ភំ្នពេញ៖ ស្របពេលដែលដំណើរការនៃការប្រឡងសញ្ញាបត្រមធ្យមសិស្សទុតិយភូមិ ឬហៅថាបាក់ឌុប កំពុងប្រព្រឹត្តទៅនាថ្ងៃទី ២៤ ខែសីហា ឆ្នាំ២០១៥ គេសង្កេតឃើញថានៅ មណ្ឌលប្រឡងនីមួយៗ មានសភាពស្ងបស្ងាត់គួរឲ្យកត់សម្គាល់។ ដោយឡែក ទិដ្ឋភាពនៅខាងក្រៅអាគារនៃមណ្ឌលប្រឡងវិញ មានម្តាយឪពុក អាណាព្យាបាល បងប្អូនរបស់សិស្សជាច្រើននាក់ ខ្លះឈរ ខ្លះអង្គុយ កំពុងរងចាំកូនចៅនិងសាច់ញាតិរបស់ខ្លួនចេញពីមណ្ឌលប្រឡង ដោយម្នាក់ក្នុងចិត្តហាក់ដូចរសាប់រសល់ភ័យអរជំនួសបេក្ខជន។ ពួកគាត់បានលើកឡើងស្រដៀងៗគ្នាថា ប្រឡងបាក់ឌុបឆ្នាំនេះ មានសភាពស្ងាត់ល្អ ប៉ុន្តែក្នុងចិត្តពុំស្ងប់សុខសោះ ព្រោះតែការប្រឡងតឹងរ៉ឹង និងមិនមានការប្រឡងលើកទី ២ ដូចឆ្នាំកន្លងទៅ។
កំពុងអង្គុយលើម៉ូតូម៉ាកឌ្រីមសង់ពណ៌ខ្មៅ អ្នកស្រី ជា ចាន់ធូ ជាអាណាព្យាបាលសិស្សម្នាក់ប្រឡងនៅមណ្ឌលសន្ធរម៉ុក មកពីខណ្ឌសែនសុខ បានលើកឡើងថា៖ «មិនយ៉ាងម៉េចទេ អារម្មណ៍ចេះតែភ័យអរៗ… ខ្ញុំពេញចិត្តចំពោះការធ្វើកំណែទម្រងរបស់ក្រសួងអប់រំក្នុងការប្រឡងទី ១២ នៅឆ្នាំនេះ ប៉ុន្តែការអនុវត្តន៍របស់ក្រសួងអប់រំហាក់ដូចជាប្រញាប់ប្រញាល់ពេក។ ការប្រឡងនេះ មិនអាចឱ្យសិស្សត្រៀមខ្លួនគ្រប់គ្រាន់បានឡើយ ហើយក្រសួងគួរណាស់តែរឹតបន្តឹងពីថ្នាក់ទាបៗសិនបានល្អ… ភ័យខ្លាចកូនធ្លាក់ដែរ ចេះតែមកលើកទឹកចិត្តកូនទៅ កុំកូនឱ្យភ័យ»។
មានអាយុ ៥៣ ឆ្នាំ មកពីតំបន់ផ្លូវទំនប់កប់ស្រូវ សង្កាត់គោករកា ខណ្ឌដង្កោ អ្នកស្រី សុខ បាននិយាយទាំងភ័យផងអរផងថា ការប្រឡងឆ្នាំនេះ អ្នកស្រីភ័យអរជំនួសកូនយ៉ាងខ្លាំង ព្រោះការប្រឡងតឹងតែងជាងឆ្នាំមុនៗ ហើយសូម្បីតែការប្រឡងលើកទី ២ ឡើងវិញក៏គ្មាន។ អ្នកស្រីបានបញ្ជាក់ថា មុននឹងមកប្រឡងនេះ អ្នកស្រីបានខិតខំបន់ស្រន់សុំឱ្យកូនអាចធ្វើបានគ្រប់វិញ្ញាសារ ទោះជាស្ថិតនៅក្នុងជំនឿអរូបីក៏ដោយ ក៏នៅតែព្យាយាមធ្វើវាឱ្យអស់ចិត្តដែរ។
«ឆ្នាំនេះវាខុសប្លែកជាងឆ្នាំកន្លងទៅ ឥឡូវតឹងតែងស្ងប់ស្ងាត់ណាស់មិនដឹងយ៉ាងម៉េចទេអ្នកប្រឡង… ទឹកចិត្តម៉ែឪរឿងបារម្ភវាបារម្ភហើយសម្រាប់កូន ប៉ុន្តែមិនដឹងធ្វើម៉េចមានពឹងលើចំណេះរបស់កូន… បើធ្វើត្រូវទៅជាប់ ហើយបើធ្លាក់ក៏មិនដឹងធ្វើម៉េចដែរ ឮថាអត់ឆ្នាំមុនប្រឡងឡើងវិញផង។ កន្លងទៅ ខ្ញុំធ្លាប់ជូនកូនមកប្រឡងពីរដងដែរ តែដូចជាអ៊ូអរជាងនេះមិនសូវភ័យ ដល់ពេលនេះភ័យដែរហ្នឹង…»។ នេះបើតាមការឱ្យដឹងពីលោក សារឿន អាណាព្យាបាលសិស្សមានទីលំនៅសង្កាត់ចោមចៅ កំពុងអង្គុយសម្លឹងមើលទៅកាន់មាត់ទ្វាចេញចូលវិទ្យាល័យសន្ធរម៉ុក។
