ខេត្តកោះកុង៖ អាជ្ញាធរខេត្តកោះកុង កាលពីព្រឹកថ្ងៃអង្គារនេះបានដកផ្ទាំងបដា ដែលមានបិទរូបថតរបស់មន្ត្រីសិទ្ធិមនុស្សនៃសមាគមអាដហុកចំនួនប្រាំរូបចេញពីទីកន្លែងសាធារណៈ និងទីស្នាក់ការរបស់អង្គការក្រៅរដ្ឋាភិបាលដោយអះអាងថាការបិទបដាដើម្បីទាមទារឲ្យដោះលែងសកម្មជនសិទ្ធិមនុស្សទាំងនោះមិនបានសុំច្បាប់អនុញ្ញាត។
រូបថតរបស់លោក នី សុខា, លោក យី សុខសាន្ត, លោក ណៃ វ៉ងដា លោកស្រី លឹម មុនី រួមទាំង លោក នី ចរិយា អគ្គលេខាធិការរង គ.ជ.ប និងជាអតីតមន្រ្តីសិទ្ធិមនុស្សអាដហុក ត្រូវគេយកទៅបិទនៅតាមទីសាធារណៈមួយចំនួននិងនៅទីស្នាក់ការនៃសមាគមការពារសិទ្ធិមនុស្សអាដហុក, អង្គការលីកាដូ និងទីស្នាក់ការរបស់អង្គការចលនាមាតាធម្មជាតិ នៅក្រុងខេមរៈភូមិន្ទ ទីប្រជុំជនរបស់ខេត្តកោះកុង ដោយមានសារទាមទារឲ្យដោះលែងជនជាប់ចោទទាំងប្រាំរូប។
សកម្មជនសិទ្ធិមនុស្សទាំងនេះត្រូវចោទប្រកាន់ដោយតុលាការពីបទសូកប៉ាន់សក្សីក្នុងសំណុំរឿងស្នេហាមួយរបស់នាងខុម ចាន់តាទី ហៅស្រីមុំ។
ក្រុម អង្គការក្រៅរដ្ឋាភិបាលចំនួន ៥០នៅកម្ពុជា នៅថ្ងៃនេះបានបើកយុទ្ធនាការបិទបដាដែលមានរូបថតសកម្មជនទាំងប្រាំរូបនៅតាមទីសាធារណៈដើម្បីជំរុញឲ្យមានការដោះលែងពួកគេឲ្យមានសេរីភាពឡើងវិញ៕
