អាជ្ញាធរនៃប្រទេសម៉ាឡេស៊ី បានប្រកាសថាពលករចំណាកស្រុក មកពីប្រទេសផ្សេងៗជាង២០០០នាក់ ប្រឈមមុខនឹងការបណ្តេញចេញពីប្រទេស ដោយសារតែពួកគេមកធ្វើការនៅក្នុងប្រទេសនេះដោយពុំមានស្របច្បាប់។
ការប្រកាសដូចនេះ ធ្វើឡើងខណៈដែលអាជ្ញាធរម៉ាឡេស៊ី បើកយុទ្ធនាការប្រឆាំងការជួញដូពលកម្មនៅទូទាំងប្រទេស។
ពលករដែលបម្រើការងារមកពីបណ្តាប្រទេសផ្សេង មានប្រមាណជាង២លាននាក់ ប៉ុន្តែមួយចំនួន ពុំមានឯកសារត្រឹមត្រូវ ។
អាជ្ញាធរអន្តោប្រវេសន៍ម៉ាឡេស៊ី បាននិយាយថា គេបានរកឃើញកម្មករបរទេស ២៣០៩នាក់ ធ្វើការងារខុសច្បាប់ ហើយឥលូវនេះពួកគេកំពុងតែឃុំខ្លួន ដើម្បីបញ្ជូនមកទៅប្រទេសកំណើតពួកគេវិញ។
កម្មករទាំងនោះ ច្រើនធ្វើការនៅតាមរោងចក្រ និងភោជនីយដ្ឋាន។ តែយ៉ាងណាក៏ដោយ បើតាមអាជ្ញាធរ ពលករដែលត្រូវប្រឈមមុខនឹងការនិរទេសខ្លួន ភាគច្រើនមកពីប្រទេសបង់ក្លាដេស និងឥណ្ឌូនេស៊ី៕
