ភ្នំពេញ៖ ការជឿលើសត្វព្រៃ ថាជាថ្នាំបុរាណសក្តិសិទ្ធ បានជំរុញឲ្យមានការប្រមាញ់សត្វព្រៃ ដ៏កម្រនៅក្នុងប្រទេសកម្ពុជាដែលពិបាកនឹងទប់ស្កាត់បាន។ សត្វដែលកំពុងស្ថិតក្រោមការគំរាមកំហែងមួយចំនួនត្រូវគេយកមកលក់ក្នុងទីផ្សារងងឹតនៅកណ្តាលរាជធានីភ្នំពេញ។ ប៉ុន្តែសត្វទាំងនោះត្រូវគេនាំទៅលក់នៅផ្សារនៃប្រទេសជិតខាងទៀតផង។

សូមអញ្ជើញស្តាប់បទយកការណ៍របស់លោក លៀ ស៊ីណា ដែលជាបទយកការណ៍ភាគទី១ ដូចតទៅ៖

វាទំនងជាពិបាករក ប៉ុន្តែពិតជាមានសត្វព្រៃកំពុងចរាចក្នុងទីផ្សារងងឹតក្នុងរាជធានីភ្នំពេញ។ សត្វទាំងនោះមានដូចជាសត្វពង្រូល អាញី សត្វតេះ គោព្រៃ ខ្ទីង និងសត្វអណ្តើកជាដើម។ សត្វភាគច្រើនត្រូវគេសម្លាប់រួចជាស្រេចទើបយកមកលក់ ប៉ុន្តែសត្វមួយចំនួនតូចត្រូវគេដាក់លក់ទាំងរស់ដោយលួចលាក់និងដោយរក្សាការសម្ងាត់បំផុត។

ទីផ្សារនៃសត្វទាំងនោះដោយសារប្រជាពលរដ្ឋកម្ពុជាមានជំនឿថាសត្វព្រៃទាំងនោះគឺជាឱសថសក្តិសិទ្ធដែលអាចព្យាបាលជំងឺជាច្រើន ដែលឱសថសម័យទំនើប ឬ ថ្នាំពេទ្យមិនអាចព្យាបាលបាន។

អ្នកស្រី ចន្ថា ឈ្មោះដែលអ្នកនិពន្ធដាក់ឲ្យ។ អ្នកស្រីកំពុងតែរអ៊ូរទាំ ថាដោយសារអ្នកស្រីកំពុងរង់ចាំអតិថិជនដែលបានបញ្ជាទិញសត្វពង្រូលរស់មួយក្បាល តែមិនឃើញអតិថិជននោះមកយក។
អ្នកជំនួញដែលពូកែវោហារូបនេះបានរៀបរាប់ពីបទពិសោធន៍ផ្ទាល់ខ្លួនក្នុងការយកសត្វអាញីជាថ្នាំកែរោគនេះ។
តាមច្បាប់របស់ប្រទេសកម្ពុជា ការបរបាញ់ ឬ ការជួញដូរសត្វកម្រដែលកំពុងស្ថិតក្រោមការគំរាមកំហែងពីការវិនាសផុតពូជត្រូវហាមឃាត់។ ហើយជនល្មើសនឹងទទួលរងការផ្តន្ទាទោសយ៉ាងធ្ងន់ធ្ងរទៀតផង។

អ្នកស្រី ចន្ថា បានដឹងពីកត្តាច្បាប់នេះ។ ប៉ុន្តែអ្នកស្រីគិតថា វាជាជំនួញខុសច្បាប់ ប៉ុន្តែដើម្បីជួយស្រោចស្រង់ជីវិតមនុស្ស។ ផ្ទះរបស់អ្នកស្រីគឺជាកន្លែងលក់ផង និងជាកន្លែងពិឃាតសត្វដែលអ្នកស្រីលក់ទាំងរស់នោះផង។
អតិថិជនម្នាក់កំពុងឈរមើលគេសម្លាប់សត្វពង្រូលបន្ទាប់ពីអតិថិជនរូបនោះសម្រេចចិត្តទិញសត្វព្រៃកម្រនេះ។

អ្នកស្រីប្រកបមុខរបរនេះ អស់រយៈពេលជាងដប់ឆ្នាំមកហើយ។ ការផ្គត់ផ្គង់សត្វព្រៃដ៏កម្រនេះប្រហែលជាត្រូវពឹងផ្អែកលើការរៀបចំបណ្តាញច្បាស់លាស់ និងទុកចិត្តបានដើម្បីរក្សាការសម្ងាត់ក្នុងទីផ្សារខុសច្បាប់នេះ។ អ្នកស្រី ចន្ថា អះអាងថាអ្នកស្រីអាចនឹងផ្គត់ផ្គង់ប្រមាត់ខ្លាឃ្មុំតាមការបញ្ជាទិញទៀតផង។

បើតាមអ្នកស្រី ចន្ថា សត្វព្រៃដែលគេជឿថា ប្រើសម្រាប់ជាថ្នាំព្យាបាលរោគច្រើនមុខនោះមិនមែនសម្រាប់តែបម្រើឲ្យទីផ្សារក្នុងប្រទេសកម្ពុជានោះទេ។ ប៉ុន្តែមានតម្រូវការពីប្រទេសវៀតណាមយ៉ាងច្រើនផងដែរ។

យោងតាមអង្គការមូលនិធិសកល សម្រាប់ការពារធនធានធម្មជាតិ WWF ដោយសារជំនឿថា សត្វព្រៃជាប្រភពឱសថដ៏ពូកែសក្តិសិទ្ធនោះ បានធ្វើឲ្យមានការប្រមាញ់និងជួញដូរសត្វព្រៃយ៉ាងហិនហោច។ និងជាកត្តាដែលជំរុញឲ្យមានវិនាសកម្មសត្វព្រៃនៅកម្ពុជា៕