ភ្នំពេញ៖ អ្នកនាំពាក្យគណៈកម្មាធិការជាតិរៀបចំការបោះឆ្នោត គ.ជ.បបានឱ្យដឹងថា គណបក្សប្រជាជាជនកម្ពុជាបានប្ដឹងមក គជប មានចំនួនច្រើនជាងគេ បើធៀបនឹងគណបក្សផ្សេងៗទៀត គឺ មាន ៤៨ពាក្យបណ្ដឹង។
លោកហង្សពុទ្ធាបានប្រាប់អ្នកសារព័ត៌មានថា គិតមកដល់ ថ្ងៃទី៣០ ឧសភា គ.ជ.ប បានទទួលពាក្យបណ្ដឹង ចំនួន ៦៥ បណ្ដឹង ហើយ មានតែ ៣គណបក្ស ដែលបានដាក់ពាក្យបណ្ដឹង គឺ ក្នុងនោះ គណបក្សប្រជាជនកម្ពុជា ៤៨បណ្ដឹង គណបក្សសង្គ្រោះជាតិ ១៤ បណ្ដឹង គណបក្សហ្វ៊ុនស៊ិនប៉ិច ១បណ្ដឹង និងពលរដ្ឋបានប្ដឹងចំនួន ២ បណ្ដឹង។
តាមការបញ្ជាក់របស់លោក ហង្ស ពុទ្ធា ពាក្យបណ្តឹទាំងនោះប្ដឹងទៅលើបញ្ហា មិនឲ្យជូនដំណឹង ៣ថ្ងៃមុនការដង្ហែក្បួនឃោសនា មិនគោរពប្រតិទិនការហែឆ្លងឃុំ ការរារាំង ការជេរប្រមាថ។ លោក បន្តថា គណៈកម្មាធិការរៀបចំបោះឆ្នោតដោះស្រាយបាន ២៤ បណ្ដឹង។ តែលោកថា បើធៀបនឹងអាណត្តិមុន គឺ គ.ជ.ប ទទួលបានពាក្យបណ្ដឹងដល់ទៅ ៤០០០ បណ្ដឹង។
ដំណើរឃោសនាបោះឆ្នោតក្រុមប្រឹក្សាឃុំ-សង្កាត់ មានរយៈពេល១៤ថ្ងៃ គឺ ចាប់ពីថ្ងៃទី ២០ ខែឧសភា ដល់ថ្ងៃទី ២ ខែមិថុនា៕
