក្ខជន ឱ្យទៅប្រឡងឆ្ងាយៗរាប់សិបគីឡូពីផ្ទះឡើយ។
កញ្ញា ឈុន ស៊ីណា រស់នៅខេត្តបាត់ដំបង មានប្អូនប្រុសប្រឡងបាក់ឌុប នៅមណ្ឌលសាកលវិទ្យាល័យបាត់ដំបងឆ្នាំនេះ ត្រូវធ្វើដំណើរពីផ្ទះមកទីរួមខេត្តជាង ១៣ គីឡូម៉ែត្រដែរនោះ បានលើកឡើងថា ការប្រឡងឆ្នាំនេះ ក្រសួងអប់រំធ្វើការរឹតបន្តឹងបានល្អ ទាំងការចេញវិញ្ញាសារ និងការអនុវត្តន៍វិន័យផ្សេងៗក្នុងពេលប្រឡង។ ដោយឡែក បញ្ហាក្រសួងអប់រំរៀបចំឈ្មោះបេក្ខជនតាមអក្ខរក្រមនាមត្រកូលនោះ កញ្ញាពុំគាំទ្រឱ្យមានទៀតឡើយ ព្រោះបានផ្តល់ផលលំបាកជាច្រើនដល់បេក្ខជនដែលមានផ្ទះនៅឆ្ងាយពីទីប្រជុំជន ទាំងចម្ងាយផ្លូវធ្វើដំណើរទៅមក ទាំងការស្នាក់នៅ ការហូបចុង និងទុកដាក់សម្ភារៈជាដើម។
«សម្រាប់ខ្ញុំចម្ងាយផ្លូវប៉ុណ្ណេះ មិនមែនជាបញ្ហាអ្វីនោះទេ ប៉ុន្តែចំពោះបេក្ខជនមួយចំនួនដែលមានផ្ទះនៅឆ្ងាយ គាត់ពិបាក់គ្រប់យ៉ាង។ ជាក់ស្តែងកាលពីថ្ងៃប្រឡងបាក់ឌុបថ្ងៃមុនអ៊ីចឹង ពេលខ្ញុំជូនប្អូនខ្ញុំទៅប្រឡង ខ្ញុំឃើញមានបេក្ខនារីម្នាក់គាត់មកពីតំបន់ឆ្ងាយ ពុំដឹងថា ការប្រឡងឆ្នាំនេះ គេពុំអនុញ្ញាតិឱ្យយកលុយដាក់ជាប់ខ្លួន ដោយគ្មានអ្នកស្គាល់ទៅជាមួយទៀត គេត្រូវរត់ចុះរត់ឡើងខាត់ម៉ោងប្រឡងមិនតិច… ជារួមសម្រាប់ខ្ញុំមិនចង់ឱ្យក្រសួងធ្វើបែបនេះឡើយ បើបេក្ខជនរៀននៅទីណា ប្រឡងនៅទីនោះទៅ សំខាន់ឱ្យតែការគ្រប់គ្រងល្អ»។
មានកូនស្រីប្រឡងបាក់ឌុប ត្រូវធ្វើដំណើរចម្ងាយផ្លូវជាង ៥០ គីឡូម៉ែត្រពីផ្ទះទៅមណ្ឌលប្រឡង ជា ស៊ីម តាកែវ (ខាងជើង) អ្នកស្រី ទ្រី បូផល រស់នៅភូមិប្រមូលសុខ ឃុំដូង ស្រុកបាទី ខេត្តតាកែវ បានឱ្យដឹងថា ការប្រឡងបាក់ឌុបឆ្ងាយពីផ្ទះកន្លងទៅ គឺត្រូវចំណាយលុយកាក់ច្រើនសម្រាប់កូន។ ការចំណាយលុយតិច ឬច្រើន មិនជាបញ្ហាចោទសម្រាប់អ្នកស្រីទេ ប៉ុន្តែអ្វីដែលអ្នកស្រីភ័យព្រួយជានិច្ចនោះ គឺការធ្វើដំណើរផ្លូវឆ្ងាយពីផ្ទះ ខ្លាចក្រែងមានជួបគ្រោះចៃដន្យណាមួយកើតឡើងចំពោះកូន។
យុវសិស្ស ដុង រង្សា អាយុ ១៨ ឆ្នាំ ជាបេក្ខជនប្រឡងបាក់ឌុបឆ្នាំនេះ រស់នៅភូមិដំរីកូន ឃុំជំពូវ័ន្ទ ស្រុកជមគិរី ខេត្តកំពត បានឱ្យដឹងថា ចម្ងាយផ្លូវប្រមាណជាង ៦០ គីឡូម៉ែត្រពីផ្ទះទៅវិទ្យាល័យព្រះរាជសម្ភារ ក្រុងកំពត ឆ្ងាយពីផ្ទះគេយ៉ាងខ្លាំងពិបាកក្នុងការធ្វើដំណើរ។ «ការស្នាក់នៅរបស់ខ្ញុំពិបាកត្រូវជួលផ្ទះគេ ព្រោះមិនអាចត្រលប់មកផ្ទះវិញបាន ហើយត្រូវចំណាយលុយច្រើន… មើលទៅដូចហត់ខ្លាំងគួបផ្សំអារម្មណ៍ភ័យអរផង អ៊ីចឹងហើយ បានជាមានអ្នកខ្លះត្រូវខ្យល់ សន្លប់ក្នុងពេលប្រឡង។
