ក្រុងហាណូយ៖ អង្គការឃ្លាំមើលសិទ្ធិមនុស្សអន្តរជាតិ Human Rights Watchបានរិះគន់ ប្រទេសវៀតណាម ថារំលោភសិទ្ធិមនុស្សធ្ងន់ធ្ងរ ដោយសារធ្វើទារុណកម្មលើអ្នកការពារសិទ្ធិមនុស្ស និងអ្នកតស៊ូមតិ ។
ក្រុមសិទិ្ធមនុស្សដែលមានមូលដ្ឋាននៅទីក្រុងញូវយ៉កនេះបានពណ៌នាការចាប់ខ្លួនមនុស្ស ៣៦នាក់គឺជាការវាយ ប្រហារលើយុទ្ធនាការសិទ្ធិសេរីភាពនិងអ្នកសរសេរប្លុករិះគន់។
Human Rights Watchនិយាយថា ទោះបីជាមានកំណែទម្រង់នៃសេដ្ឋកិច្ចយ៉ាង ទូលំទូលាយ ទៅរកការផ្លាស់ប្តូរសង្គមយ៉ាងណាក្តី ក៏បក្សកុម្មុនីស្តនៅតែរិតបន្តឹង និង ធ្វើការត្រួតពិនិត្យ ប្រព័ន្ធផ្សព្វផ្សាយដោយមិនលើកលែងចំពោះការរិះគន់ រដ្ឋាភិបាល។
ទោះបីជាមានការរឹតបន្តិងក្នុងការបញ្ជេញមតិយ៉ាងណាក្តី ក៏នៅតែមានវេបសាយ និងប្លុកមួយចំនួនបន្តការរិះគន់ និងធ្វើការបង្ហោះនូវសារសេចក្តីឈឺចាប់ របស់ពួកគេដោយ បង្ហោះព្រោងព្រាតលើ បណ្ដាញហ្វេសបុក ដ៏ពេញនិយម។
អង្គការសិទ្ធមនុស្សអន្តរជាតិនេះបន្តថា មានជនរងគ្រោះជាច្រើន ដែលត្រូវគេវាយឱ្យរងរបួស ដោយមន្ត្រីប៉ូលីសដែលអង្គការនេះថា ជារឿងធម្មតាទៅហើយ សម្រាប់ប៉ូលិសដែលចាប់សកម្មជនដាក់ចូលក្នុងរថយន្តនៅពេលដែល មានការធ្វើតវ៉ានៅតាមដងវិថី។
លោក ប្រេដ អាដាម នាយកប្រតិបត្តិនៃអង្គការឃ្លាំមើលសិទ្ធិមនុស្សនៅអាស៊ី បាននិយាយថា៖ « រដ្ឋាភិបាលប្រទេសវៀតណាម គួរតែយោគយល់និងអត់ឱន គឺមិនត្រូវមានការបង្ក្រាបដោយអំពើហឹង្សានេះ នឹងនាំទៅដល់ការល្មើសច្បាប់ និងធ្វើឱ្យសង្គមអាចធ្លាក់ក្នុងស្ថានវឹកវរ»។
ក្រុមសិទ្ធិមនុស្សបាននិយាយថា យ៉ាងតិចសកម្មជន ១១២ នាក់ ក្នុង នោះមានទាំងអ្នកសរសេរប្លុក និងសកម្មជនជាច្រើនរូបត្រូវចាប់បញ្ជូលចូលពន្ធនាគារនៅប្រទេសវៀតណាមចាប់តាំងពីឆ្នាំ២០១៥។ ក្រុមសិទិ្ធមនុស្សបាននិយាយថាសកម្មជន ៣៦នាក់ នេះរង ការវាយដំធ្វើទារុណកម្ម ដោយប៉ូលីសហើយ ពួកគេរងការផ្តន្ទាទោសធ្ងន់ធ្ងរក្រោមច្បាប់សន្តិសុខ ជាតិវៀតណាម៕
