ភ្នំពេញ៖ បន្ទាប់ពីមានករណីបង្ខាំងតំណាងសហជីព ៨ នាក់ក្នុងម៉ោងធ្វើការអស់រយៈពេលជាច្រើនថ្ងៃមក នៅថ្ងៃទី ២៧ ខែសីហានេះ មន្រ្តីធ្វើការផ្នែកសិទ្ធិមនុស្ស និងមន្រ្តីសហជីពបានលើកឡើងដូចៗគ្នាថា ការបង្ខាំងអ្នកទាំងនោះក្នុងបន្ទាប់ធ្វើការ ដោយមានការយាមកាម និងមិនអនុញ្ញាតអ្នកទាំងនោះទៅជួបកម្មករគឺជាការរំលោភលើសិទ្ធិមនុស្សយ៉ាងធ្ងន់ធ្ងរ។
មន្ត្រីសហជីព និងមន្ត្រីអង្គការសង្គមស៊ីវិលយល់ថា ការបង្ខាំងតំណាងសហជីព ៨ នាក់នៃរោងចក្រស្លាបព្រឹល Beautiful Window ស្ថិតនៅក្រុង បាវិត គឺជាការរំលោភសិទ្ធិមនុស្សធ្ងន់ធ្ងរ និងមិនអាចទទួលយកបាន។
លោក អំ សំអាត អ្នកស៊ើបអង្កេតជាន់ខ្ពស់ នៃអង្គការលីកាដូ (Licadho) បានលើកឡើងនៅថ្ងៃទី ២៧ ខែសីហា ឆ្នាំ ២០១៥ នេះថា ករណីបង្ខាំងតំណាងសហជីពក្នុងបន្ទប់ធ្វើការដាច់ដោយឡែក ដោយមិនឲ្យចេញទៅណា និងមានអ្នកយាមកាមបែបនេះ គឺជាការរំលោភសិទ្ធិមនុស្ស ដែលតាមនីតិវិធីច្បាប់គឺជាបទបង្ខាំងមនុស្សខុសច្បាប់ផងដែរ។ លោកនិយាយថា៖ «នេះវាជាការរំលោភសិទ្ធិមនុស្សយ៉ាងធ្ងន់ធ្ងរ ហើយការបង្ខាំងមិនឲ្យគេចេញទៅណាមិនបាច់ចាំតែឃុំឃាំងនោះទេ បានន័យថាបង្ខាំងមិនឲ្យគេមានសេរីភាពអាហ្នឹងគេចាប់ទុកថាជាបទបង្ខាំង មនុស្សដោយខុសច្បាប់។
ពាក់ព័ន្ធក្នុងរឿងនេះដែរ នៅថ្ងៃទី ២៧ ខែសីហានេះ លោក ប៉ាវ ស៊ីណា ប្រធានសម្ព័ន្ធសហជីពចលនាកម្មករ បានថ្កោលទោសចំពោះ ទង្វើរបស់និយោជកនៃរោងចក្រស្លាបព្រឹលថា ជាការរំលោភសិទ្ធិមនុស្សយ៉ាងធ្ងន់ធ្ងរ។ លោកលើកឡើងទៀតថា ការបង្ខាំងតំណាងសហជីពទាំង ៨ នាក់ឲ្យធ្វើការក្នុងបន្ទប់ធ្វើការដាច់ដោយឡែកបែបនេះ គឺបន្ទាប់ពីតំណាងសហជីពទាំងនោះ បានចេញមុខធ្វើកូដកម្មទាមទារផលប្រយោជន៍ជូនកម្មករនាពេលកន្លងទៅ។
លោក ប៉ាវ ស៊ីណា និយាយថា៖ «បន្ទាប់ពីពួកគាត់បានធ្វើកូដកម្មតវ៉ាហើយ គាត់បានចូលធ្វើការវិញ យើងឃើញថាតំណាង សហជីព ៨ រូបត្រូវបានក្រុមហ៊ុនបានយកគាត់ទៅដាក់នៅប៉ុស្ត៍សន្តិសុខ ដោយមានការយាមកាមអត់ឱ្យពួកគាត់ទាំង ៨ រូបហ្នឹង ជួបអ្នកណាឬទៅធ្វើការនៅ កន្លែងចាស់របស់គាត់ឬតាមតួនាទីរបស់គាត់ទេ គឺដាក់នៅក្នុងបន្ទប់មួយឲ្យអង្គុយមួយក្រុម នឹងមានការយាមកាមគ្រប់ពេលវេលា រយៈ ៨ ម៉ោងហ្នឹង។ ដូច្នេះខ្ញុំឃើញថាទង្វើនេះ ជាទង្វើមួយរំលោភទៅលើសិទ្ធិ មនុស្សធ្ងន់ធ្ងរបំផុត ដែរយើងមិនអាចទទួលយកបាន។
សូមរំឭកថា កម្មករោងចក្រស្លាបព្រឹលប្រមាណ ៤០០ នាក់បានធ្វើការតវ៉ាអស់ជាច្រើនថ្ងៃ ដើម្បីទាមទារឲ្យរោងចក្រមួយនេះ បំពេញលក្ខខណ្ឌការងារចំនួន ១១ ចំណុចជូនកម្មករ។ នៅថ្ងៃទី ១៩ ខែសីហា ការតវ៉ារបស់កម្មករបានឈានដល់ការផ្ទុះហឹង្សាដោយមានការគប់ដុំថ្មទៅលើអគាររោងចក្រ បានបណ្តាលឲ្យបែកកញ្ចក់ និងខូចខាតទ្រព្យសម្បតិ្តរោងចក្រផងដែរ។ ក្រោយពីមានដំណោះស្រាយ ហើយកម្មករទាំងអស់ព្រមចូលធ្វើការវិញ ស្រាប់តែភាគីរោងចក្រមិនបានឲ្យតំណាងកម្មករទាំង ៨ នាក់នោះ ចូលធ្វើការកន្លែងដើមវិញទៅ គឺយកពួកគេទៅដាកដោយឡែកពីកន្លែងចាស់៕
