ភ្នំពេញ៖នាយករដ្ឋមន្ត្រីសម្ដេច ហ៊ុន សែន អំពាវនាវឲ្យអាជ្ញាធរដែនដីនិងសា្ថប័នពាក់ព័ន្ធ យកចិត្តទុកដាក់ពីសុវត្ថិភាពនិងចុះ ជួយសង្គ្រោះប្រជាពលរដ្ឋដែលរងគ្រោះពីអាកាសធាតុប្រែប្រួលដែលកើតឡើងក្នុងពេលថ្មីៗនេះ។
រៀបរាប់ក្នុងសារដែលសម្តេចបានបង្ហោះតាមរយៈបណ្តាញសង្គមហ្វេសបុកហើយ ត្រូវផ្សព្វផ្សាយនៅថ្ងៃសៅរ៍ ទី២៩ កក្កដានេះ សម្ដេចបានទទូចឲ្យអាជ្ញាធរ កងកម្លាំង គ្រប់លំដាក់ថ្នាក់តាមបណ្តាក្រសួង មន្ទីរនិងស្ថាប័នពាក់ព័ន្ធនានាក្នុងប្រទេស មេត្តាយកចិត្តទុកដាក់ពីសុវត្ថិភាពរបស់ប្រជាពលរដ្ឋនិងជួយសង្គ្រោះបន្ទាន់ដល់ពួកគេឲ្យទាន់ពេលវេលា។
សាររបស់នាយករដ្ឋមន្ត្រីបានបន្តថា ដោយសារតែសភាពការណ៍មានការប្រែប្រួលដូច្នេះគឺត្រូវតែខិតខំនិងប្រុងប្រយ័ត្នខ្ពស់ដើម្បីសុវត្ថិភាពប្រជាជនក្នុងប្រទេសក៏ដូចជាបណ្តាខេត្តដែលទទួលរងការប៉ះទង្គិចពីគ្រោះធម្មជាតិផងដែរ។ ការអំពាវនាវរបស់ប្រមុខរដ្ឋាភិបាលធ្វើឡើង ខណៈ ខេត្តខ្លះរងការជន់លិចដោយទឹកភ្លៀង។
ខេត្តចំនួន ៧ ដែលកំពុងរងគ្រោះដោយទឹកជំនន់ ក្នុងនោះមានដូចជា ខេត្តព្រះវិហារ ឧត្តរមានជ័យ កំពង់ធំ កំពត រតនគិរី ត្បូងឃ្មុំ និងខេត្តព្រះសីហនុ។ ប៉ុន្តែ ខេត្តដែលទទួលរងការខូចខាត និងរងគ្រោះជាងគេនោះគឺខេត្តព្រះវិហារនិងឧត្តរមានជ័យ។
បើយោងទៅលើសេចក្តីជូនដំណឹងរបស់ក្រសួងធនធានទឹក និងឧតុនិយមបានសរសេរថា ប្រទេសកម្ពុជានឹងមានកូនរដូវប្រាំងមួយដែលចាប់ផ្តើមពីថ្ងៃទី២៩កក្កដាដល់ថ្ងៃទី០៩សីហាឆ្នាំ២០១៧នេះ។ មូលហេតុដែលនាំឲ្យមានកូនរដូវប្រាំងរយៈពេលខ្លីនេះគឺមកពីមានការទទួលឥទ្ធិពលពីព្យុះមួយឈ្មោះថា នេសាទ។ ព្យុះនេះបានកើតឡើងនៅលើមហាសមុទ្រប៉ាស៊ីហ្វិកភាគឥសាននៃប្រទេសហ្វីលីពីន៕
