នៅទីបំផុតប្រទេសចិនបានសម្រចយល់ព្រមបញ្ឈប់ការលក់ប្រេងឥន្ធនៈទៅឱ្យកូរ៉េខាងជើង ទៅតាមការគាបសង្កត់ របស់ សហរដ្ឋអាមេរិក ដែលស្នើឱ្យចិនបង្ហាញជំហររឹងមាំ និងអនុវត្តតាមសេចក្ដីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ។

ទីភ្នាក់ងារសារព័ត៌មាន Reuters បានរាយការណ៍ថា ក្រុមហ៊ុនប្រេងឥន្ធនៈមួយរបស់ចិន គឺក្រុមហ៊ុនសាជីវកម្មជាតិប្រេងកាតបានសម្រេចព្យួរការលក់ប្រេងឥន្ធនៈរបស់ខ្លួនទៅឱ្យកូរ៉េខាងជើងហើយ កាលពីថ្ងៃអង្គារទី២៧មិថុនាបន្ទាប់ពីក្រុមហ៊ុននេះ សម្ដែងការព្រួយបារម្ភចំពោះការខាតបង់ការរកស៊ីរបស់ខ្លួនបើនៅតែរឹងទន្ទឹងនឹងច្បាប់អន្តរជាតិ។

តែបែបនេះក្ដី គេដឹងថាក្រុមហ៊ុនដែលប្រកាន់ជំហរបែបនេះបន្ទាប់ពីអាមេរិកប្រាប់រដ្ឋាភិបាលចិនថា មានក្រុមហ៊ុនចិនជាច្រើននៅបន្តចែកចាយប្រេងឥន្ធនៈជាមួយកូរ៉េខាងជើងទៀត បើទោះជាក្រុមប្រឹក្សាសន្តិសុខអង្គការសហប្រជាជាតិបានដាក់កំហិតក៏ដោយ។

កាលពីសប្ដាហ៍មុន សហរដ្ឋអាមេរិកបានរកឃើញក្រុមហ៊ុនរបស់ចិនយ៉ាងតិចចំនួន១០ នៅបន្តមានមុខជំនួញ ជាមួយកូរ៉េខាងជើងដែលអាមេរិកថាជាការផ្គើននឹងសហគមន៍អន្តរជាតិ៕