នៅថ្ងៃអាទិត្យ ទី១៨ ខែមិថុនា ឆ្នាំ២០១៧ កម្ពុជាបានប្រារព្ធទិវារត់ប្រណាំងភ្នំពេញពាក់កណ្ដាល ម៉ារ៉ាតុងអន្ដរជាតិ លើកទី៧ ដើម្បីអបអរសាទរព្រះរាជពិធីបុណ្យចម្រើនព្រះជន្ម សម្ដេចព្រះមហាក្សត្រី ព្រះវររាជមាតា នរោត្តម មុនីនាថ សីហនុ ដោយមានការចូលរួមពីភ្ញៀវជាតិ និងអន្តរជាតិជាង៥០០០នាក់។ កម្មវិធីនេះគឺរៀបចំដោយ គណៈកម្មាធិការ ជាតិអូឡាំពិកកម្ពុជា (NOCC)។
នេះជាឆ្នាំទី៧ ហើយដែលកម្ពុជា បានរៀបចំការរត់ប្រណាំងភ្នំពេញពាក់កណ្ដាល ម៉ារ៉ាតុងអន្ដរជាតិ ដើម្បីអបអរសាទរព្រះរាជពិធីបុណ្យចម្រើនព្រះជន្ម សម្ដេចព្រះមហាក្សត្រី ព្រះវររាជមាតា នរោត្តម មុនីនាថ សីហនុ ថ្ងៃទី១៨ ខែមិថុនា ។
បន្ថែមពីនេះ ការរៀបចំកម្មវិធីនេះឡើង ដើម្បីចូលរួមផ្សព្វផ្សាយពីបរិស្ថាន ស្អាត ទីក្រុងស្អាត និងបៃតង ដល់ប្រជាពលរដ្ឋ ក៏ដូចជាការទាក់ទាញភ្ញៀវទេសចរណ៍។
ជាមួយគ្នានេះ ការប្រារព្ធទិវារត់ប្រណាំងក៏ ដើម្បីយកថវិកាជួយមន្ទីរពេទ្យគន្ធបុប្ផាផងដែរ ។ ចំពោះថវិកាទទួលបាន ពីការចុះឈ្មោះ បន្ទាប់ពីចំណាយលើការរៀបចំរួចរាល់ហើយ គណៈកម្មការនឹង បរិច្ចាគជូនដល់មន្ទីរពេទ្យគន្ធបុប្ផា។
ទិវារត់ប្រណាំង ពាក់កណ្ដាល ម៉ារ៉ាតុងអន្ដរជាតិ នេះ បានចាប់ផ្តើមតាំងពីព្រឹក នៅមុខបរមរាជវាំង។
លោក ប៉ា សុជាតិវង្ស គឺជាអ្នកបាញ់កាំភ្លើងបញ្ជាចេញដំណើរលើវិញ្ញាសារត់ចម្ងាយ ២១គីឡូម៉ែត្រ ។
មុនបាញ់កាំភ្លើងបញ្ជាចេញដំណើរលោកក៏បានស្នើឱ្យកីឡាករ កីឡាការិនីជាតិ និងអន្ដរជាតិទាំងអស់ដែលបានចូលរួមប្រកួត ត្រូវគោរពបទបញ្ជាការប្រកួត និងគោរពគ្នាទៅវិញទៅមក និងហាមដាច់ខាតការប្រជែងគ្នាដោយបង្កឧបសគ្គដល់អ្នកដៃ ឬបន្លំដើម្បីឈ្នះ ។ ពិសេសគឺការប្រុងប្រយ័ត្នលើផ្លូវរត់រាល់ឧបសគ្គផ្សេងៗ ដែលអាចកើតគ្រោះថ្នាក់ជាយថាហេតុ ។
មុននឹងការរត់ប្រណាំងចេញដំណើរ លោក ប៉ា សុជាតិវង្ស បានថ្វាយព្រះពរ សម្ដេចព្រះមហាក្សត្រី ព្រះវររាជមាតាជាតិខ្មែរផងដែរ។
វិញ្ញាសារសម្រាប់ការរត់ប្រណាំងនេះ មានចំងាយ២១គីឡូម៉ែត្រ ១០គីឡូម៉ែត្រ និង ៣គីឡូម៉ែត្រ។
កីឡាករ កីឡារការនី ដែលទទួលបានចំណាត់ថ្នាក់ពីលេខ១ ដល់លេខ៣ លើវិញ្ញាសារទាំង៣ប្រភេទនេះ គឺទទួលបានរង្វាន់ទូរស័ព្ទដៃចំនួន១គ្រឿង ថវិកាមួយចំនួន ប័ណ្ណសរសើរ បំពាក់មេដាយ រួមទាំងភេសជ្ជៈជាច្រើនផ្សេងទៀត។ចំពោះចំណាត់ថ្នាក់លេខ១លើវិញ្ញាសាររត់ចំងាយ២១គម ទទួលបានបន្ថែមនូវសំបុត្រយន្តហោះធ្វើដំណើរទៅមកប្រទេសជប៉ុន។
ទិវារត់ប្រណាំងភ្នំពេញពាក់កណ្ដាលម៉ារ៉ាតុងអន្ដរជាតិឆ្នាំនេះមានអ្នកចូលរួមសរុប ៥,៣៥២នាក់ ក្នុងនោះមានប្រជាពលរដ្ឋខ្មែរ ៤,៨២៩នាក់ និងជនបរទេសចំនួន ៥២៣នាក់ មកពី ៣៣ប្រទេស ។ ចំនួននេះ កើនឡើងប្រមាណ ២០% បើធៀបនឹងកាលពីឆ្នាំ២០១៦កន្លងទៅ៕