មិនខុសពីឪពុកម្តាយ និងអាណាព្យាបាលសិស្សខាង លោក លី ស៊ា មានកូនប្រុសប្រឡងនៅថ្ងៃនេះម្នាក់ដែរនោះ បានលើកឡើងថា ក្រសួងអប់រំធ្វើបែបនេះពិតជាល្អ ប៉ុន្តែលោកសង្ឃឹមតិចណាស់ចំពោះលទ្ធផលកូន ព្រោះកូនបានប្រាប់ថារូបគេមិនសូវមានសង្ឃឹមសោះចំពោះការប្រឡង។ លោកបានបន្ថែមថា អ្វីដែលខ្ញុំជាឪពុកអាចជួយគេបាន គឺបានត្រឹមតែមកលើកទឹកចិត្ត និងប្រាប់ទៅកាន់កូនឱ្យប្រឹងធ្វើឱ្យអស់ពីសមត្ថភាពតែប៉ុណ្ណោះ។
អ្នកចូលរួមសង្កេតការណ៍ក្នុងដំណើរការប្រឡងបាក់ឌុបរបស់អង្គភាពប្រឆាំងអំពើពុករលួយ យុវជន រង្សី បានឱ្យដឹងថា៖ «តាមខ្ញុំដឹងការប្រឡងនេះ ប្រសិនបើបេក្ខជនមានការបើកសំណៅឯកសារមើលអ៊ីចឹង ឬមិនឱ្យទូរស័ព្ទទៅគ្រូអនុរក្សរក្សាទុក បេក្ខជននោះអាចធ្លាក់។ ឆ្នាំនេះហាក់ស្ងាត់ល្អ សម្រាប់ខ្ញុំ ខ្ញុំមានសិទ្ធិត្រឹមមើលបេក្ខជនទាំងអស់ នឹងប្រាប់ទៅកាន់គ្រូអនុរក្ស ប៉ុន្តែមិនអាចចាប់បាននោះទេ ទាល់តែមានភស្តុតាងពិតប្រាកដទើបចាប់បាន។
នាព្រឹកថ្ងៃទី ២៤ ខែសីហា ឆ្នាំ ២០១៥ នេះដែរ លោក ហង់ ជួន ណារ៉ុន រដ្ឋមន្ត្រីក្រសួងអប់រំយុវជននិងកីឡា បន្ទាប់ពីការចូលរួមបើកវិញ្ញាសារនិងពិនិត្យដំណើរការទូទៅនៃការប្រឡងនៅវិទ្យាល័យព្រះស៊ីសុវត្ថិ រួចបានផ្ដល់បទសម្ភាសន៍ដល់បណ្ដារសារព័ត៌មានក្នុងស្រុកពីទិដ្ឋភាពទូទៅនៃដំណើរប្រឡងនាព្រឹកថ្ងៃទី ១ នេះថាចំណុចបួនសំខាន់ៗ នៃការកត់សម្គាល់ក្នុងការប្រឡងបាក់ឌុបក្នុងឆ្នាំនេះ៖
១. មានការវិវត្តន៍មួយជំហានទៀត ដោយបេក្ខជនមកដល់មណ្ឌលប្រឡងមុនម៉ោង ពុំមាននាំយកទូរសព្ទ សៀវភៅ ឬសំណៅវិញ្ញាសារជាប់ខ្លួន។
២. សិស្សានុសិស្សដើរចូលក្នុងបន្ទប់ប្រឡង ដោយមានភាពស្វាហាប់ និងជឿជាក់លើខ្លួនឯង។
៣. ជុំវិញមណ្ឌលប្រឡងមានភាពស្ងប់ស្ងាត់ ដោយពុំមានការលក់សៀវភៅ ឬសំណៅវិញ្ញាសារផ្សេងៗ។
៤. មានការសហការល្អពីគ្រប់ភាគីពាក់ព័ន្ធ។
គួររម្លឹកថា ការប្រឡងសញ្ញាបត្រមធ្យមសិក្សាទុតិយភូមិឆ្នាំនេះ ក្រសួងអប់រំបានឱ្យដឹងថា មិនមានការរៀបចំប្រឡងលើកទី ២ សម្រាប់បេក្ខជនដែលធ្លាក់ឡើយ។ ឆ្នាំសិក្សា ២០១៣ - ២០១៤ កន្លងទៅ ក្រសួងអប់រំយុវជននិងកីឡា បានរៀបចំការប្រឡងបាក់ឌុបលើកទី ២ ក្រោមហេតុផលការប្រឡងមានការរឹតបន្តឹងលើកទី ១ មានបេក្ខជនធ្លាក់ច្រើន៕
