វេនេហ្សុយអេឡា៖ តុលាការកំពូល នៃប្រទេសវេនេហ្សុយអេឡា រងការវាយប្រហារ ដោយ ការបាញ់ពីលើអាកាស ដែលនាំឱ្យប្រធានាធិបតី Nicolas Maduro បានហៅករណីនេះថា ជាអំពើភេរវកម្ម។
តាមបណ្ដាញផ្សាយព័ត៌មាន BBC ការវាយប្រហារទៅលើអាគារ តុលាការកំពូល កាលពី ថ្ងៃម្សិលមិញ ( ថ្ងៃទី២៧ មិថុនា) ធ្វើឡើងដោយខ្មាន់កាំភ្លើង បាញ់ និងគប់គ្រាប់បែកពី ឧទ្ធម្ភាគកចក្រ ។ សាក្សីនិយាយថា វាជាឧទ្ធម្ភាគកចក្រ របស់ ប៉ូលិស ដោយវាបើកក្រឡឹងមុនបើកការវាយប្រហារ។
ប៉ូលិសនិយាយថា មុនហេតុការណ៍នេះកើតឡើង គឺពួកវាយប្រហារបានចេញសេចក្ដីថ្លែងការណ៍ថ្កោលទោស លោកប្រធានាធិបតី Maduro ថា ជាមេដឹកនាំឧក្រិដ្ឋ។
លោក ម៉ាឌួរ៉ូ កំពុងប្រឈមុខនឹងការទាមទារទម្លាក់ពីតំណែង ជាច្រើនខែមកហើយ ។ តែតុលាការកំពូលបានចេញសេចក្ដីសម្រេចការពារលោក ឱ្យបន្តកាន់អំណាច។ ជារឿយៗតុលាការកំពូលនេះ ត្រូវបានរងការរិះគន់ ពីក្រុមបក្សប្រឆាំងថា ជាឧបករណ៍ នយោបាយ របស់ ប្រធានាធិបតី Maduro ។
ក្រុមគណបក្សប្រឆាំង បាននិយាយថា ពួកគេនឹងបន្តរក្សា ការតវ៉ា រហូតមានការបោះឆ្នោត ពាក់កណ្ដាល់អាណត្តិ៕
