ភ្នំពេញ៖ គណៈកម្មាធិការជាតិរៀបចំការបោះឆ្នោត គ.ជ.ប បានបង្ហាញការសោកស្ដាយជាខ្លាំង ចំពោះការវាយតម្លៃខុសពីការពិត ដែលធ្វើឲ្យសាធារណជនមានការយល់ច្រឡំ លើដំណើរការ និងលទ្ធផលនៃការបោះឆ្នោត ឃុំសង្កាត់កាលពីថ្ងៃទី៤ មិថុនា។ នេះបើយោងតាមសេចក្ដីថ្លែងការណ៍ របស់គជប ដែលបានចុះផ្សាយកាលពីថ្ងៃ ទី២៧មិថុនា។
សេចក្ដីថ្លែងការណ៍បានបញ្ជាក់ថា ៖«គ.ជ.ប មានការសោកស្ដាយជាខ្លាំងចំពោះការវាយតម្លៃ ដែលគ្មានប្រព្រឹត្តការណ៍ជាក់ស្ដែង មកឆ្លុះបញ្ជាំងការពិត ទៅលើទិដ្ឋភាពបច្ចេកទេស ដែលបានបទប្បញ្ញាតិនៅក្នុងច្បាប់បោះឆ្នោត និងបទបញ្ជា និងនីតិវិធីរបស់ គ.ជ.ប ដែលអាចធ្វើឲ្យសាធារណៈជនមានការយល់ច្រឡំ លើដំណើរការ និងលទ្ធផលនៃការបោះឆ្នោត»។
សេចក្ដីថ្លែងការណ៍ដដែលនេះ បានបញ្ជាក់ទៀតថា គ.ជ.ប ក៏ដូចជាមតិជាតិ និងអន្ដរជាតិបានយល់ឃើញថា គ្មានការបោះឆ្នោតណាមួយដែលរៀបចំឡើង បានល្អឥតខ្ចោះ ១០០%នោះទេ ទោះបីនៅក្នុងប្រទេសអភិវឌ្ឍន៍ ឬប្រទេសណាក៏ដោយ។
ចំណុចខ្វះខាតតិចតួចដែលនៅសេសសល់ តាមរយៈបទពិសោធន៍នៃការបោះឆ្នោតនេះ គ.ជ.ប រួមជាមួយជំនាញការអន្ដរជាតិ កំពុងបំពេញការងារ នៅទីស្ដីការ គ.ជ.ប នឹងរួមគ្នាធ្វើការដោះស្រាយ និងកែលម្អឲ្យកាន់តែប្រសើរឡើងថែមទៀត សម្រាប់ការបោះឆ្នោតលើកក្រោយ។
យ៉ាងណា ក៏ គ.ជ.ប សូមអំពាវនាវដល់ក្រុមភាគីពាក់ព័ន្ធទាំង អស់បន្តចូលរួមសហការដើម្បីឱ្យ បរិយាកាសក្រោយថ្ងៃបោះឆ្នោត មានភាពស្ងប់ស្ងាត់ សុខសន្តិភាព ដើម្បីជាប្រយោជន៍ ដល់ប្រទេសជាតិ៕
