en     km
en     km

គ.ជ.ប ព្រមានដាក់ទោសមន្ដ្រីរាជការដែលខុសច្បាប់ក្នុងការឃោសនាបោះឆ្នោត (មានសំឡេង)

Share

ភ្នំពេញ៖ គណៈកម្មាធិការជាតិរៀបចំការបោះឆ្នោត បានព្រមានដាក់ទោសទណ្ឌមន្ដ្រីរាជការដែលប្រើឯសណ្ឋាន ឬយកម៉ោងធ្វើការរបស់ខ្លួនទៅឃោសនាបំរើឲ្យគណបក្សនយោបាយ។ ការព្រមានធ្វើឡើងមួយថ្ងៃប៉ុណ្ណោះ មុននឹងគណបក្សនយោបាយចំនួន១២ ចាប់ផ្តើមការឃោសនាស្វែងរកសំឡេងឆ្នោត។

nec
មន្ត្រីរាជការដែលប្រើប្រាស់ឯកសណ្ឋាន ឬយកម៉ោងការងាររបស់ខ្លួន ទៅធ្វើការឃោសនាសម្រាប់គណបក្សនយោបាយណាមួយ នឹងត្រូវពិន័យផ្នែករដ្ឋបាល ឬផាកពិន័យជាប្រាក់រហូតទៅដល់ ៣០លានរៀងឬស្មើនឹង ៧៥០០ដុល្លារអាមេរិក។ នេះជាការព្រមានរបស់គណកម្មាធិការជាតិរៀបចំការបោះឆ្នោត គជប នៅថ្ងៃសុក្រនេះ។
ការព្រមានធ្វើឡើងមួយថ្ងៃប៉ុណ្ណោះមុននឹងការឃោសនាស្វែងរកសំឡេងឆ្នោតរបស់គណបក្សយោបាយសម្រាប់ការបោះឆ្នោតជ្រើសរើសក្រុមប្រឹក្សាឃុំសង្កាត់។ការឃោសនាដែលមានរយៈពេល ១៤ថ្ងៃ គឺចាប់ពីថ្ងៃស្អែកទី២០ ឧសភា រហូតដល់ថ្ងៃទី២ ខែមិថុនា។

លោក ទេព នីថា អគ្គលេខាធិការ គ.ជ.ប
លោក ទេព នីថា អគ្គលេខាធិការ គ.ជ.ប

លោក ទេព នីថា អគ្គលេខាធិការ គជប បានប្រកាសក្នុងពិធីផ្សព្វផ្សាយស្តីពីការឃោសនាការបោះឆ្នោតថា មន្ត្រីរាជការដែលល្មើសនឹងបម្រាមរបស់ច្បាប់ នឹងទទួលរងការដាក់ពិន័យ ឬបើធ្ងន់ធ្ងរអាចនឹងត្រូវពិន័យជាប្រាក់ពី១០ទៅ៣០លានរៀល។«ទោសបញ្ញត្ដ សម្រាប់ច្បាប់បោះឆ្នោតទាំងពីរនេះទាំងបោះឆ្នោតតំណាងរាស្ដ្រ ទាំងបោះឆ្នោតឃុំសង្កាត់ ទោសបញ្ញត្ដកើនឡើងច្រើនណាស់ ដោយពិន័យជាប្រាក់ហ្នឹងពីមុនត្រឹម ៤-១០លានរៀល តែឥឡូវខ្លះច្រើនទៀតកើនដល់ ៣០លានរៀល»។

លោក ឯម សូផាត សមាជិក គ.ជ.ប បានថ្លែងថា មន្ដ្រីរាជការមានសិទ្ធិចូលរួមគាំទ្រ និងឃោសនាសម្រាប់គណបក្សនយោបាយ ប៉ុន្ដែមន្ដ្រីរាជការទាំងអស់ មិនត្រូវយកសំភារៈ របស់រដ្ឋ ថវិកា ឬក៏ម៉ោងបំពេញការងាររបស់ខ្លួនទៅបម្រើឲ្យការឃោសនាគណបក្សនយោបាយនោះឡើយ។ ជាមួយគ្នានេះលោកបន្ថែមថា មន្ដ្រីរាជការបើចេញឃោសនាបម្រើឲ្យបក្សនយោបាយនៅក្រៅម៉ោងការងារ គឺមិនត្រូវប្រើឯកសណ្ឋានរបស់រដ្ឋ ឬក៏យកអាវុធតាមខ្លួន ដែលជាហេតុបង្កការភិតភ័យដល់ពលរដ្ឋនោះឡើយ។

