ភ្នំពេញ៖ក្នុងយុទ្ធនាការឃោសនា បោះឆ្នោតក្នុងរយៈពេល៣ថ្ងៃកន្លងមកនេះ គណៈកម្មការឃុំ.សង្កាត់ រៀបចំការបោះឆ្នោត បានទទួលពាក្យបណ្ដឹងចំនួន ៥ ដែលប្តឹងដោយគណបក្សនយោបាយ។ នេះបើតាមការឱ្យដឹងពីលោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត។
បើតាមលោក ហង្ស ពុទ្ធា បណ្តឹងទាំងនោះ ពាក់ព័ន្ធនឹងការហែកខិត្តប័ណ្ណគណបក្ស និងការហែរក្បួនប៉ះគ្នាជាដើម។
លោកបន្តថា បណ្តឹងទាំងនោះ ភាគច្រើនបានដោះស្រាយនៅថ្នាក់ឃុំ សង្កាត់រួចហើយ មានតែបណ្តឹងប្តឹងផ្តល់គ្នា រវាងគណបក្សប្រជាជនកម្ពុជានិងគណបក្សសង្រ្គោះជាតិនៅស្រុកកោះអណ្ដែក ខេត្តតាកែវមួយករណីប៉ុណ្ណោះ ដែលបន្តប្តឹងដល់គណៈកម្មការខេត្តរៀបចំការបោះឆ្នោត។
ក្នុងការបោះឆ្នោតជ្រើសរើសប្រឹក្សា ឃុំ សង្កាត់អាណត្តិទី៤ ឆ្នាំ២០១៧នេះ បានកំណត់ឱ្យគណបក្សទាំងអស់ដែលចូលរួមប្រកួតប្រជែង ធ្វើការឃោសនារយៈពេល ១៤ថ្ងៃ។ តែយ៉ាងណាមិញ គ.ជ.ប អនុញ្ញាតឱ្យហែរក្បួនឃោសនាទ្រង់ទ្រាយធំបានតែ២ដងប៉ុណ្ណោះ។ ក្រៅពីនេះគណបក្សទាំងនោះអាច ដើរចែកខិត្តប័ណ្ណ ឬចាក់មេក្រូឃោសនានៅតាមទីស្នាក់ ទីសាធារណៈណាមួយដែលមិនមានការហាមឃាត់៕
