(ភ្នំពេញ)៖ក្រសួងធនធានទឹកនិងឧតុនិយមបានប្រកាសថា ចាប់ពីថ្ងៃនេះ ដល់ថ្ងៃទី ១៦ កម្ពុជានឹងអាចមានភ្លៀងធ្លាក់ច្រើននៅតាមតំបន់មួយចំនួនដែលការព្យាករណ៍នេះបន្ទាប់ពី តាមដានស្ថានភាពអាកាសធាតុរួចមក ឃើញថា ជ្រលងសម្ពាធទាប បាននឹងកំពុងបន្ដបង្កើនឥទ្ធិពលលើព្រះរាជាណាចក្រកម្ពុជា។
លក្ខណៈបែបនេះ នឹងបង្កឲ្យមានភ្លៀងធ្លាក់រាយប៉ាយក្នុងក្របខ័ណ្ឌទូទាំងប្រទេសពីមធ្យមទៅច្រើន ចាប់ពីថ្ងៃទី ១១ ដល់ថ្ងៃទី ១៦ខែកក្កដា។នេះបើតាមសេចក្ដីជូនដំណឹងរបស់ក្រសួងធនធានទឹក និងឧតុនិយមចេញផ្សាយនៅថ្ងៃទី ១១ កក្កដា ២០១៧។
តាមសេចក្ដីជូនដំណឹងរបស់ក្រសួង តំបន់ដែលអាចនឹងមានភ្លៀងធ្លាក់ច្រើន ៖
តំបន់ទំនាបកណ្ដាល និងតំបន់ខ្ពង់រាប៖ រាជធានីភ្នំពេញ ខេត្តកណ្ដាល កំពង់ស្ពឺ ព្រៃវែង ស្វាយរៀង កំពង់ធំ កំពង់ចាម ត្បូងឃ្មុំ ក្រចេះ និងខេត្តមណ្ឌលគិរី ។
ដោយឡែក តំបន់មាត់សមុទ្រ គឺ លើផ្ទៃសមុទ្រ (ក្បែរតំបន់ឆ្នេរ ) និងតំបន់ឆ្នេរនៃខេត្តកោះកុង និងខេត្តព្រះសីហនុ អាចនឹងមានភ្លៀងធ្លាក់ច្រើន ហើយរលកសមុទ្រមានកំពស់ខ្ពស់។
អាស្រ័យដូចបានជម្រាបជូន ខាងលើក្រសួងអំពាវនាវ សូមឱ្យបងប្អូនប្រជានេសាទ និងអ្នកធ្វើដំណើរតាមសមុទ្រទាំងអស់បង្កើន ការយកចិត្តទុកដាក់ ហើយប្រុងប្រយ័ត្ដខ្ពស់ ចំពោះបាតុភូតភ្លៀង និងរលក។ ក៏ដូចជាប្រុងប្រយ័ត្ន ចំពោះបាតុភូតរន្ទះ និងខ្យល់កន្ដ្រាក់ នៅពេលមេឃរកកលភ្លៀង៕
