ភ្នំពេញ៖ នាយករដ្ឋមន្ត្រីសម្តេច ហ៊ុន សែន បានប្រកាសឈប់ផ្តល់អំណោយជាបណ្តោះអាសន្នក្នុងកំឡុងយុទ្ធនាការឃោសនាបោះឆ្នោតក្រុមប្រឹក្សាឃុំសង្កាត់អាណត្តិទី៤ ឆ្នាំ២០១៧នេះ ដោយសំអាងថា ខុសច្បាប់ស្តីពីការបោះឆ្នោត។
ការលើកឡើងរបស់នាយករដ្ឋមន្ត្រីដូចនេះធ្វើឡើងនៅក្នុងឪកាសជួបសំណេះសំណាលជាមួយគ្រីស្ទបរិស័ទ ដើម្បីសុខដុមនីយកម្មវិស័យគ្រីស្ទសាសនានៅកម្ពុជា នៅមជ្ឈមណ្ឌលកោះពេជ្រថ្ងៃទី២៥ ឧសភា ឆ្នាំ២០១៧នេះ។
សម្តេច ហ៊ុន សែន បន្តថា លោកមិនអាចធ្វើការផ្តល់អំណោយអ្វីមួយតបតាមការស្នើសុំរបស់ពលរដ្ឋទេក្នុងអំឡុងពេលគណបក្សនយោបាយកំពុងដំណើរការឃោសនារកសំលេងឆ្នោត។ សម្តេចបន្តថា សម្តេចមិនហ៊ានផ្តល់អំណោយណាមួយនោះទេ ព្រោះអាចមានអ្នកប្តឹងក្នុងករណីនេះ ហើយប្រការនេះក៏ទាស់នឹងច្បាប់ស្តីពីការបោះឆ្នោតផងដែរ។
មាត្រា ៥០ នៃក្រមសីលធម៌សម្រាប់មន្ត្រីបោះឆ្នោតនិងភាគីពាក់ព័ន្ធក្នុងដំណើរការបោះឆ្នោត ចែងថា ត្រូវផាកពិន័យជាប្រាក់ពី ៥លានរៀល ទៅ១០លានរៀលឬនឹងត្រូវលុបឈ្មោះចេញពីបញ្ជីបោះឆ្នោត សម្រាប់រយៈពេល៥ឆ្នាំ ដោយគ.ជ.ប ពុំទាន់គិតដល់ទោសព្រហ្មទណ្ឌផ្សេងទៀត ចំពោះជនណា ដែលបង្គាប់ បញ្ជា លួងលោម បោកបញ្ឆោត ឬធ្វើសកម្មភាពតាមគ្រប់មធ្យោបាយទុច្ចរិតផ្សេងទៀតឱ្យអ្នកបោះឆ្នោត បោះឆ្នោតជ្រើសរើសយកគណបក្សនយោបាយផ្ទុយពីឆន្ទៈរបស់ជននោះ។
ជាការកត់សម្គាល់ នាយករដ្ឋមន្ត្រីតែងតែអំណោយជា អគារសិក្សា និងអគារផ្សេងៗដែលបំរើដល់ប្រយោជន៍សាធារណនៅពេលចុះជួបប្រជាពលរដ្ឋ តាមការស្នើសុំពីពលរដ្ឋ៕
