មូស្គូ៖ ប្រធានាធិបតីរុស្ស៊ី Vladimir Putin បានប្រកាសថា យ៉ាងតិចបុគ្គលិកទូតអាមេរិក ៧៥៥នាក់ ត្រូវបញ្ជាឲ្យចាកចេញពីប្រទេសរុស្ស៊ីដែលត្រូវបានមើលឃើញថា ជាការសងសឹកចំពោះសហរដ្ឋអាមេរិកដែលបានដាក់ទណ្ឌកម្មថ្មីទៀតប្រឆាំងទីក្រុងម៉ូស្គូ។
សេចក្តីសម្រេចរបស់ប្រធានាធិបតី ពូទីន ដែលបណ្តេញបុគ្គលិកទូតអាមេរិកធ្វើឡើងកាលពីថ្ងៃសុក្រសប្តាហ៍មុន ដែលក្នុងនោះលោក ពូទីន បានបញ្ជាក់ថា បុគ្គលិកទូតអាមេរិកទាំងអស់នេះត្រូវចាកចេញនៅថ្ងៃទី០១ កញ្ញា។ តែបែបនេះក្តី ទីក្រុងវ៉ាស៊ីនតោន មិនទាន់ឃើញប្រតិកម្មអ្វីនៅឡើយទេ។
កាលពីសប្តាហ៍មុនព្រឹទ្ធសភាសហរដ្ឋអាមេរិកដ៏មានឥទ្ធិពល បានអនុម័តជាថ្មីទៀត ការដាក់ទណ្ឌកម្មទៅលើប្រទេសរុស្សី ក្រោមហេតុផល ២យ៉ាង គឺករណីរុស្ស៊ីដណ្តើមកាន់កាប់តំបន់គ្រីមៀរ នៃប្រទេសអ៊ុយក្រែន និងករណីជ្រៀតជ្រែកការបោះឆ្នោតប្រធានាធិបតីអាមេរិកកាលពីថ្ងៃទី៨ វិច្ឆិកា ឆ្នាំ២០១៦។
ការដាក់ទណ្ឌកម្មថ្មីនេះហើយដែលធ្វើឲ្យក្រុងម៉ូស្គូចាត់ទុកថា អាមេរិកមិនបានផ្តល់ទំនុកចិត្តលើរុស្ស៊ីជាប្រទេសដែលមានកិច្ចសហប្រតិបត្តិការស្មើភាពជាមួយគ្នានោះទេ៕ BBC
