យ៉ាងហោចណាស់ ពលករខ្មែរ១៣ ក្នុងចំណោមពលករខ្មែរ២០នាក់ បានរងរបួស ដោយសារគ្រោះថ្នាក់ចរាចរណ៍នៅប្រទេសថៃ ខណៈដែលពួកគេធ្វើដំណើរត្រឡប់មកស្រុកកំណើតវិញ បន្ទាប់ពីថៃកំពុងធ្វើការរឹតបន្តឹងទៅលើពលករទេស។

តាមគេហទំព័ររបស់អគ្គស្នងការនគរបាលជាតិ បានឱ្យដឹងថាគ្រោះថ្នាក់ចរាចរណ៍នេះបានកើតឡើងកាលពីថ្ងៃទី២ ខែកក្កដា ឆ្នាំ២០១៧ម្សិលមិញ ក្នុងស្រុកវឌ្ឍនានគរ ខេត្តស្រៈកែវ ប្រទេសថៃ ។

ពលករទាំង១៣នាក់នេះត្រូវបានអាជ្ញាធរថៃ បញ្ជូនទៅព្យាបាលនៅមន្ទីរពេទ្យស្រុកវឌ្ឍនានគរ ដើម្បីជួយសង្រ្គោះ។  នេះបើយោងតាមគេហទំព័ររបស់អគ្គស្នងការនគរបាលជាតិ កម្ពុជា។

តាមការសន្និដ្ឋានរបស់សមត្ថកិច្ចថៃ ករណីនេះអាចបណ្តាលពីតៃកុងឡានងងុយដេក ដោយពួកគេមមាញឹកក្នុងការដឹកជញ្ជូនពលករចំណាស្រុក មកស្រុកកំណើតវិញ ស្របពេលដែលថៃរឹតបន្តឹងទៅលើពលករបរទេស ទើបធ្វើឱ្យពលករខ្មែរ ឡាវ ភូមា សម្រុកវិលមកប្រទេសកំណើតវិញ។

តាម ប្រភពព័ត៌មាន របស់ ទិភ្នាក់សារព័ត៌មាន Reuters រយៈពេល ប៉ុន្មានថៃ្ងមកនេះ  ពលករខ្មែរជិត២០០០នាក់ មកកាន់ ច្រកទ្វារ ប៉ោយប៉ែត។ ពលរដ្ឋដែលអាជ្ញាធរថៃចាប់បញ្ជូន គឺ ដោយសារពួកគេ គ្មាន លិខិតឆ្លងដែរ៕