ភ្នំពេញ៖ តាមរយៈហ្វេសប៊ុករបស់សម្ដេច ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា បានលើកឡើងថា គណបក្សប្រជាជនកម្ពុជា គឺ ជាគណបក្សតែមួយគត់ដែលបានរំដោះប្រទេសពីរបបប្រល័យពូជសាសន៍ខ្មែរក្រហមប៉ុលពត នៅឆ្នាំ ១៩៧៩ ។
ការលើកឡើងរបស់សម្ដេច ហ៊ុន សែន ដូចនេះ គឺ នៅថ្ងៃទី២៦ ឧសភា ឆ្នាំ២០១៧នេះ។
ខ្លឹមសារដែលសម្ដេចហ៊ុន សែន បានបង្ហោះនៅលើទំព័រហ្វេសប៊ុករបស់លោក មានដូចថា៖ “គណបក្សប្រជាជនកម្ពុជា” តែមួយគត់ដែលបានបញ្ចប់សង្គ្រាមស៊ីវិលទាំងស្រុង និងបាននាំមកនូវសន្តិភាពពេញលេញសម្រាប់កម្ពុជាទាំងមូល និងមានតែ “គណបក្សប្រជាជនកម្ពុជា” តែមួយគត់ដែលទទួលបានការគាំទ្រពីបងប្អូនប្រជាពលរដ្ឋទូទាំប្រទេសបោះឆ្នោតជ្រើសតាំងអោយដឹកនាំកម្ពុជា រហូតមានការរីកចម្រើនមកទល់សព្វនឹងថ្ងៃ។
ការលើឡើងរបស់សម្ដេច ហ៊ុន សែនដូចនេះនៅលើបណ្ដាញសង្គមហ្វេសប៊ុករបស់សម្ដេច គឺ ចំពេលសម្ដេច អំពាវនាវអោយពលរដ្ឋ បោះឆ្នោតឱ្យគណបក្សប្រជាជននៅក្នុងការបោះឆ្នោតក្រុមប្រឹក្សាឃុំ-សង្កាត់ នៅខែក្រោយនេះ។
ការបោះឆ្នោតក្រុមប្រឹក្សាឃុំ-សង្កាត់នឹងប្រព្រឹត្តទៅនៅថ្ងៃទី ៤ មិថុនា ឆ្នាំ២០១៧ ។ អ្នកវិភាគពីបញ្ហាសង្គម និងអង្គការសង្គមស៊ីវិល រំពឹងថា ថ្ងៃបោះឆ្នោតខាងមុខ ពលរដ្ឋនឹងប្រើសន្លឹកឆ្នោតរបស់ខ្លួនជ្រើសរើសមេដឹកនាំដែលខ្លួនពេញចិត្ត ៕
