ភ្នំពេញ ៖ លោក Sugano Yuichi ប្រធានទីភ្នាក់ងារ សហប្រតិបត្តិការ អន្តរជាតិជប៉ុន ហៅថា JICA បង្ហាញការសង្ឃឹមទុកជាមុនថា ការបោះឆ្នោតក្រុមប្រឹក្សាឃុំ សង្កាត់ ខែក្រោយនេះ នឹងជាព្រឹត្តិការណ៍ជោគជ័យមួយ។

លោកបានអះអាង ដូចនេះ ក្នុងសិក្ខាសាលាមួយស្ដីអំពីតួនាអ្នកសារព័ត៌មាន និងការបោះឆ្នោតដែលធ្វើឡើង នៅសណ្ឋាគារ Cambodiana នៅថ្ងៃព្រហស្បតិ៍នេះ។

ប្រធានទីភ្នាក់ងារ JICA បានបញ្ជាក់ថា ដើម្បីការងារបោះឆ្នោតជោគជ័យ ទៅបានក៏អាស្រ័យនឹង ការចូលរួមរបស់អ្នកសារ ព័ត៌មានផងដែរ។
លោកទទូចថា ដើម្បីគ្របដណ្ដប់ទៅលើការបោះឆ្នោតអ្នកសារព័ត៌មានគួរស្វែងយល់អំពីនីតិវិធីច្បាប់និងបែបបទនៃការបោះឆ្នោតដែលនាំឱ្យការបោះឆ្នោតបានជោគជ័យជាបន្ដបន្ទាប់ហើយ ជាពិសេស អ្នកសារព័ត៌មាននិង គ.ជ.ប ត្រូវមានទំនាក់ ទំនងល្អជាមួយគ្នា។

នៅពេលជាមួយគ្នានេះដែរ លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត(គ.ជ.ប) បានទទូចឱ្យអ្នកសារព័ត៌មាន ប្រកាន់ខ្ជាប់ វិជ្ជាជីវៈរបស់ខ្លួនដោយឥតលម្អៀង។

លោក ហង្ស ពុទ្ធា ៖ «ភាពត្រឹមត្រូវរបស់អ្នកសារព័ត៌មានគឺ ត្រូវអព្យាក្រឹត្យ ហើយផ្សាយព័ត៌មានដោយឯករាជ្យ ក្នុងនោះអ្នកព័ត៌មានមិនត្រូវទទួលសំណូក មិនត្រូវលម្អៀងទៅរកភាគីណាទេ »។
តែសូមជម្រាបថា ប្រព័ន្ធទិន្នន័យបញ្ជីឈ្មោះបោះឆ្នោត លើកនេះ ធ្វើឡើងដោយ កុំព្យូទ័រ គឺជាការជំនួយបច្ចេកទេសពីប្រទេសជប៉ុន និងសហភាពអឺរ៉ុប៕