ភ្នំពេញ៖ មន្រ្តីការពារសិទ្ធិមនុស្សនៃសមាគមអាដហុកចំនួនបួនរូបឡើងសវនាការនៅតុលាការកំពូលនៅថ្ងៃនេះក្នុងសំណុំរឿងសុំនៅក្រៅឃុំជាបណ្តោះអាសន្ន។ អ្នកការពារសិទ្ធិមនុស្សទាំងនេះស្ថិតក្នុងស្ថានភាពទ្រុឌទ្រោមផ្នែកសុខភាព។
តុលាការកំពូលនៅព្រឹកថ្ងៃពុធនេះ បានបើកសវនាការក្នុងសំណុំរឿងសុំនៅក្រៅឃុំបណ្តោះអាសន្នរបស់មន្រ្តីការពារសិទ្ធិមនុស្សចំនួនបួនរូបគឺ លោកស្រី លឹម មុន្នី លោកណៃ វង្សដា លោកយី សុខសាន្ត និង លោកនី សុខា។ ប៉ុន្តែសាលដីកានឹងត្រូវប្រកាសនៅថ្ងៃទី២៨ខែមិថុនានេះ។
មន្ត្រីសមាគមអាដហុកទាំងបួនរូបនេះ ត្រូវបានចៅក្រមសាលាដំបូងសម្រេចឃុំខ្លួនក្រោមការចោទប្រកាន់ពីបទសូកប៉ាន់សាក្ស៊ី ក្នុងសំណុំរឿងស្នេហារបស់នាងខុមចាន់តារាទីហៅស្រីមុំ អស់រយៈពេលជាងមួយឆ្នាំមកហើយ។
លោក នី ចរិយា អគ្គលេខាធិការរងគណៈកម្មាធិការជាតិរៀបចំការបោះឆ្នោតក៏ជាប់ពាក់ព័ន្ធនក្នុងសំណុំរឿងស្នេហារបស់នាង ស្រីមុំ ជាមួយប្រធានគណបក្សសង្គ្រោះជាតិលោក កឹម សុខា ប៉ុន្តែលោក ចរិយាគ្មានវត្តមាននៅក្នុងបន្ទប់សវនាការតុលាការកំពូល ដោយសារមេធាវីលោកមិនបានប្តឹងសុំនៅក្រៅឃុំទេ។
លោក ឡោ ជុនធី មេធាវីការពារឲ្យសកម្មជនសិទ្ធិមនុស្សទំាំងបួនរូប នៅក្នុងសវនាការព្រឹកមិញនេះ បានស្នើឲ្យប្រធានចៅក្រមសាលាកំពូលដោះលែងកូនក្តីរបស់ខ្លួនអាចនៅក្រៅឃុំបណ្តោះអាសន្ន ដោយសារបញ្ហាសុខភាពទ្រុតទ្រូម។
លោកមេធាវី ជុនធី បញ្ជាក់ថា កូនក្តីរបស់លោកគួរតែបានអនុញ្ញាតឲ្យនៅក្រៅឃុំបណ្តោះអាសន្ន ព្រោះដំណើរការស៊ើបអង្កេតមិនមានភាពរីកចម្រើនតទៅទៀត។
ក្នុងចំណោមមន្ត្រីសិទ្ធិមនុស្សទាំងបួនរូប លោក ណៃ វង្សដា មានអការៈទ្រុឌទ្រោមអស់កម្លំាងយ៉ាងខ្លាំងនិងបានសុំប្រធានចៅក្រមសាលាកំពូលសម្រាកនៅក្រៅបន្ទប់សវនាការ។ នេះបើតាមមេធាវី។
កាលពីថ្ងៃអាទិត្យមន្ត្រីសិទ្ធិមនុស្សម្នាក់ទៀតដែលកំពុងស្ថិតក្នុងការឃុំឃាំងដែរគឺលោកនី សុខា បានដួលសន្លប់ក្នុងបន្ទប់ទឹកដោយសារសភាពទ្រុឌទ្រោម។
នៅក្រោយពីសវនាការរយៈពេលជាងបីម៉ោង លោកយី សុខសាន្ត អ្នកជាប់ឃុំម្នាក់ទៀតបានសរសេរលិខិតខ្លីមួយជូនក្រុមអ្នកកាសែតដោយស្នើឲ្យរាជរដ្ឋាភិបាល«ឈប់ធ្វើទារុណកម្មក្រុមលើក្រុមអ្នកការពារសិទ្ធិមនុស្សតទៅទៀតដើម្បីរក្សាមុខមាត់ជូនប្រទេសជាតិ»៕