ជាអ្នកអមដំណើរជូនកូនទៅប្រឡងដោយផ្ទាល់ លោក ណុប ណារី ជាឪពុកយុវសិស្សខាងលើ បាននិយាយថា៖ « ការរៀបចំមណ្ឌលប្រឡងនៅផ្លូវឆ្ងាយតាមអក្ខរក្រមឈ្មោះនេះ ធ្វើឱ្យសិស្សនិងអាណាព្យាបាលសិស្សដែលមានលំនៅឆ្ងាយពីមណ្ឌលប្រឡងពិបាកគ្រប់យ៉ាង ពិសេសអត់មានកន្លែងស្នាក់នៅតែម្តង។ សម្រាប់អ្នកមានលុយមិនមានបញ្ហាអ្វីទេ ប៉ុន្តែសម្រាប់អ្នកអត់វិញនោះ គាត់ពិបាកយ៉ាងណា… ចង់មិនចង់មានតែបង្ខំចិត្តមកហើយទាំងគេទាំងខ្ញុំ»។
អាណាព្យាបាលសិស្សខាងលើរូបនេះ បាននិយាយដោយសំណូមពរថា ការប្រឡងលើក្រោយសូមឱ្យក្រសួងអប់រំពិចារណាលើហេតុផលខាងលើនេះផង ប្រសិនបើមានការប្រឡងនៅជិតជិតផ្ទះជារឿងប្រសើរបំផុត ស្របពេលដែលក្រសួង បានធ្វើកំណែទម្រង់ការប្រឡងបាក់ឌុបឆ្នាំនេះបានល្អ ហើយឪពុកម្តាយអាណាព្យាបាលសិស្សទាំងអស់គាំទ្រគ្រប់គ្នា។
លោក រស់ សាលីន អ្នកនាំពាក្យក្រសួងអប់រំយុវជននិងកីឡា បានឆ្លើយតបទៅនឹងការលើកឡើងរបស់មាតាបិតា និងអាណាព្យាបាលសិស្សខាងលើថា៖ «ការរៀបចំឈ្មោះបេក្ខជនត្រូវប្រឡងបាក់ឌុបតាមអក្ខរក្រម (ត្រកូល) ក្រសួងធ្វើឡើង ក្នុងគោលបំណងធ្វើឱ្យមានភាពងាយស្រួលក្នុងការគ្រប់គ្រងមណ្ឌលប្រឡងនីមួយៗ… ក្រសួងអប់រំទទួលស្គាល់ថា ការធ្វើបែបនេះ វាលំបាកដល់អាណាព្យាបាលសិស្ស បេក្ខជន ដែលមានលំនៅឆ្ងាយពីមណ្ឌលប្រឡង មានស្ថានភាពជីវភាពនៅមានកម្រិតពិតមែន ប៉ុន្តែការចំណាយពេលវេលាពីថ្ងៃក្នុងការប្រឡង វាមិនមែនជាបញ្ហាចោទសម្រាប់សិស្សដែលខំសន្សំចំណេះអស់ ១២ ឆ្នាំនោះទេ»។
អ្នកនាំពាក្យក្រសួងអប់រំ លោក រស់ សាលីន បានបញ្ជាប់បន្ថែមថា ឆ្នាំនេះក្រសួងបានសម្រេចជ្រើសរើសមណ្ឌលប្រឡងណា ដែលមានសុវត្ថិភាពក្នុងការទុកដាក់ឯកសារ មណ្ឌលត្រូវមានរបងការពារត្រឹមត្រូវល្អ មិនឱ្យមានអ្នកចូលពីក្រៅផ្ដេសផ្ដាស នៅទីប្រជុំជន ជាតំបន់ដែលមានភាពងាយស្រួលដល់បេក្ខជនក្នុងការស្នាក់នៅ។ លោកថា បញ្ហាចោទឡើងខាងលើ ក្រសួងកំពុងយកចិត្តទុកដាក់គិតគួរ ហើយនៅឆ្នាំបន្ទាប់ ក្រសួងអប់រំអាចនឹងជួយបង្កភាពងាយស្រួលដល់សិស្សក្រីក្រនិងអ្នករស់នៅតំបន់ឆ្ងាយៗពីមណ្ឌលប្រឡង។
សូមរម្លឹកថា នៅក្នុងការប្រឡងបាក់ឌុបឆ្នាំ ២០១៥ នេះ ក្រសួងអប់រំយុវជននិងកីឡាបានរៀបចំបែងចែកឈ្មោះបេក្ខជនទាំងអស់តាមរាជធានី និងបណ្តាខេត្ត ក្រុងនីមួយៗតាមអក្ខរក្រម។ មណ្ឌលប្រឡងសរុបចំនួន ១៥០ មណ្ឌល ចែកចេញជា ៣៤២៧ បន្ទប់ រួមមានបេក្ខជនដែលបានចុះឈ្មោះប្រឡងក្រោយពេលដកបេក្ខភាព សរុបចំនួន ៨៤ ៩៣០ នាក់ ស្រី ៤០ ៩៧២ នាក់ អ្នកមិនមកប្រឡងចំនួន ១០៣៤ នាក់។ បេក្ខជនអវត្តមានប្រឡងនៅថ្ងៃទី ១ មានចំនួន ១៤៣១ នាក់ និងថ្ងៃទី ២ មានចំនួន ១៥៨ នាក់។ ចំពោះលទ្ធផងប្រឡងនឹងប្រកាសនៅថ្ងៃទី ១៥ ខែកញ្ញា សម្រាប់រាជធានីភ្នំពេញ និងខេត្តកណ្តាល និងនៅតាមបណ្តាខេត្ត ក្រុងនានានឹងប្រកាសនៅថ្ងៃទី ១៦ ខែកញ្ញា ឆ្នាំ ២០១៥ ៕
