ភ្នំពេញ៖ នាយករដ្ឋមន្រ្តីសម្តេច ហ៊ុន សែន បានប្រកាសឈប់ផ្តល់អំណោយជាបណ្តោះអាសន្នក្នុងកំឡុងយុទ្ធនា ការឃោសនាបោះឆ្នោតក្រុមប្រឹក្សាឃុំសង្កាត់អាណត្តិទី៤ ឆ្នាំ២០១៧នេះ ដោយសំអាងថា ខុសច្បាប់ស្តីពីការបោះឆ្នោត។
ការលើកឡើងរបស់នាយករដ្ឋមន្រ្តីដូចនេះធ្វើឡើងនៅក្នុងឪកាសជួបសំណេះសំណាល ជាមួយគ្រិស្តបរិស័ទ ដើម្បីសុខដុម នីយកម្មវិស័យគ្រិស្តសាសនានៅកម្ពុជា នៅមជ្ឈមណ្ឌលកោះពេជ្រថ្ងៃទី២៥ ឧសភា ឆ្នាំ ២០១៧ នេះ។
សម្តេច ហ៊ុន សែន បន្តថា លោកមិនអាចធ្វើការផ្តល់អំណោយអ្វីមួយតបតាមការស្នើសុំរបស់ពលរដ្ឋទេ ក្នុងអំឡុងពេលគណ បក្សនយោបាយកំពុងដំណើរការឃោសនារកសំលេងឆ្នោត។ សម្តេចបន្តថា សម្តេចមិនហ៊ានផ្តល់អំណោយណាមួយនោះទេ ព្រោះអាចមានអ្នកប្តឹងក្នុងករណីនេះ ហើយប្រការនេះក៏ទាស់នឹងច្បាប់ស្តីពីការបោះឆ្នោតផងដែរ។
ជាការកត់សម្គាល់ នាយករដ្ឋមន្រ្តីតែងតែផ្តល់អំណោយជា អគារសិក្សា និងអគារផ្សេងៗដែលបំរើដល់ប្រយោជន៍ សាធារណ នៅពេលចុះជួបប្រជាពលរដ្ឋ តាមការស្នើសុំពីពលរដ្ឋ។
មាត្រា ៥០ នៃក្រមសីលធម៌សម្រាប់មន្រ្តីបោះឆ្នោតនិងភាគីពាក់ព័ន្ធក្នុងដំណើរការបោះឆ្នោត ចែងថា ត្រូវផាកពិន័យជាប្រាក់ ពី ៥លានរៀល ទៅ១០លានរៀលឬនឹងត្រូវលុបឈ្មោះចេញពីបញ្ជីបោះឆ្នោត សម្រាប់រយៈពេល៥ឆ្នាំ ដោយគ.ជ.ប ពុំទាន់ គិតដល់ទោសព្រហ្មទណ្ឌផ្សេងទៀត ចំពោះជនណា ដែលបង្គាប់ បញ្ជា លួងលោម បោកបញ្ឆោត ឬធ្វើសកម្មភាពតាម គ្រប់ មធ្យោបាយទុច្ចរិតផ្សេងទៀតឱ្យអ្នកបោះឆ្នោត បោះឆ្នោតជ្រើសរើសយកគណបក្សនយោបាយផ្ទុយពីឆន្ទៈរបស់ជននោះ៕
