ភ្នំពេញ៖ ក្រសួងធនធានទឹក និងឧតុនិយម បានប្រកាសឲ្យដឹងថា ភ្លៀងនឹងបន្តធ្លាក់ក្នុងរយៈពេល ១១ថ្ងៃ នៅពាសពេញប្រទេសកម្ពុជាដោយសារប្រទេសកម្ពុជាទទួលរងឥទ្ធិពលខ្យល់មូសុងនិរតី និងជ្រលងសម្ពាធទាប។
ក្នុងសេចក្តីថ្លែងការណ៍ដែលចេញផ្សាយកាលពីថ្ងៃព្រហស្បត្តិ៍ ទី ២៩ ខែមិថុនា ក្រសួងធនធានទឹកនិងឧត្តុនិយមបញ្ជាក់ថា ភ្លៀងនឹងចាប់ផ្តើមធ្លាក់ចាប់ពីថ្ងៃទី២៩ខែមិថុនា បន្តរហូតដល់ថ្ងៃទី៨ ខែកក្កដា។ ពោលគឺ ចាប់ពីថ្ងៃទី ២៩ ខែមិថុនា ដល់ថ្ងៃទី ០២ ខែកក្កដា តំបន់វាលទំនាប និងតំបន់ខ្ពង់រាប អាចនឹងមានភ្លៀងធ្លាក់ពីមធ្យមទៅបង្គួរ ។ និងតំបន់មាត់សមុទ្រ អាចនឹងមានភ្លៀងធ្លាក់រាយប៉ាយពីបង្គួរទៅច្រើន។
ជាមួយគ្នានេះ ចាប់ពីថ្ងៃទី ០៣ ដល់ថ្ងៃទី ០៨ ខែកក្កដា ភ្លៀងនឹងបង្កើនការធ្លាក់រាយប៉ាយពីមធ្យមទៅច្រើនក្នុងក្របខ័ណ្ឌទូទាំងប្រទេស ក្នុងនោះតំបន់ទំនាបកណ្ដាលភាគពាយ័ព្យ និងតំបន់មាត់សមុទ្រអាចនឹងមានភ្លៀងធ្លាក់ពីបង្គួរទៅច្រើន៕
