សៀមរាប៖ ការលក់សំបុត្រចូលទស្សនាប្រាសាទអង្គរវត្តជូនទេសចរបរទេសបានកើនដល់៣៩,២លានដុល្លារអាមេរិកក្នុងរយៈពេលបួនខែ ដើមឆ្នាំ២០១៧នេះ។
យោងតាមរបាយការណ៍របស់ក្រសួងទេសចរណ៍ ចំណូលនេះបានកើនឡើងចំនួន៦០ភាគរយធៀបនឹងរយៈពេលដូចគ្នាកាលពីឆ្នាំមុន។ របាយការណ៍បញ្ជាក់បន្ថែមថា មានទេសចរបរទេសជាង៩៤ម៉ឺន៥ពាន់នាក់បានមកទស្សនាប្រាង្គប្រាសាទបុរាណខ្មែរចន្លោះពីខែមករាដល់ខែមេសា។
ចំនួនអ្នកទស្សនានេះ កើនចំនួន១១,៥ភាគរយបើធៀបនឹងឆ្នាំ២០១៦។ បច្ចុប្បន្នសំបុត្រសម្រាប់ចូលទស្សនាប្រាសាទអង្គរសំរាប់រយៈពេលមួយថ្ងៃថ្លៃ៣៧ដុល្លារអាមេរិកសម្រាប់ជនបរទេសម្នាក់។
៦២ ដុល្លារ សម្រាប់ការចូលទស្សនារយៈពេលបីថ្ងៃ និង ៧២ដុល្លារសម្រាប់ការចូលទស្សនា រយៈពេលមួយសប្តាហ៍។ ប៉ុន្តែកុមារក្រោមអាយុ ១២ឆ្នាំ មិនគិតថ្លៃសំបុត្រចូលទស្សនាប្រាសាទបុរាណនោះទេ។ ទេសចរបរទេសដែលនាំមុខគេគឺទេសចរចិន បន្ទាប់មកទេសចរកូរ៉េខាងត្បូង និងទេសចរអាមេរិក៕
