ឆ្លើយតបនឹងការស្នើសុំខ្ចីផែនទីកម្ពុជារបស់ លោកនាយករដ្ឋមន្រ្តី ហ៊ុន សែន លោក ដេវីត កាំម៉េរុន (David Cameron) នាយករដ្ឋមន្រ្តីអង់គ្លេស បានឱ្យដឹងថារដ្ឋាភិបាលអង់គ្លេស មិនមានផែនទីដែលកម្ពុជាស្នើសុំនោះទេ។ ប៉ុន្តែក្នុងលិខិតដដែលរបស់នាយករដ្ឋមន្រ្តីអង់គ្លេស ចុះថ្ងៃទី២១ខែសីហាបានបញ្ជាក់ថា រដ្ឋាភិបាលអង់គ្លេសមានផែនទី៣ឈុតដែលបោះពុម្ពដោយក្រុមភូមិសាស្រ្តឥណ្ឌូចិនចន្លោះឆ្នាំ១៩៣៣-១៩៥៣ ដែលមាននៅបណ្ណាល័យសាធារណៈរបស់ប្រទេសអង់គ្លេស។
យោងតាមលិខិតរបស់នាយករដ្ឋមន្រ្តីអង់គ្លេស ចុះថ្ងៃទី២១ខែសីហាដែលបានផ្សព្វផ្សាយដោយរដ្ឋាភិបាលកម្ពុជាបានបញ្ជាក់ថា លោក ដេវីត កាំម៉េរុន បានឱ្យមន្រ្តីរបស់លោកស្វែងរកផែនទីនៅកន្លែងរក្សាឯកសាររបស់ជាតិ ប៉ុន្តែលោកថា មន្រ្តីរបស់លោករកមិនឃើញនោះទេ។
លិខិតដដែលបន្តថា មានផែនទីចំនួន៣ឈុត បោះពុម្ពដោយក្រុមភូមិសាស្ត្រឥណ្ឌូចិន ខ្នាត១/១០០.០០០ បានរក្សាទុកក្នុងបណ្ណាល័យសាធារណៈនៅអង់គ្លេស ហើយផែនទីទាំងនេះ គឺជាឯកសារដែលអាចរកបានជាសាធារណៈ ដែលតំណាងស្ថានទូតកម្ពុជានៅអង់គ្លេសអាចរកបាន ប្រសិនបើចង់បាន។
ក្នុងលិខិតឆ្លើយតបទៅកាន់លោកនាយករដ្ឋមន្រ្តីអង់គ្លេស ចុះថ្ងៃទី ២៤ សីហា លោកនាយករដ្ឋមន្រ្តី ហ៊ុន សែនបានឱ្យដឹងថា ក្នុងចំណោមផែនទីទាំងបី បោះពុម្ពដោយក្រុមភូមិសាស្ត្រឥណ្ឌូចិន ដែលលោកដេវីត កាំមេរ៉ុន បានបញ្ជាក់ថា មាននៅក្នុងបណ្ណាល័យអង់គ្លេសនោះ អាចនឹងមានផែនទីមួយចំនួនដែលមានប្រយោជន៍សម្រាប់ការងារផ្ទៀងផ្ទាត់ផែនទីរបស់រាជរដ្ឋាភិបាលកម្ពុជា។ លោកបន្តថា លោកបានផ្តល់ការណែនាំរួចហើយដល់អគ្គរាជទូតកម្ពុជានៅទីក្រុងឡុង ឱ្យស្វែងរកផែនទីទាំងនោះរួចបញ្ជូនមកកម្ពុជា ដើម្បីរដ្ឋាភិបាលមានចំណាត់ការបន្ត។
ក្នុងលិខិតថ្លែងអំណរគុណដល់រដ្ឋាភិបាលអង់គ្លេសនេះដែរ លោកនាយករដ្ឋមន្រ្តី ហ៊ុន សែន លើកឡើងដែរថា ផែនទីដែលរាជរដ្ឋាភិបាលកម្ពុជា បាននិងកំពុងប្រើប្រាស់ជាផ្លូវការក្នុងការកំណត់ និងការបោះបង្គោលព្រំដែនជាមួយវៀតណាម គឺមានលក្ខណៈត្រឹមត្រូវ និងស្របទាំងស្រុងតាម
គតិច្បាប់ ហើយត្រូវបានទទួលស្គាល់ និងអនុញ្ញាតឱ្យប្រើដោយព្រះរាជក្រម ចុះថ្ងៃទី៣០ ខែវិច្ឆិកា ឆ្នាំ២០០៥។
លោក ហ៊ុន សែន ក៏បានរំឭកឡើងវិញផងដែរ អំពីសារៈសំខាន់នៃផែនទីដែលរដ្ឋាភិបាលកម្ពុជាកំពុងស្វែងរក ដើម្បីបង្ហាញអំពីតម្លាភាពនិងការទទួលខុសត្រូវរបស់រដ្ឋាភិបាលរបស់លោក ក្នុងការកំណត់ព្រំដែនជាមួយប្រទេសជិតខាង និងដើម្បីបញ្ចប់គំនិតញុះញង់ជាតិនិយមជ្រុលពីសំណាក់កម្លាំងនយោបាយមួយចំនួន។
គួររម្លឹកថា កាលពីថ្ងៃទី១៥ កក្កដា លោកនាយករដ្ឋមន្រ្តី ហ៊ុន សែន បានសរសេរលិខិតមួយទៅថ្នាក់ដឹកនាំប្រទេសមហាអំណាចចំនួន៣ គឺបារាំង អង់គ្លេសនិងសហរដ្ឋអាមេរិក ដោយស្នើសុំខ្ចីផែនទីនិងសុំជំនួយជាអ្នកជំនាញខាងផែនទី ដើម្បីជួយកម្ពុជាក្នុងការផ្ទៀងផ្ទាត់ផែនទីដែលរដ្ឋាភិបាលកំពុងតែប្រើប្រាស់សព្វថ្ងៃ។ ក្នុងលិខិតស្នើសុំខ្ចីដល់រដ្ឋាភិបាលអង់គ្លេស លោកនាយករដ្ឋមន្ត្រី ហ៊ុន សែន បានសរសេរ ព្រះបរមរតនកោដ្ឋធ្លាប់មានទំនាក់ទំនងជាមួយអង់គ្លេសលើការផ្ញើផែនទីនេះ ដូច្នេះប្រទេសអង់គ្លេសអាចនឹងមានផែនទីរបស់កម្ពុជា។ លិខិតបញ្ជាក់ថា ក្នុងករណីដែលអង់គ្លេសមានផែនទីដែលទទួលបានពីរដ្ឋាភិបាលកម្ពុជានាទស្សវត្សរ៍ឆ្នាំ១៩៦០ កម្ពុជាសុំស្នើខ្ចីផែនទីទាំងអស់នោះ និងស្នើសុំអ្នកឯកទេសខាងផែនទីមកជួយកម្ពុជាក្នុងការផ្ទៀងផ្ទាត់៕