ភ្នំពេញ៖ នៅមុនការចាប់ផ្តើមប្រកាសលទ្ធផលបោះឆ្នោតជ្រើសរើសក្រុមប្រឹក្សាឃុំសង្កាត់ គណៈកម្មាធិការជាតិរៀបចំការបោះឆ្នោតបានបង្ហាញពីនិតិវិធីជ្រើសរើសមេភូមិ និងជំនួយការភូមិ។
យោងតាមសេចក្តីប្រកាសរបស់ក្រសួងមហាផ្ទៃកាលពីឆ្នាំ២០០៦ ដែលត្រូវ គ.ជ.ប ផ្សព្វផ្សាយឡើងវិញនៅថ្ងៃនេះ បានបង្ហាញថា ក្រុមប្រឹក្សាឃុំសង្កាត់មានសិទ្ធិបោះឆ្នោតជ្រើសរើសមេភូមិ។ ហើយត្រូវផ្តល់អាទិភាព ដល់បេក្ខជនជាស្ត្រី ប្រសិនបើមានការគាំទ្រស្មើគ្នាចំពោះបេក្ខជនដែលបានដាក់ពាក្យឈរឈ្មោះនោះ។
យោងតាមសេចក្តីណែនាំរបស់ក្រសួងមហាផ្ទៃ បេក្ខជនមេភូមិ ត្រូវមានសញ្ជាតិខ្មែរ មានឈ្មោះក្នុងបញ្ជីបោះឆ្នោតក្នុងឃុំ សង្កាត់ ដែលសាមីខ្លួនកំពុងរស់នៅ និងមានអាយុយ៉ាងតិច ២៥ឆ្នាំ គិតត្រឹមថ្ងៃដាក់ស្នើជាបេក្ខជនតំណែងមេភូមិ។ បន្ថែមពីនោះ បេក្ខជនត្រូវចេះអាន និងចេះសរសេរអក្សរខ្មែរ មានទីលំនៅអចិន្ដ្រៃយ៍ក្នុងភូមិដែលបានដាក់ពាក្យស្នើជាបេក្ខជននេះយ៉ាងតិច ៦ឆ្នាំជាប់គ្នា៕
