ទីភ្នាក់ងារព័ត៌មាន AFP បានរាយការណ៍ថា រដ្ឋាភិបាលថៃកំពុងតែរឹតបន្តឹងច្បាប់គ្រប់គ្រងពលករបរទេសនៅក្នុងប្រទេសថៃ ដែលកំពុងបម្រើការងារក្នុងវិស័យរោងចក្រ នេសាទ និងវិស័យសំណង់ ដែលនាំឱ្យពលករខ្មែរជិត ២០០០ នាក់ រត់គេចខ្លួន។

តាមប្រភពដដែលនេះ ពលករខ្មែរទាំងនោះបានរត់គេចចេញពីការចាប់ខ្លួន និងត្រូវបានអាជ្ញាធរថៃចាប់បញ្ជូនត្រឡប់មកប្រទេសកំណើតវិញ តាមច្រកប៉ោយប៉ែត នៅក្នុងរយៈពេលជិត ១សប្ដាហ៍មកនេះ។

វិធានការថ្មីរបស់រដ្ឋាភិបាលយោធាថៃនេះ បានជំរុញឲ្យពលករប្រទេសជិតខាងរួមកម្ពុជា ឡាវ និងភូមា បានគេចខ្លួន ឬត្រូវបានតម្រួតថៃចាប់បញ្ជូនត្រឡប់ទៅប្រទេសកំណើតវិញ។ ពួកគេភាគច្រើនរត់ចូលពួនក្នុងព្រៃ ក្នុងចំការ ហើយបើអាជ្ញាធរថៃចាប់បាន ពួកគេនិងរងការធ្វើទារុណកម្ម។

យ៉ាងណាAFP ថា រដ្ឋាភិបាលថៃនឹងផ្អាកការអនុវត្តវិធានថ្មីនេះ បន្ទាប់ពីពលករបរទេសជាច្រើនពាន់នាក់ បានគេចខ្លួនវិលត្រឡប់ទៅប្រទេសកំណើតរបស់ពួកគេវិញ។ ពលករខ្មែរ ធ្វើការនៅថ្ងៃមានជិត មួយលាន់នាក់។ ពួកគេជាកម្មករសំណង់ កម្មកររោងចក្រ ស្បៀងអាហារសមុទ្រ និងរោងចក្រឧស្សាហកម្មផ្សេងៗទៀត។ កាលពីឆ្នាំ ២០១៤ អាជ្ញាធរថៃបាន បណ្ដេញពលករខ្មែរ ជាង ២០ម៉ឺននាក់ មកប្រទេសវិញ ដោយសារពួកគេពុំមានឯកសារការងារត្រឹមស្របច្បាប់៕