ភ្នំពេញ៖ លោក Nobuo KISHI អនុរដ្ឋមន្ត្រីការបរទេសជប៉ុន កាលពីថ្ងៃទី២ ខែ ឧសភា បានអញ្ជើញសម្ដេច ហ៊ុន សែន ទៅទស្សនកិច្ចនៅប្រទេសខ្លួនក្រោយពេលកម្ពុជាបញ្ចប់ការបោះឆ្នោត ជ្រើសរើសក្រុមប្រឹក្សាឃុំ-សង្កាត់ ដែលការអញ្ជើញនេះគឺជាលើកទី២ របស់លោក ស៊ិន ស៊ូអាបេ ឋានៈជានាយករដ្ឋមន្រ្ដីជប៉ុន។
លោក ជុំ សុន្ទរី អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានថ្លែងប្រាប់ក្រុមអ្នកសារព័ត៌មានដូចនេះ ក្រោយបញ្ចប់ជំនួបរវាងទេសរដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងលោក Nobuo KISHI អនុរដ្ឋមន្ត្រីការបរទេសជប៉ុន នៅទីស្តីការក្រសួងការបរទេស កាលពីថ្ងៃទី២ ឧសភា ម្សិលមិញ ។
លោក ជុំ សុន្ទរី បានឱ្យដឹងទៀតថាការអញ្ជើញនេះ គឺដើម្បីពង្រឹង និងពង្រីកបន្ថែមទៀតនូវកិច្ចសហប្រតិបត្តិការទ្វេភាគីកម្ពុជា និងជប៉ុន ឲ្យកាន់តែល្អប្រសើរថែមទៀត។
តាមលោក ជុំ សុន្ទរី លោកទេសរដ្ឋមន្ត្រី ប្រាក់ សុខុន បានសម្ដែងការរីករាយចំពោះការអញ្ជើញរបស់រដ្ឋាភិបាលជប៉ុន ហើយលោកនឹងយកការអញ្ជើញនេះ ទៅជម្រាបប្រាប់សម្ដេច ហ៊ុន សែន ។
ក្នុងកិច្ចពិភាក្សាកាលពីសៀលមិញនេះ លោកទេសរដ្ឋមន្ត្រី ប្រាក់ សុខុន និងលោក Nobuo KISHI ក៏បានពិភាក្សាគ្នា ពីការពង្រឹងនិងពង្រីកបន្ថែមទៀត នូវកិច្ចសហប្រតិបត្តិការទ្វេភាគី ជាពិសេសលើវិស័យទេសចរ និងវិនិយោគិន ក៏ដូចជាក្នុងកិច្ចសហប្រតិបត្តិការ ក្នុងក្របខណ្ឌ អាស៊ាន-ជប៉ុន។ តែសូមជម្រាបថា សម្ដេចហ៊ុនសែនបាន បានទៅទស្សនកិច្ចនៅប្រទេសជប៉ុន កាលពី ឆ្នាំ២០១៤ ភ្លាមៗក្រោយ កម្ពុជា បញ្ចប់ វិបត្តនយោបាយ ដោយសារជំលោះលទ្ធផលបោះឆ្នោត ឆ្នាំ២០១៣ ហើយ ទស្សនកិច្ចពេលនោះ ក្រោយពីកម្ពុជា យល់ព្រមកែទម្រង់គណៈកម្មាធិការជាតិរៀបចំការបោះឆ្នោត គជប ហើយជប៉ុនសម្រេចជួយកម្ពុជា ទាំង អ្នកបច្ចេកទេស សម្ភារៈ បោះឆ្នោត និង ថវិកាទៀតផង៕