បន្ថែមពីលើនេះលោក ហង្ស ពុទ្ធា អ្នកនាំពាក្យ គ.ជ.ប បានបញ្ជាក់ប្រាប់វិទ្យុស្ដ្រីអេហ្វអឹម១០២ ថា គណៈកម្មាធិការជាតិរៀបចំការបោះឆ្នោត បានត្រៀមរួចជាស្រេចហើយនូវវិធានច្បាប់ ដើម្បីដាក់ពិន័យទៅមន្ដ្រីរាជការ ដែលប្រព្រឹត្ដល្មើសនឹងបម្រាមរបស់ គ ជ ប។ «វិធានការមានបីដំណាក់កាល ទី១ រំលឹកដោយធ្វើជាលិខិតជួនដំណឹង ហើយបើគាត់នៅតែបន្ដទៀតយើងនឹងធ្វើការផាក់ពិន័យ ហើយទី៣ យើងនឹងទាក់ទងទៅអង្គភាពរបស់គាត់ដើម្បីដាក់ពិន័យរដ្ឋបាល»។

លោក ហង្ស ពុទ្ធា អ្នកនាំពាក្យ គ.ជ.ប
លោក ហង្ស ពុទ្ធា អ្នកនាំពាក្យ គ.ជ.ប

ទន្ទឹមនឹងនេះអ្នកនាំំពាក្យគណៈកម្មាធិការជាតិរៀបចំការបោះឆ្នោតក៏បានសង្កត់ធ្ងន់ដែរថា ក្នុងករណីដែលមន្ត្រីរាជការប្រព្រឹត្តិបទល្មើសនឹងវិធានច្បាប់ជំហានបឋមអាចនឹងទទួលរងការព្រមាន ប៉ុន្តែក្នុងករណីដែលមានការបង្កហិង្សា ឬរបួសស្នាម មន្ត្រីរាជការដែលជាប់ពាក់ពន្ធ័អាចនឹងប្រឈមនឹងការប្តឹងទៅកាន់តុលាការ។
យ៉ាងណាលោក ឯម សូផាត សមាជិកគណៈកម្មាធិការជាតិរៀបចំការបោះឆ្នោតក៏បានទទូចដល់អាជ្ញាធរមូលដ្ឋានទាំងអស់ ជាពិសេសគឺមេឃុំ ត្រូវតែផ្ដល់ព័ត៌មានស្ដីពីការបោះឆ្នោតដល់ពលរដ្ឋដោយមិនត្រូវប្រកាន់និន្នាការនយោបាយនោះទេ។

សូមជម្រាបថា ការបោះឆ្នោតក្រុមប្រឹក្សា ឃុំ សង្កាត់ នឹងចាប់ផ្ដើមនៅថ្ងៃទី០៤ ខែមិថុនា ដែលមានគណបក្សនយោបាយចំនួន ១២ ចូលរួមប្រកួតប្រជែង ក្នុងឃុំ សង្កាត់ចំនួន ១៦៤៦។ គណបក្សទាំង១២ រួមមានគណបក្សខ្មែររួបរួមជាតិ គណបក្សសញ្ជាតិកម្ពុជា គណបក្សសាធារណរដ្ឋប្រជាធិបតេយ្យ គណបក្សយុវជនកម្ពុជា គណបក្សអំណាចខ្មែរ គណបក្សជនជាតិដើមប្រជាធិបតេយ្យកម្ពុជា គណបក្សសំបុកឃ្មុំសង្គមប្រជាធិបតេយ្យ គណបក្សសង្គ្រោះជាតិ គណបក្សហ្វ៊ុនស៊ីនប៉ិក គណបក្សប្រជាធិបតេយ្យមូលដ្ឋាន គណបក្សប្រជាជនកម្ពុជា និងគណបក្សសម្ពន្ធ័ដើម្បីប្រជាធិបតេយ្យ៕

Share

Image
Image
Image