លោករដ្ឋមន្ដ្រីក្រសួងសាធារណការបានឱ្យដឹងថា ស្ពាយជ្រោយចង្វារដែលជាជំនួយរបស់ជប៉ុនក្នុងការស្ថាបនានឹងត្រូវជួសជុលឡើងវិញក្រោយពីការបោះឆ្នោតឃុំ -សង្កាត់។
លោក ស៊ុន ចាន់ថុល បានបញ្ជាក់ដូចនេះ ទៅកាន់អ្នកសារព័ត៌មានក្រោយពីកិច្ចប្រជុំជាមួយរដ្ឋមន្ត្រីដែនដីហេដ្ឋារចនាសម្ព័ន្ធដឹកជញ្ជូន និងទេសចរណ៍ជប៉ុន កាលពីថ្ងៃសុក្រទី០៥ ខែឧសភា ឆ្នាំ២០១៧ នៅរាជធានីភ្នំពេញ។
លោករដ្ឋមន្ដ្រីបានបញ្ជាក់ថា តាមគម្រោងការជួសជុលស្ពានជ្រោយចង្វារត្រូវធ្វើឡើងនៅរវាងខែមករា ឬខែកុម្ភៈ ឆ្នាំ២០១៧ ប៉ុន្ដែដោយមានការមមាញឹកខ្លាំងក៏ត្រូវលើកពេលជាហូរហែរ ទើបកំណត់ការសាងសង់ឡើងវិញនៅក្រោយការបោះឆ្នោតឃុំ -សង្កាត់។
ស្ពានជ្រោយចង្វារ គឺជាស្ពានមិត្តភាពកម្ពុជា – ជប៉ុន ។ ស្ពាននេះត្រូវបានស្ថាបនាតាំងពីសម័យសង្គមរាស្ដ្រនិយម។ ប៉ុន្ដែត្រូវបានបំផ្លាញកាលពីសម័យសង្គ្រាមដើមទស្សវត្សឆ្នាំ ១៩៧០ ។
ស្ពានជ្រោយចង្វារត្រូវបានតភ្ជាប់ឡើងវិញ តាមរយៈជំនួយរបស់ប្រទេសជប៉ុនដដែល គឺក្រោយពីកម្ពុជាទទួលបានសន្ដិភាពតាមរយៈកិច្ចព្រមព្រៀងទីក្រុងប៉រីស ១៩៩១ ៕
